佢用3粒Bitcoin買起一間7仔: 第七章 如果我有逆轉的超能力 三之二

 
「我哋識咗六年啦，有咩唔問得喎。」Francis講完呢句，也然個心更寒，電話另一邊嗰個，似係中六以前嘅Francis，兩個人一支汽水兩份飲，一齊打波，無所不談。可能因為太friend，鍾意嘅嘢都差唔多，例如女仔，即係王以琳，也然一廂情願咁諗。熱情嘅Francis，假㗎。
 
「Francis，你，你聽日係咪見過我？」
 
「哈哈哈哈！」Francis笑咗出嚟，「今日都未過完，點樣聽日呀？係咪玩整古電話呀，你係乜個用變聲器扮也然打嚟呀。」Francis梗係知道真係也然打嚟啦，咁講都係搞下氣氛。
 
「我換個方法問，你有冇試過日日都唔同，但又返番去之前，有時又去咗之後？」
 
「也然，你係咪考試太大壓力？你喺邊，我嚟陪你丫，今日東九龍大塞車，遠嘅地方都無謂去啦，你又喺德福飲咖啡。」我的天呀！Francis幾時變返咁貼心，呢半年見到嗰個Francis究其係邊個？前日喺便利店狂鬧也然個Francis鬼上身呀？




 
也然唔敢問落去，再問落去，Francis會以為佢精神有問題，捉佢去睇醫生。Latte無將也然灌醉，係Francis嘅回應令佢更迷惘。喺混亂之中爆樽扑暈也然嗰個，係邊個？
 
「你今日心情好好咁喎，咁多嘢講嘅？」也然嘗試轉換話題。
 
「玩完電話又玩第二樣？我不嬲同你都咁好傾㗎啦，同我講緊嘅林也然係咪假㗎？」Francis笑住講，並唔覺得也然有異樣，只係覺得佢呃水吹。也然幾精叻都唔知畀咩反應，自己懷疑Francis有古怪，點知畀人懷疑返轉頭。
 
「前日你喺便利店，做咩咁惡鬧我？」也然點都要知道真相。
 
「有咩？我哋幾個好開心，買開嘢儲印花畀以琳咋喎，你係咪記錯？」




 
「你仲大力嘭雪櫃門，寸我有錢都冇用喎！」就係因為Francis寸也然，先會做出用Bitcoin買便利店嘅壯舉。
 
「你好有錢咩？大家都中六學生未做嘢，邊會有錢。」
 
「咁⋯⋯」也然唔敢再問落去，「我應該搞亂咗發夢同真實，Francis你都唔係咁惡嘅人。」
 
「你壓力太大啦，考試啫，好多人都話讀書同打工兩回事，唔少大老闆創業家讀書都麻麻。」Francis每一句都好鼓勵。
 
「嗯，希望我只係壓力太大。」係喎，可能只係壓力大，也然只要好好一覺瞓醒，第二朝就會冇事。如果真係咁，呢個故事就係典型爛尾，唔會咁咯，睇落去啦。




 
「你唞下啦，聽日先去George度燒嘢食，冇嘢做咪瞓下晏覺唞下咯。」
 
「嗯，聽日見啦。」
 
係喎，夜晚瞓咗或者冇咗知覺，接住嗰日係邊日就話好似盲盒咁抽啫，瞓晏覺有乜效果呢。
 
同Francis傾電話期間，也然已經啜晒杯咖啡，啜到啲飲管得嘅空氣流加少量冰水流過嘅響聲，時間已經係12點18分。也然再睇個幣價，Alex冇畀紙老虎呃到，CA得返0.5u，也然冇嬲，已經默默妥協咗有一種命運叫注定。
 
呢幾日，也然都攰啦，Latte奶多過啡，對佢完全冇提神效力，索性趴喺度烚陣，試吓Francis個提議。
 
也然獨自喺一部向緊上嘅舊式𨋢入面，呢部𨋢比大家見過嘅更奇怪，按鈕都冇，好似IFC甲級商廈嗰啲咁。
 
𨋢門打開，係七樓，也然行出去，長長嘅走廊好似一個凝固咗嘅空間，連空氣都冇乜流動，唔妥梗係即閃啦，入返𨋢，𨋢自動關門，然後向下沉。
 




過咗唔知幾耐，𨋢門終於打開，係一間偌大嘅西洋圖書館，但擺嘅全部係黑膠唱片、卡式錄音帶同CD，全部都分門別類。
 
也然逐條行入去睇，發覺好唔對路，點解每一行都係P字開頭嘅歌手或者樂團，不斷重覆，好唔真實，似係一個夢入面。
 
鈴鈴！圖書館唔畀電話響㗎喎。
 
鈴鈴！鈴鈴！