佢用3粒Bitcoin買起一間7仔: 第五章 開發你新的秩序 三之一

你如果認識從前的我，也許你會原諒現在的我。愛玲講嘅。

從前同現在對也然嚟講，界線越嚟越模糊。

以琳又双叒嚟到也然300呎小天地，已經係第三次，一不離二二不離三，原來係咁解。

幾堅強嘅意志，都會畀慢慢畀現實消磨，如果再次擘大眼又係呢個情景，第三次、第四次，甚至無限重複點算？也然點都要做啲改變，何況早着先機知道也琳嘅喜惡，也然應該有能力控制整晚發生嘅事，無論今晚之後又係今晚，或係真正嘅明日。

今次一定要過得比上兩次好，呢個想法，合情合理合法，雖然跌咗落個神秘嘅迴路入面，做乜都要重複一次，做乜都未必有後果，但違背道德嘅嘢，也然冇諗過要做。總之未來任何一個決定，都係當係冇得回頭，一要出盡力討好以琳，二要應付一個人的幣災。





「歡迎王以琳同學光臨寒舍。」也然一改態度，將內心嘅熱情傾瀉出嚟。為咗以琳用三粒Bitcoin買起成間七仔都做得出，有別於平日同學之間交往嘅方式，可以一試。

以琳獲到上賓式嘅歡迎，進入一個新舊交雜嘅大觀園。「嘩，呢度就係你嘅地方。」

「我知你會對我嘅收藏有好興趣，呢度有陳綺貞首《旅行的意義》個隻碟，仲有好唔同年代嘅中外CD黑膠，今晚你可以慢慢睇，只係我呢度冇任何唱盤，你可能淨係可以睇冇得聽啦。」也然一炮過滿足晒女同學嘅興趣。

以琳覺得也然睇穿晒自己嘅喜惡，係一個好貼心嘅男仔，但又想掩飾內心嘅喜悅，咁啱望到一個古怪嘅跳字鐘，即時扯開話題，「咦，呢個乜嚟㗎。」

也然望住呢個鐘，以前係覺得滿懷希望，依家就變得百感交集，因為佢贏錢係因為加密貨幣，搞到身陷險境亦係因為加密貨幣。





「呢個係比特幣鐘，即時顯示Bitcoin價錢㗎，單位係美元。」也然豁出去，決定打開個肚皮，「你知唔知點解我會去便利店做兼職？」

「係喎，點解嘅？」以琳畀人叫到，禮貌性都唯有問啦。

「因為我係一個唔係你想像中嘅普通中學生。」也然一臉認真咁講，以琳聽到好想笑，但又忍住，「咁你係香港Peter Parker，蜘蛛俠兼職係做記者㗎喎，定係你係神盾局啲人？」也然好想答依家仲慘過Dr Strange，一個爭人好多錢但控制唔到空間嘅Dr Strange。

「我可係能第一批真正接觸到未來世代嘅人，」也然只係諗到用呢個方法，令以琳更易明白，「簡單啲講，人類以前用貝殼做買賣，後來演變到各個國家有各自嘅貨幣做交易，未來就會使用加密貨幣。加密貨幣唔係由國家發行嘅貨幣，因為大家慢慢會唔相信現有金融系統，或某一隻法定貨幣，所以慢慢湧向基於區塊鏈技術衍生出嚟嘅加密貨幣，比特幣就係一個例子，由無人覺得有價值，變成你望到呢個鐘所顯示嘅17000美元一個。」

以琳開始覺得佢眼前嘅也然比同年齡嘅人出眾，知識範圍超越想像，深不可測，漸漸產生仰慕，「咁點解你要去便利店做兼職？」





「我為咗你，用三粒比特幣買咗我哋放學成日去嗰間便利店，間舖係我嘅。」

「你買咗⋯⋯間便利店⋯⋯為我⋯⋯」呢件事對以琳嚟講係十級震撼，一個日對夜對嘅同學，為自己買咗間便利店。

「因為我知你想要啲印花嘛。」也然知道呢個理由唔夠強烈，應該更坦白講落去，「咁，反正我有呢個能力，我指財力，你又鍾意啲印花，我又覺得買間便利店幾得意，同時又促進到成個區塊鏈行業嘅發展，畀更多人參與加密貨幣，個老闆咁啱又有Hot Wallet喎，你話係唔係？」越講越緊張，已經開始胡言亂語，好彩轟轟烈烈豪一次買間便利店，反正聽日都輸晒甚至輸突，Francis嘅挑釁其實係一個提醒，幫咗也然。

「多謝你呀。」女生角度，男仔買嘢畀你，唔係毛公仔、唔係花、唔係名牌手袋，而係一間便利店，特別到講畀其他閨蜜聽都未必信，好難唔感動，眼眨淚光都係基本禮貌。最瘋狂係，買間便利店唔係為啲汽水薯片，係要啲印花。

「但點解你唔淨係買嘢攞印花？」呢個又係好問題喎，三幾百個印花，買幾千蚊嘢都得啦，使鬼咁大陣仗喎，錢係咪咁嘥呢？