［搞笑］［打機］收錢幫人戒除網癮，幫到困咗喺遊戲世界: 一、來自煙民陳小姐嘅委託

我係魚仔，開左間叫做「一心網癮戒除有限公司」嘅公司，專幫啲打online game打到嚴重成癮既青少年戒除網癮。

睇到呢度，大家可能覺得我係一個青少年心理治療專家，又或者一位偉大嘅教育家。

希望大家唔好誤會，我連咩教育或者青少年心理治療學位都冇。

我只係一個前電競選手，而我既網癮戒除手法就係聯合我嘅團隊入game之後係咁針住委託對象打，佢去邊就追到邊，打到佢對online game失去熱誠，呢個方法萬試萬靈，幾乎冇一個玩家會接受到自己一行出安全區就俾人一刀插死，呢個情況下，再練多個account都已經冇癮。

喺2046年既香港，VR遊戲已經非常普及，幾乎每家每戶都會有VR裝置，因為主流學校都會用VR遊戲作教育用途。VR嘅普及令大批商家想分一杯羹，博晒老命整VR game，基本上講得出嘅冒險題材都有。市面上嘅VR online game泛濫，又咁容易接觸到，自自然然會有好多青少年沉迷打機。





有啲家長有幾個閒錢，又唔捨得打罵個仔，就會選擇搵我同我既團隊幫手，雖然我以前都係沉迷打機，不過我都係唔會放過呢個咁好嘅搵錢機會。

眼前呢位著住旗袍、擔住口煙既中年短髮女士係我今日既第一位客人-陳小姐。

「嗱陳小姐，你可以參考我地唔同package嘅報價先做決定嘅，咁我地既服務範圍主要係多人連線online game既…」

「唉喲哥仔！你睇我個款似唔似識咁多？我唔知咩on咩game啦，總之個衰仔就成日都戴住個頭盔唔知做乜。唔使理要幾多錢，總知你幫我令佢唔好再咁沉迷遊戲就係。」

陳小姐一講頭盔我就知佢講邊隻game。





係香港公司研發嘅「Reality 」，以畫面精美同遊戲世界觀豐富聞名，亦都係我哋最常受委託嘅遊戲之一。

佢哋嘅技術可以做到阻斷一切外界干擾，玩家可以體驗所有遊戲內嘅感覺，除咗死亡。

換言之，就算玩家喺現實世界冇食飽，佢食遊戲嘅食物一樣可以飽肚，呢個就係問題所在，因為佢喺現實世界根本冇食飽。玩家喺遊戲入面都需要屙屎屙尿，但佢嘅便意同現實世界係完全分開，所以年中都有好多人因為連續玩太耐而瀨屎瀨尿，而家市面上仲可以買到專門俾玩家用嘅尿片。

遊戲有設立安全機制，如果裝置偵測到玩家暈咗，會自己解除佢同遊戲嘅連接同埋幫佢報警。

如果玩家係未成年，家長只需要喺官網入返裝置嘅安全代碼，就可以解除遊戲同玩家嘅連接。