【已完結】【廣東話】《魔都姬神：退魔巫女千夜》（走甜健全作死日更小說企劃）: 其之八

其之八



「未呀…人邊有咁易死呢…」千夜一邊好溫柔咁扶佢哋起身，笑笑口咁話。

「…唔好意思…我以為見到天使…」

「……」





「做咩呀你…」

「…無…就快頂你唔住…」

「咳唔…哎…其它人響咩地方呀？我準備一邊落樓一邊會合返佢哋，一齊出返去！」

聽到千夜咁講，三人收返笑容認真起嚟，面面相覷，畢竟佢哋無幾耐之前先被妖魔打到七個一皮幾乎死。

「我諗我哋應該落地面盡快出返去搵救兵…」其中一位嘗試組織出比較合理嘅結論。





「…嗯…我諗想救人嘅話火力上需要大大加強先得……」

「咦咦…唔係呀我諗幾位誤會咗唔好意思呀…」千夜歪歪頭咁話：「戰鬥方面交俾小妹，你哋帶路搵齊人就可以喇！」

一個衣著性感甚至可以話係係曝露嘅美少女，誇下海口迎戰AD警察全副最先進強化戰甲三隊15人都無法應付嘅大群妖魔…
搞到當下各人一時間唔知應該懷疑耳仔有事定個腦有事…之但係千夜一啲都唔似講笑，而且係認認真真坐言起行……


…就算係咁，作為專業人仕嘅佢哋仍然跟足訓練清點彈藥同身上裝備，確保一切運作正常就隨同千夜繼續行動。





「好…頂硬上！」

「話說…你隻腳…真係完全無事嗱？」

「係…雖然講出來都唔係好信…但似乎巫女小姐真係一道符就搞掂晒…」

「…！」當邊講邊行返落樓果陣，千夜突然有所發現…

「…16樓…13樓…好大群妖魔嘅妖氣…而9樓…應該有隊人想上嚟！」

「…感測器完全無動靜…同外邊通訊又完全被干擾截斷，巫女小姐妳點樣知狀況咁犀利嘅…」

「…我建議避開由外牆游繩落地下，再聯同地面嘅手足一齊反攻…」

「…時間緊逼，9樓嘅人會被伏擊不在話下，被困響地下二樓嘅人相信等緊我哋，早一秒行動快一步成功！」





「…巫女小姐…妳覺得咁真係無問題？」

「…嗯…所以…」千夜好認真咁話：「請相信我！」

於是三男一女就決定先殺落16樓。
沿路未有遇見人或怪，直到16樓同15樓之間，係一群四腳動物型同獸人型妖魔，數量大約有十幾二十隻。
如果換轉係十分鐘…唔係，幾分鐘之前未見到千夜嘅時候，三人一定係話無得打，唔夠打，走為上著，避之則吉。
但今時唔同往日。
雖則，竟然係由僅僅穿著單薄性感巫女服嘅十六歲美少女打頭陣，全副機動裝甲身高六七尺嘅大男人只係響後方開咗幾槍。
不過，都唔好錯怪佢哋，唔係佢哋貪生怕死唔敢上，而係千夜實在太勇，而且太快！甚至比子彈更快…

「瞬殺無影疾風流星連腳～」

讀完唔駛兩三秒，但唔係講笑，讀完呢個招式名嘅同時，眼前所有怪物非死即傷，真正講仲長過打。





而且快就算了，似牛又似狼大大隻的半獸人型妖魔本來被衝鋒槍掃射都好似不痛不癢咁，但俾千夜輕輕一腳掃到，
就轉住飛開撞埋牆，變成一個大字血印，爆體而亡，完全令人懷疑係咪其實連果幾槍都可以慳返……
本來為安全計應該確認妖魔係咪真正已經死亡或者失去活動能力，但就眼前所見當下毋需多此一舉。

「好，輕鬆解決！」千夜連呼吸都好正常，完全唔似剛做完激烈戰鬥，的確，幾秒可以有幾激烈。

「…咁…我咃繼續…行落去？」

「嗯！大家無受傷呀嘛？」

「無…當然無啦…」

其實都真係叫搵啲嘢嚟講下。





然後去到13樓，本來班妖魔想伏擊由９樓上來嘅人，萬料不到竟然有人由上面落返嚟反擊，
十幾隻半人半獸怪物又係莫講話反擊，連反應都唔係好來得切，呢次甚至慳埋子彈槍都無開過。

千夜之前話「戰鬥方面交俾小妹」所言非虛。

［次回待續］