［搞笑］［打機］收錢幫人戒除網癮，幫到困咗喺遊戲世界: 八、紅玉

入到game，一行出尼斯湖，已經見到安全區人人都戴住鑲紅色玉石既華麗面具。

今日係一年一度既紅玉龍祭，早喺一星期前開始，安全區主要建築物同街道已經換咗主題裝飾，成條街都係跳緊舞或者同玩家玩緊小遊戲嘅NPC。

紅玉龍係遊戲既其中一隻傳說boss，每年只會重生一次，佢象徵住火焰嘅力量，擊殺之後會帶住佢嘅「龍魄」飛升。紅玉龍祭係Reality一年入面嘅重點活動，所以周圍都係慶典同小遊戲攤位，遊戲官方仲會送大量限量飾物俾玩家。

而紅玉龍祭嘅重頭戲係「紅玉圍獵」，狩獵對象就係紅玉龍。玩家們唔會分做唔同隊伍，將會全體一齊狩獵紅玉龍。

我知道龍王今日一定會出現，起碼一定會參加「紅玉圍獵」，因為呢個活動會跟玩家對boss造成傷害數量分配獎品，獎品主要都係用紅玉龍嘅遺骸，例如高攻擊力嘅龍爪、高防禦力嘅龍骨同提升生命值上限嘅龍心。以龍王嘅性格，佢一定好想分一杯羹，上年佢打唔到咩成績出嚟，今年佢一定會一雪前恥。





「紅玉圍獵」嘅場地旺火之森暫時被劃分為安全區，但系統將紅玉龍身邊30米內嘅範圍設定咗做戰鬥區域，就算前排玩家間打鬥都冇問題。

我喺安全區嘅集合點等蛇仔明同烏鴉。

但一個不速之客喺我面前坐低咗。

係龍王。

「仆街！竟然俾我喺度撞到你？」





按道理佢應該唔知我收咗佢媽咪錢入game打佢一身，點解會冇啦啦撩我嗌交？

「哥仔…你認錯人？」為咗唔好影響之後嘅任務，我極尷尬咁嘗試了解的同佢之間有咩牙齒印。

遠處嘅烏鴉同蛇仔明行開咗，喺部分Snake成員嘅護送中跟前方隊伍伍出發。

原來我同龍王早喺一年前見過一面。

當年我好好彩咁喺「紅玉圍獵」拎咗第二十名，拎到其中一塊龍骨做嘅左邊護膝。系統將呢個護膝做得非常好睇，上面鑲咗一粒紅色玉石仲要雕咗好複雜嘅龍紋。





雖然造型好靚，但防禦力比我其他裝備低，我嗰陣叫侍應NPC將佢放咗入尼斯湖做展品，收每個玩家五十遊戲幣入嚟一睹佢嘅風采。

咁啱龍王嗰陣在場。

而佢嘅排名係二十一。

佢好想要嘅裝備而家喺我餐廳舖緊塵。