每一次扑嘢，都係一場死亡挑戰: 55

我坐落地下，同Vincy一齊攤開張說明書，研究下點樣著手砌盒Lego。

盒嘢嘅模型係一個過山車，總共有成五千幾塊，睇嚟有排砌。

一男一女獨處一室，唔砌女砌Lego，聽落好似好憨居，但對我嚟講，我寧願砌五千塊Lego都唔想屌一萬下。

我地逐塊Lego慢慢砌，一邊砌模型嘅同時，一邊傾下閒計。

由中學軼事傾到日常興趣，再傾到去各自喜歡嘅漫畫。





傾傾下發覺原來大家喺生活上都有幾多共通點。

例如唔鍾意食辣、睇live band show留意鼓手多過主音，以及鍾意同一個日本漫畫家。

「…估唔到你都鍾意藤本樹喎，有taste屎！」我負責砌過山車條車軌。

Vincy就砌緊個底座：「除咗最新連載嗰期電鋸人未睇之外，我基本上佢嘅長篇、短篇我都全部睇曬。」

「咁你鍾意邊一本書？」我問。





「我最鍾意《再見繪梨》，你呢？」

「我最鍾意嗰個學生哥徒手擋子彈嘅短篇。」我答。

「我知邊一篇！故事講有個人揸槍衝入嚟課室，跟住向個miss開槍，然後有個學生衝出嚟，徒手幫miss擋子彈，最後個學生大個咗上埋月球搵佢老豆。」

「係呀係呀，我好鍾意呢個故仔，短短五十幾頁之內，可以講到一個好完整但又迂迴曲折、令人意想不到嘅故事。」

無獨有偶，我地鍾意同一個漫畫家，而且都係鍾意佢寫嘅短篇故事。





就係咁，我地傾下計、砌下Lego，咁就消磨咗一個下晝。

作為一個無乜耐性嘅人，我原本以為砌Lego係一件好沉悶嘅事，但唔知點解我竟然一啲都唔覺得無聊，反而感覺開心同有趣。

或者係因為有Vincy喺隔籬，所以先令沉悶嘅事變得有趣。

最後五千幾塊嘅Lego，我地都砌咗好幾日先至完成。

而且砌出嚟嘅成品，係真係可以當過山車咁玩。

Vincy望住架玩具車喺路軌上快速咁上上落落，望到入曬神。

我估佢一定係為自己親手完成一個咁大嘅模型，而感到好有滿足感。

然而令佢覺得開心嘅仲有另外一樣嘢。





據新聞報道，經過消防員同救護員連日嚟嘅救援，終於救出曬所有受地震影響嘅市民，死傷人數更比預期低。

而喺醫院被救出嘅傷者中，無人死亡，最嚴重只係身體受重傷，呢個總算係不幸中之大幸。

見到呢啲好消息，Vincy都安心返啲，鬆咗一口氣。

地震事件漸漸告一段落，數數日子，仲有兩日就到一個星期。

我差唔多係時候要離開Vincy嘅屋企，雖然呢段日子大部分時間都係砌Lego、做家務，但卻過得好快樂。

只可惜，呢啲快樂嘅時光係短暫且有限，接落嚟我係時候要為自己諗定後路。

夜晚，夜深人靜。





Vincy喺自己間房度訓，我就自己一個人訓梳化。

我輾轉反側，諗緊以後要點打算。

呢段時間，Mandy同Emily雖然無嚟搵我尋仇，但我相信佢地一定仲係好憎我。

佢地一個識武功，一個識得差佬，話唔定Mandy教埋Emily武功，等緊機會一齊嚟對付我。

無論係俾武功殺死，定係俾差佬捉去坐監，兩樣嘢對我嚟講都係死路一條。

除咗走佬之外，唔通我就無第二條路揀？就無其他辦法解決呢件事？

唉~~救命~~有無人可以打救下我？

我忐忑不安，搞到失眠，最後差唔多臨天光先訓得著。





第二日，Vincy晨早流流嗌醒我：「Tony，起身啦！」

「都未夠八點，俾我訓多陣。」

「唔好訓啦，今日我想你陪我去一個地方！」

「去邊度？」

「迪士尼！琴晚我訓唔著諗咗一晚，經歷今次地震死唔去，令我發現做人原來好化學，係生係死有時真係講唔埋，所以我覺得趁自己仲生勾勾，係時候要付諸行動，完成bucket list上面嘅願望，而第一樣就係去坐過山車。