［搞笑］［打機］收錢幫人戒除網癮，幫到困咗喺遊戲世界: 六、來自蛇群嘅裝備

打贏佢一次唔難，但要連續殺到佢唔想再玩就好難。

雖然難度高，但為左完成任務，今次我地點都要頂硬上。
我、烏鴉同蛇仔明三個開左好耐會，查清楚晒有咩裝備可以完美反制龍王主要裝備既屬性。
另外，我地都花好多時間研究龍王戰鬥既模式。

係呢個環節，蛇仔明幫左大忙。

蛇仔明睇落粗粗魯魯，但佢既綜合實力排緊全server第五，同時佢係大型A級公會「Snake」既會長。





佢啲公會會員好快手準備好晒我地要用既裝備同武器，之後跑住咁送貨黎。
又細心咁交低一堆龍王係競技場既戰鬥片段、提醒我地各類注意事項。好難想像蛇仔文呢個咁粗獷既會長可以培養出咁優秀既部下。

本來裝備製作時間應該要更長，但我哋蛇仔明嘅公會會址有一個好使好用嘅大熔爐。
呢個大熔爐係官方活動贈送嘅限定獎品，可以一次過鑄造三套裝備加三件武器，時間只需一個鐘。
當時個活動既勝出條件好簡單，到截止日期為止，人數最多既公會會自動勝出。

公會人數一向都不設上限，但好多公會都會有唔同既限制，因為每一位公會會員既能力都會直接影響到公會既評分。另外，有部分公會會設立實力以外既限制，例如會員角色一定要係精靈種、會員職業一定要係戰士等等。

蛇仔明開公會既時候冇設立任何限制，因為佢覺待打機就係要成班人開開心心、輕輕鬆鬆咁打。佢公會既綜合實力絕對唔算強，但勝在人數好多。





理所當然地，佢贏到呢個官方活動。

龍王嘅裝備屬性主要係火，我地一人收到一塊藍色薄膜，仔細一睇，薄膜可以貼合我哋自己本身護具形狀。
水屬性裝備缺點係物理防禦力較低，所以我地決定用返自己本身既裝備。
三塊膜可以將一層薄薄既水元素附加係護具上面，令到裝備對火屬性攻擊有一定抗性。

「一塊已經用500塊水系史萊姆皮，好野黎架。」蛇仔明對自己公會成員既傑作好滿意。

我地幾個人都已經有自己嘅慣用武器，我嘅係彎刀、烏鴉嘅大劍，而蛇仔明既武器就係一本魔法書。我同烏鴉喺刀刃位加左一層水屬性符文，搞到而家兩把刀都有可愛嘅小水滴圖案喺面。





而蛇仔明就純粹整左塊加強版水屬性書套，睇落成塊包書膠咁，佢話咁樣可以防止本魔法書俾龍王燒埋。

「我覺得自己把劍而家好花俏。」烏鴉對佢武器嘅新形象唔多滿意，我一於少理。

「乖啦，完成任務之後即刻幫你整走佢。」

時間有限，我地最後調查埋龍王既上線時間，決定聽日開始行動。