每一次扑嘢，都係一場死亡挑戰: 84

返到屋企之後，我望住手上嗰串號碼，望咗好耐好耐，諗嚟諗去最後都係忍唔住打過去。

「Vincy…我…我想…」我緊張到口窒窒。

「你想做咩？」

「我想約你出嚟食餐飯…當…當係多謝你之前收留我。」

「好呀，你想約幾時？」





「聽…聽日？」

「聽日唔得喎。」Vincy答。

「點解？」

「我俾委派咗去第二間醫院返工，我聽日要當值。」

「咁後日呢？」我問。





「後日都唔得，不如下個禮拜？」

「好呀好呀！咁我地就約實下個星期啦喎！」

「嗯，一言為定。」

就係咁，我成功約到對方出嚟食飯。

接住落嚟嘅嗰個禮拜，我每日都係懷住期待同興奮嘅心情。





除此之外，我亦都著手開始搵工。

之前辭咗職，我一直就過住失業兼且俾人追殺嘅日子，依家事情告咗一段落，都係時候過返啲正常嘅日子。

嗰日我同Mandy、Emily空中大戰嗰啲片繼續喺網路流傳，不過關注度就隨時間逐漸降低。

香港人係善忘嘅，再過多兩日，我相信大家就會唔記得呢件事。

而除咗我之外，Mandy同Emily都因為呢單嘢而多咗人識。

Mandy見自己紅咗，又俾人睇曬全相，索性就將計就計，全職開patron賣相，兼職就教人功夫。

呢條友不嬲都係醒目女，我相信佢依家賺錢肯定多過以前好多。

另一邊廂，Emily就繼續同阿銘一齊。





阿銘發掘咗自己潛在嘅NTR性癖，完全唔介意自己條女啲片俾人周圍傳，甚至覺得越多人睇到越好。

佢地兩個人嘅感情似乎仲好過以前，聽講下年仲計劃結婚添。

Emily泊到阿銘呢個好碼頭，終於都得償佢嘅所願。

諗落呢單嘢到最後似乎大家都無蝕底，甚至有得著。