補習社的女同事: 前言

大家好，我係一位大學畢業生，主修理科。

畢業之後，試過唔同工種，但因為學業成績唔算突出，唔少所謂「入門」工作又需要你有n年工作經驗之云，所以花左兩年仍未搵到穩定嘅工作。

「又係呢類工……又係補習社，不過，機會點都大過其他工種嘅……就再試下啦，起碼唔使好似保險咁跑數。」一路碌緊求職廣告嘅我，決定都係再試下send CV去補習社。

「小學全科教學……ok呀，不過係荃灣……係有少少遠嘅，但仲好過冇工番呀」

就係咁，係我click「送出」制果一刻，補習社就收到我嘅cv，我同某個人嘅人生，亦都即將迎嚟重大轉變。



過左幾日，一個平平無奇嘅下畫，我收到一個3字頭嘅電話。

「唔會係果d詐騙電話掛？算啦，最多到時即刻cut左佢」我心諗。

通常呢d來歷不明嘅電話，我都傾向等對方先開口我再決定出唔出聲。「喂……請問係咪（我全名）先生呀？」

「我係。」

「係咁嘅，呢邊係育望補習社打電話過嚟架。我地收到你嘅申請，想同你約時間做個interview。」



「哦，好呀，無問題，請問有咩時間？」

「下星期三朝早十點你方便嗎？」

「可以呀。」

「咁我地約果個時間見面，請記得帶埋DSE證書正本過嚟，連埋大學成績單。我係趙Sir，bye bye～」

「Bye bye~」



總算有面試機會，以我一路以嚟私人補習嘅經驗，勝算應該唔細。

唔知間補習社會係點樣呢？我可以同班同事好好相處嗎？