佢用3粒Bitcoin買起一間7仔: 第二章 Netflix but not chill 三之一

9點05分，以琳到咗便利店。便利店今晚特別寧靜，連埋佢自己只係得兩個客人，貨架上啲杯麵薯條零食井井有條，擺到滿晒，好似啱啱補完貨咁，好整齊。
 
唯一奇怪，就係有個好似谷德昭咁嘅大叔喺雜誌架前，大條道理咁打開膠袋睇啲貴價雜誌，擺明係未畀錢打書釘嗰種，連袋都拆埋，好狼喎。
 
以琳同谷德昭有一下眼神交流，對方報以話之你嘅神情，以琳唔敢惹佢，直入飲品櫃條巷。
 
揀咗支果汁，睇包裝似係偏酸唔太甜，飯後飲啱啱好，多一支多一個印花，就買夠兩支。以琳左手攬住兩支果汁，右手拎手機出嚟睇下也然有冇搵佢。
 
「你到咗未呀？ 」  9:11
 




灰剔都未有，也然乜事呢？呢位男同學唔似咁唔交帶，平時返學都唔會遲到，成班同學去玩仲會係最早到嗰批人。唯有等陣咯，可能晏少少啫。
 
收銀處完全唔見有人，以琳放咗兩枝果汁喺枱面，等店員出現，雙手拎電話𢱕低頭睇message，原來落一落街，咁多同學傳短訊畀自己。
 
Annie問以琳聖誕會唔會跟佢一齊去牛津道表哥屋企玩，話會有好多富二代出席，大可去識返個男朋友。以琳丁點興趣都冇，主要係唔慣同啲冇乜熟人嘅地方social，好冇安全感，況且DSE當前，唔好搞多嘢，萬一太多節外生枝，影響咗個考試就唔好。
 
「小姐，可以嘟得啦。」
 
以琳得睇入神，店員出咗嚟都唔知，目光繼續停留喺手機，右手打字話畀Annie知，都係唔去啦，要溫書，左手就拎張八達通靠近感應器嘟。
 




嘟。
 
「小姐恭喜你呀，你中咗特別大奬，有1000個印花，同埋一個AirPods盒。」
 
「！」以琳即時由雲端抽身返嚟現實世界，乜事呀中獎，抬頭一睇，呢個着住一套唔啱身7仔制服嘅店員，原來係也然。
 
呢個時候，谷德昭放低手上雜誌，行去門口，鎖咗道玻璃門，然後拎返同一本雜誌，打開剛才睇到嗰一頁，由得佢兩個慢慢玩。
 
「乜你嚟咗兼職咩？下年DSE啦喎，乜你咁等錢使咩？」
 




「哈，我，你當我喺度兼職啦，今晚呢度啲印花，同埋所有見到或者見唔到嘅貨，任揀，入我數。」
 
也然拎咗天量印花出嚟，呢個天量可能真係要買晒成間舖先拎到咁多。當然，其實要換一套、兩套甚至五套禮物，都唔使咁多印花，純粹係為有型咯。同埋，也然真係買咗間舖。
 
今次輪到以琳失控。「吓？你發咗呀？」其實佢並唔想知也然點解今晚會做啲咁嘅嘢，只係見到咁多印花後想畀個得體啲嘅反應，唔好太失禮，雙手已經去感受咁有份量嘅印花，一個個姆明、史加奇、阿美印花連綿不絕，銀色嘅反光防偽設計，同以琳對眼一樣，閃閃發光。以琳知道呢堆印花只係換Moomin嘅工具，但到咗手，真係到咗自己手嘅感覺，好實在，係電子印花畀唔到嘅感覺。
 
係喎，個AirPods盒呢，以琳已經唔重視啦，仲喺收銀張枱，未拎返。也然搞咁大壇嘢，順利完成咗，為博紅顏一笑，誠惠三個Bitcoin，好任性。也然可能係全世界首個用Bitcoin買起一間便利店嘅人，歷史或者會記得呢一日。
 
完美布陣，係時候收網。
 
也然着住谷德昭畀佢扮員工嘅制服嚴重偏細，應該係女仔size，着到佢好唔自在，完全係一個束縛，好想快啲換衫走。
 
「呀，係喎，Netlfix呢排有套劇，幾好睇㗎，我有個地方，不如拎啲嘢飲同零食上去睇。」呢個也然係一個新嘅也然，咁主動係因為來自Francis嘅刺激，只要係也然想做同肯做嘅嘢，總係搵到啲無縫又唔突兀嘅理由。
 
無敵package啦，先送天量印花，中學生又有自己地方可以Chill，明刀明槍，冇理由拒絕啦。




 
「Er，我要返屋企餵貓喎。」男仔以為萬無一失，但都敵不過到女性簡單嘅一句，餵貓真係無敵理由。
 
搭到個棚咁靚，用咗三個Bitcoin同咁多準備工夫，輸咗畀一隻唔知係咪真實存在嘅貓，又或係係一隻根本食飽咗唔餓嘅貓，仲有，從來，從來冇人聽過以琳養開貓。
 
沮喪，係也然呢一刻嘅感受，點答以琳先不失霸氣？
 
//唔緊要，下次咯，其實今晚都夜。//
 
//講笑啫，Netflix邊度睇都得啦。//
 
//你唔以為我鍾意你先咁做咁多呀嘛？//
 
唉，答得唔好，好容易有誤會㗎喎，一陣以為我有不軌企圖咪破壞晒形象，破壞晒以後嘅關係？定係我話去陪佢去餵貓先？但又唔知佢隻貓鍾意食乜，點算？
 




「不如⋯⋯你等我餵完貓，再出嚟好唔好？」以琳竟然咁講。
 
再一次證明，一段關係或者一段未開始嘅關係入面，遇到未有定案嘅情形，邊個開口先，通常都係下把或者被引入局嗰一個。
 
也然又過一關。