其之十一

「Echo1 calling, Alfa1 take command.」
「Alfa1 ,roger.」
「之後…準備點做?」
「…落返地面同出面取得聯絡先…我建議…」Alfa1一邊講一邊望一望千夜。
「…我…唔反對…總之盡快,特別係想救人一定唔可以遲。」

由於除咗響18樓落嚟嘅三人見識過千夜身手,其它人仲響奇怪呢個身材極度誇張仲咁少布嘅女仔係邊位點來嘅階段,
所以完全意會唔到係咩一回事。





「但我哋差唔多打到無晒彈,唔補給唔得。」Echo1 拎起枝無晒彈嘅FG42示意,
事實上佢咃剛才已經係連作為護身手槍嘅華瑟P38同毛瑟C96都差唔多打晒,再打真係要拚刺刀打肉搏先掂。

「無所謂啦,交俾巫女小姐處理。」Alfa1苦笑一下。
「吓?!」Echo1一時間以為自己聽錯。

而千夜又真係一副認真表情。

「…妳唔係真係連子彈都變到出嚟下話?」





「唔得唔得…當然唔係啦!」千夜聽到當堂笑出嚟「我又唔係魔法師或者鍊金術師。」

響呢個時候一行人都以為呢番說話只係講笑,直到好耐之後先知道係客觀陳述……

「好喇唔好浪費時間,總之落到地面再講。」

Echo1語重心長咁話「嗯…希望…真係唔好太遲…」

「前面好黑無光源,大家小心有埋伏…」





「…其實我頭先都想問…我哋就話靠頭盔內有熱成像又有星光夜視鏡,但巫女小姐就咁連電筒都無真係睇到?」

「你唔見佢心口兩盞車頭大燈咩?」

「喂…你再唔好心收下把口真係成世無女媾…」

「放心…妖氣唔需要用肉眼去睇,而其實目視以外用心去感受會睇得更清楚。」

「…每個字都聽得明但連埋一齊就唔係好明…總之好似好利害…」

就係咁,成班人一路行一路講但其實又好小心咁向下層推進。

一行人一路落返去7樓,直到一個崩落的轉角位。





上來嘅時候唔易,要落返去亦都唔簡單。

除咗千夜輕輕一跳就過之外,其它人手腳並用都要一段時間先落到去,而且人多咗,比上來要花更多時間。

「Echo9你聽唔聽到?聽到就應下我啦!」

Echo team嘅人馬上搜索斷後嘅副小隊長,雖然各人都作出最壞打算,但內心仍然希望有奇跡出現。

只可惜所謂奇跡,就係唔容易發生亦好少見先至會被稱為奇跡。

[次回待續]