補習社的女同事: 買M巾

星期一，我番到嚟補習社之後，見到Regina聽緊個電話。

我擺低完背囊之後就番自己個位做野。可能係新家長想查詢專科班課程，比較多野查詢，所以個電話都好似傾左十幾廿分鐘。

跟住果半個鐘，佢都係用Excel排緊呢幾日唔同老師嘅上堂時間表，始終有時遇著老師請假或者學生家長調堂嘅情況，都要花多d心思排好份表。

與此同時，我見佢攞左自己部電話出嚟，望左幾分鐘，打左d字然後又delete番，我仲諗緊佢係咪有咩煩緊或者有咩重要事要whatsapp，費煞思量。

平時我部電話都會擺係電腦隔離，免得miss左咩通知會覺得唔心安，不過又唔想成日ding ding ding彈d通知出嚟分哂心，所以就反轉部電話擺。見到Regina放低左佢部電話，然後我部手機就ding一聲咁響左，唔通……果然係佢whatsapp我。



Regina係第一次用自己電話whatsapp我，佢打左：「Cyrus，幫我買M巾。」

我頓時明白佢點解諗咁耐先send message：佢想搵我幫手，但始終呢件係好私人嘅事，所以講出口驚怕醜，同埋佢係第一次whatsapp我，所以諗咁耐先send到出嚟。

我心裡暗想：「唔怪之得佢番嚟大半粒鐘仲未去廁所啦……原來係因為咁。」

我冇whatsapp覆佢，而係直接行出補習社，係港鐵站附近間萬寧買左兩包番嚟。好彩我番嚟果陣，趙sir仲未番到。

「你想我點樣比番錢你呀？」



「唔使啦當我請你。」

「邊有人會請呢d衛生用品架……同埋做咩你去左買兩包？」

「我見買兩包有八折嘅優惠嘛。」其實係我作出嚟，只係想佢唔使成日買，好似顯得我細心d。

「乜有d咁嘅優惠咩？我買開呢隻都唔覺有嘅。」

「唔緊要啦，今次當我請你啦。」



「好，咁我就當呢次係你同我……同我發生咩之後……第一次幫我啦。」

雖然佢都只係稍微感謝我，但我番埋位之後心裡面一直暗爽。佢叫得我幫佢買呢d私人衛生用品，即係代表佢開始信任我？我地嘅關係算係正式回暖，甚至比以往有所突破？

呢個時候，我諗到安全期呢三隻字。如果今日係佢經期第一日，咁過多3至5日就係安全期……又有一個想法浮上心頭。

自從果晚我地開始了解對方之後，我地係平日都多番對話。

呢幾日我一直思索，到底Regina同我講過好好愛佢，即係可以話佢願意接受我嘅心意，同時亦會接受我對佢嘅親密舉動？就好似買M巾呢類咁私人嘅事，通常男朋友先會幫忙。係工作上固然我想幫到佢更多，但工作以外嘅時間，我都想同佢行得更近。

嚟緊星期五對佢發動攻勢，就可以測試到佢嘅底線。