其之十六



千夜由主坑道進入地下一樓,出乎預料之外完全沒遇到任何抵抗襲擊。

雖然幾近全黑完全沒有光源,但對S級退魔巫女嚟講唔會受到咩影響。

考慮咗一陣,佢決定大膽開聲大叫:「有無人呀?聽到就應下我啦~」





當然,對於會唔會真係有人回應佢,係不抱任何多餘希望。

陣陣回音之後,係寧靜,寂靜,微弱嘅風聲,仲有自己嘅心跳聲,除此之外呢?

有嘅,應該仲有嘅…

…昆蟲嘅拍翼聲,獸腳與蹄爪步行刮動地面嘅聲音…濕漉漉嘅蠕動聲…

…仲有軍靴的碎步…





…搵到喇!

千夜一個箭步向聲音方向移動,沒入黑暗之中。

「太好喇妳終於嚟到喇巫女小姐!」千夜轉頭只見一位黑甲AD特警向佢招手。

「我哋等咗妳好耐喇…」

「…等咗我好耐?」





「係呀…我哋就知道妳一定會嚟…」

「…得你一個?其它人呢…?」

「…妳跟我過嚟先啦…」

千夜於是行近佢身邊,正當佢有所動作果陣,千夜卻更快手更早一步將符咒貼響佢額上。

就好似一道旱天雷直劈落佢腦門一樣,成個人被無數紫藍電光纏繞不斷抽搐。

「可惡…竟然俾你發現咗…」只見一把似野獸多過人嘅聲音發出震耳欲聾嘅咆哮。

「陰陽之理,乾坤借法,三昧真火五行雷,驅不淨者毀其形體,使魂歸於天魄歸於地!」

只見一時雷聲大作,十二道轟雷劃破長空,直接將頭頂的鋼筋水泥混凝土全部打破,




陣陣塵土散開之後形成了一個透天大坑洞。

(嘿嘿…就知道耍甚麼手段都沒用,堂堂正正用力量打倒對手才是正道!)

「…因為大叔嘅靈魂不斷告戒我唔好上當,唔好被肉眼所見迷惑,一直請我幫幫手殺咗佢呀…」

(…原來係咁…即使係退魔巫女但畢竟係巫女呀嘛……)

「…咁樣,你要自己走出嚟,定還想小妹過嚟將你揪出嚟呢?」

暗處聞聲冒出一隻又一隻妖魔,數量之多遠遠超過之前任何一層,甚至係所有相加起來嘅總數。

「…想以量取勝嘅總力戰?似乎小妹係被睇得太小……」

(說話唔能夠咁樣講喔巫女小姐…)





各式妖魔張牙舞爪,尖嘯吼叫,開始衝向千夜。

(因為如果呢種程度嘅嘍囉雜卒都應付唔到,根本就無老子郁手嘅價值!)

百妖潛行,巫女現身,
深坑盡處,決戰將臨。

[次回待續]