命中注定我與妳?: 38. 接男仔頭放學

係F.4學年大考後，我係百佳到等慧思。因為我應承過會接佢放學
 
到左約定時間，佢係樓梯行落黎，好快就捉走我
 
「嘩，妳行咁快嘅?」
 
「當然啦，有同學行緊落黎嘛」
 
「咁都唔洗行咁快嘛」
 




「費事俾佢地笑我啦」
 
「點解笑妳呀?」
 
「笑我呢個男仔頭都有人接放學囉」
 
「乜妳唔係一直都想架咩?」
 
慧思低頭輕聲道「咁我都會怕羞架嘛…」
 




我幫佢拎起書包「行啦，返去啦」
 
於是我地兩個就去搭車
 
平日放學，我地一齊返屋企的話，就一定會搭地鐵
 
但因為我地兩個都考完試準備放暑假，所以我地就一齊搭下電車，慢慢叮返屋企
 
“叮叮、叮叮”我地兩個都好鍾意搭電車。係電車上層，打開窗戶吹過黎嘅風，令人非常舒服
 




「我地今日晏就食咩好呀?」
 
我諗下先，平日我地兩個成日食麥記，今日食其他啦好嘛
 
睇一睇銀包，爸爸剛俾左零用、媽咪又俾左，所以我請慧思食好少少
 
「同妳食壽司?」
 
「下?你請呀?」
 
「怕妳麼，食唔食?」
 
當電車叮到去堅尼地城果時，我同慧思係公公診所附近落車，然後就去左一間好好食嘅壽司舖到食野
 
唔好睇慧思好似姑姐咁細細粒，佢同姑姐一樣，胃口超勁




 
當年姑丈姨丈第一次同爸爸跟12歲嘅姑姐去打邊爐時，俾佢嘅食量嚇親咁滯
 
而慧思同姑姐係一樣，吸收好少，所以佢地食極都係唔肥
 
每年同佢去聖誕buffet，我都怕酒店會收佢地多d錢
 
一如以往，我地坐低後第一樣叫嘅野就係刺身
 
慧思佢真係好鍾意食刺身，三文魚、吞拿魚、八爪魚、馬刀貝、甜蝦……
 
「呀!!!!!!!考完試後嘅刺身真係特別好食」
 
我夾起一塊刺身，再遞去餵佢
 




佢真係老實不客氣，就咁食左
 
「妳真係唔怕肥架喎」
 
「怕咩喎，暑假你有咩做呀?」
 
「我?溫書囉」
 
「除左溫書呢?」慧思個樣有D不滿
 
「咁妳知唔知今年我地兩家人去邊到玩?」
 
「今年係聖誕先去日本丫嘛，暑假冇地方去」
 
「咁妳就諗下活動啦」




 
「我?我咪同D同學行下街咁囉，邊似得你，唔係影相就溫書」
 
我仲有釣魚妳唔知道者
 
我地返到屋企之後，係我同班同學嘅group中，有人問
 
「喂，我地今年暑假有咩活動咁呀?」
 
「溫書」一如以往都係我嘅答案
 
「D你」
 
「係喎，英華中樂團呢….」同學未講完，大家已經開始圍佢
 




「點呀!?我去呀!」 「預埋我!!」 「報名!!!!!!」
 
呢班人一聽到有女去，佢地就好似色狼咁款
 
「佢地問我地中樂團去唔去一齊燒野食果D」
 
「佢地唔係想去英華燒野食呀?我第一個唔去」我唔想返去燒野食
 
「唔係呀，佢地問可唔可以去我地學校到燒」
 
「點解揀學校呀?」
 
「可能….唔想去郊野公園霸爐掛」
 
「難道你班pk想去沙灘果d地方燒咩?」
 
當然唔想，一去沙灘….大家就會連底褲都濕
 
「去我地學校冇問題，咁我同英華佢地講啦」
 
「喂喂，同英華講唔洗你呀?我地有翹哥係到喎」
 
點解次次都要拖我落水呢
 
「你地想約女就自己約，唔好要我同媽咪傳話」
 
係同班同學傾果時，嘉怡都Online，佢第一時間就問我去唔去燒野食
 
「喂喂，你地中樂團呢…」
 
「想約妳地去BBQ嘛，去我地學校」
 
「嘩，你咁快知道嘅?」
 
「因為我地係到傾緊囉」
 
「咁你…會唔會黎?」
 
「未必啦，天熱，仲BBQ?」
 
「你唔去….唔….」
 
「做咩?定係妳想我叫埋大白鯊黎?」
 
「唔…唔好呀!!!!我地會怕架」
 
「怕咩丫!!姑姐佢好好人架」
 
「唔好啦…..暑假都要對住佢….」
 
「咁妳暑假有咩做多?」
 
「做咩呀?想約我去街呀?」
 
「多口問下者」
 
「咁你去唔去BBQ先得架?」
 
「未知呀…未知」