市民與公主[短編]: XVII. 離別(2)

當日之後，我哋已經冇再聯絡，亦都冇任何交談，部面遇到都唔會望對方一眼。

我係完全冇勇氣去面對佢，冇資格去面對佢。
個件事之後，我即刻就好後悔，當時完全係被情緒控制所以先講出呢啲唔理智，冇經過多番思考嘅說話，而好明顯地已經傷透咗佢嘅心。佢當時淚流滿面嘅樣依然深深烙印係我心底裏。

每次一諗起都好想講對唔住，但我搵唔到機會，搵唔到好嘅時機去講。每次一見到佢嘅樣都好愧疚，手機嘅背景畫面都已經轉咗。

冇一個我地兩個可以獨處嘅時間，我亦都冇可能上佢屋企啦。

總之我辜負咗佢好多，成段感情都得佢係度付出，諗返我究竟付出過啲咩呢？帶佢食好野？送禮物俾佢？個啲算咩？但就算係算，同佢嘅付出相比又值幾多？





唯一可以望佢嘅時候就係每日上堂嘅時候，從後面望住佢嘅背影，唯有呢個時候我先有些微嘅勇氣。一直藏係心中嘅個三個字都講唔出口，只敢係心中默念。

如果我需要面對佢同佢講，首先我需要極大嘅勇氣，但即使咁，我講完都只會顯得我厚顏無恥同毫無尊嚴。

或者...等佢主動嚟搵我？我知咁做係賤格，有咁嘅諗法係邪惡。要一個被傷害嘅人主動搵傷害人嘅人，唉...

個試都終於考完，好幸運地我係全科合格，意味住我可以繼續升上去，真係要繼續升上去？

——————





「你係咪考完試喇？」係醫院婆婆問我。

「嗯，放心啦，我考唔錯，好滿意。」

「咁就好，幾驚你成日嚟探我會影響到你成績。要俾心機好好繼續讀落去，你嚟緊就要考文憑試，對你升大學好重要架。」

「知喇婆婆，我會努力架。」

我應唔應該兌現同婆婆嘅承諾繼續讀落去？





同佢分開咗或者係一件好事？我可以更尊注於婆婆嘅事上面，成個暑假除咗探婆婆就係返工，亦都令我逐漸望記佢。

當時事情邊有咁簡單？中四到中六都唔會再轉班，會一班同樣嘅人一直升上去。所以一返到去就會見到佢，仲要日日都見到佢。我特登坐遠啲，為嘅可以盡量令佢少啲見到我，會冇咁傷心。我亦都可以輕鬆啲。

有時真係唔知啲消息係點樣傳出去，而家成間學校都傳我同佢分咗手，亦都有更多無原無故衍生出好多傳言，清一色都係我做錯，至於做錯啲咩都五花八門，咩都有。

不過至少我錯呢一點係啱嘅。

成個氣氛都回到中四個時，成間學校都唔鍾意我，而且更甚，佢地而家討厭我。

啲男仔都再次展開進攻，之前因為有我係度，佢已經名花有主，所以佢地冇辦法，唯有收手，等我地分手先。

皇天不負有心人，而家終於都等到。





坐係佢附近嘅男仔上堂都會進攻，我唔想睇到架，但人類嘅視線範圍好廣闊，冇辦法睇唔到。

小息嘅時候，我把悲傷留給自己，扒係枱上面嘗試唔理外界嘅目光，亦都唔俾外界知道我嘅反應。但都會聽到佢同其他男仔傾計嘅聲。

有次我終於忍唔住偷睇咗一下，見到咗一個我好耐冇見過嘅燦爛笑容，我對上一次見係幾時呢？我都唔知，我淨係知我見過佢喊嘅樣，非常清晰，日子都好記得。

好想可以忘記。

不過佢而家咁開心，都係好事嚟，我都要正式放佢走。

總要有人做醜人，

「分手」我send個訊息出去熄機繼續做自己嘢。