命中注定我與妳?: 32. 媽咪的第六感

我地嘻嘻哈哈咁係到不停玩，好快，開放日就已經完左
 
既然仲有時間，我就幫嘉怡佢地班執好哂D野先返屋企
 
我送嘉怡返屋企路上，我同佢有傾有笑
 
「你呀!玩到咁癲，唔怕俾Miss Lam罰架?」
 
「我先唔怕佢呀」
 




「唔…見埋你今次，都唔知幾時先可以再見你lu」
 
「我同妳可以係網上傾計丫嘛，不過要溫哂書先喎」
 
「就快暑假啦喎，你係暑假咁乖都會溫書?」
 
「咁妳都會練習中樂丫」
 
「樂器係我嘅興趣，咁你呢?你係皇仁有咩活動?」
 




「我呀?影相同埋劍擊囉」
 
「睇你唔出喎，估唔到你又文又武」
 
「妳過獎啦」
 
之後，嘉怡向我作出邀請
 
「我想話呢…我地班大考完之後可能會搞活動，你…有冇興趣參與?」
 




「唔…睇下係咩啦，妳話唱k我肯定唔會去」
 
「你唔鍾意嘈咩?」
 
「可以用討厭黎形容」
 
「咁你…暑假會係邊到溫書?」
 
「我呀….屋企會所囉」
 
「唔會去自修室?」
 
「唔…有時又太多人，而且沙律又要痴實我」
 
「沙律?」




 
「啊…姑姐個女，我契妹，佢叫Charlotte」
 
「你經常同佢一齊溫書?」
 
「唔係架，佢係純文科，同我d科冇關係，不過佢住我樓下，所以佢無野做果時就迫我陪佢打羽毛球之類」
 
「唔通….你同佢….」
 
「邊係呢」
 
「真係唔係?」
 
「暫時唔係，將來唔知」
 




「咁樣…..」
 
「唔?」
 
「我同你呢?」嘉怡講笑咁講
 
嘉怡似乎想單刀直入，可能佢用女仔嘅直覺探測到我對慧思嘅感覺
 
其實近年感覺開始減少，不過又唔可以話唔鍾意佢
 
「我同妳?都係一樣，暫時唔係，將來未知」
 
「咁即係我要努力d啦」
 
乜而家d女仔咁進取架?




 
我地行到嘉怡屋企樓下，佢好似有d唔捨得咁
 
「我返去啦，今晚上網見啦」
 
「妳要早d休息喎」
 
「今日有你幫手，我唔攰呀」
 
嘉怡上左樓，我個心就有d亂
 
弊啦，唔通我好似阿哥咁，用一個開放日就追左個女仔返黎?但係我明明話要娶慧思架喎
 
返到屋企果時，已經見到慧思撓實雙手坐係我房到等我
 




「慧…慧思?做咩呀你?」
 
「呵!!你識返屋企架咩!?你唔係去左英華玩咩?」
 
「咁完左我咪返黎囉」
 
「你講，有冇識到女仔!?」
 
「話明幫媽咪手，就一定識到架啦」
 
「靚女?」
 
「冇妳咁靚」
 
「算你啦!」
 
食好飯後，媽咪入黎我房搵我
 
「浩翹」
 
「咩事呀媽咪?」
 
「你同孫嘉怡好好傾?」
 
「啱咀型者」
 
「係就最好啦，不過如果你想好似阿哥咁樣…我都唔會反對嘅。不過你要自己好好處理好知唔知?」
 
「知道啦媽咪…」
 
唔通媽咪知道我經常同嘉怡係網上傾計?唔會丫，我收到好密
 
除非係嘉怡佢果邊走漏風聲
 
其實我都唔清楚媽咪鍾唔鍾意我同佢D學生來往，因為我知道阿哥同家琪姐姐拍拖果時，媽咪係非常擔心
 
不過我地兩間學校又係友校，會經常搵function，所以我同嘉怡好難避開
 
夏天嘅聯校中樂團表演丫，我差d俾我d同學圍毆