佢用3粒Bitcoin買起一間7仔: 第六章 我過得並不好但是我會活著 三之二

 
「閉路電視有冇開齊？」
 
「有。」
 
「啱我着嘅制服有冇？」
 
「我知你會再嚟玩收銀遊戲，特登班咗套你啱着嘅。」谷德昭遞出制服，也然唔得佢手伸直已經畀搶咗，衝入後欄。
 
「有冇帽呀？」也然喺後欄大嗌叫出嚟。




 
谷德昭嗌返入去。
 
也然慢慢行返出嚟，走去谷德昭隔離，扮店員慢慢從詳計議。
 
「你個閉路電視真係有錄㗎可？」
 
「有，直接上Cloud㗎，touchwood講句畀人扑爆咗，臨扑嗰吓都攞得返嚟睇。個女仔又嚟咩？不如我一陣匿埋用iPhone同你哋影咪得咯。」
 
「唔係咁呀。」也然淨係覺得便利店係一個安全情況，真係做一日兼職都好，捱過今日，可能又返轉頭呢，到時先再算啦。




 
「你呢啲隱形富豪兼加密貨幣先驅，玩嘅嘢果然一般人唔同，發咗仲扮店員。」
 
「乜嘢加密貨幣先驅？」
 
「你發咗隻加密貨幣叫CA Clean Air嘛，全部網站寫晒啦，你係YY Lam嘛。」谷德昭一邊講邊拎部手機出嚟，「我send返啲報道畀你睇啦，係喎，我都冇老細你電話」。
 
也然唔知自己冇親自經歷嘅噚日，發生咗咁多事，「今日唔記得帶手機呀，我自己再睇返丫，係啦，CA依家幾錢？」
 
谷德昭覺得好奇怪，點解搞手唔知自己隻幣幾錢，所以開埋個報價佢睇咯，「1 usdt咯，同你上市價一樣。」也然呢一刻反而覺得係夢，CA唔係一上畀人狂沽，跌到唔似人形咩？睇返個圖，隻幣由1u沽到得返0.04u，但喺兩日內拗腰反彈，去返1u。




 
也然拎住谷德昭部手機報價，眼都唔眨，唔知要望多幾耐先相信CA企到喺1u。
 
「你個概念幾好丫，有mining又有staking，啲錢用嚟搞空氣潔淨，將啲本來唔使錢、人人都可以唞嘅氣夾硬掛去區塊鏈度，雖然唔明點解行得通，白皮書寫到天花龍鳳都唔會有人睇㗎啦，但聽落幾有意思。買得加密貨幣啲人，十個有九個半唔明係乜嚟又照買㗎啦，冇所謂喎。」
 
「哈⋯⋯哈⋯⋯」也然想緒亂上加亂，既然隻幣彈得返起，點解有人貼佢街招呢？
 
「CA犀利呀，呢次香港之光呀，有人喺討論區吹雞叫買，話支持香港人發嘅幣呀，大家見一上市暴跌九成咪買入咯，一人三幾千蚊支持下都唔少嘢丫，買吓買吓就彈咗上去啦。我都贏咗錢呀，老闆。」
 
也然開始構想到，CA上市時真係有人惡意沽空，但沽到咁上下，畀群眾力量買返上去，沽空班人喺低位都繼續沽，見反彈要急急補倉，越搶越高。所以，啲街招係咪CA低位嗰時貼嘅呢？換句話說，依家咪安全，可以返去攞返部電話咯。
 
「其實我今日嚟，係攞少少零食走，轉頭同同學燒嘢食慶功。玩完Roleplay店員，我換返套衫先。」也然唔想解釋太多，求其講一堆嘢，順手着返便服，拎少少自己想要嘅飲品走。
 
也然拎住谷德昭準備畀佢嘅環保袋，返到300呎小天地，其間佢沿路摵晒啲街招去丟。部手機冇乜電，索性叉多幾啖先出街，成千個message睇嚟已經冇意思，一次過del晒啲notification，佢整理下個廳，掉晒啲空酒樽，清潔埋個小天地，拎返個環保袋同電話，準備去George屋企。
 




「你喺邊呀？我哋搵個地方等一齊去？」也然whatsapp以琳。
 
「好，7仔等齊人，再搭的士去丫。」也然未入𨋢，以琳已經秒覆，早知正話唔攞飲品啦，拎嚟拎去，攰㗎嘛，不過便利店等都好，有咩需要可以再拎，仲可以喺以琳面前威多次，但係唔知之前表白嗰一晚，佢以琳仲記唔記得。同一晚，以琳同也然經歷咗三次，邊個版本先係真正嘅歷史？所以表白成功可能只係一場空。