［搞笑］［打機］收錢幫人戒除網癮，幫到困咗喺遊戲世界: 十六、放鬆心情

我同佢簡單交低娟姐交低嘅任務，即係我由娟姐派嚟嘅殺手，變成娟姐派嚟嘅保鑣，佢呆咗一呆。



「我仲以為佢唔再理我添。」佢除低頭盔苦笑一下，我哋先發現佢個角色設計本身係我地四個人入面最好睇，咁樣苦笑更加有種不羈美少年嘅感覺。可惜，我地三個都係異性戀男人，佢嘅美貌係唔可以迷惑我哋。



龍王本身想同娟姐報平安，但俾我叫停咗，因為我已經同娟姐咗我嘅視角，佢睇完啱啱嘅畫面即刻話要去拜神，求神保佑佢個寶貝仔。娟姐同我講，佢打算分散投資，走訪全香港出名靈嘅廟同埋多人去嘅教會，所以佢暫時應唔得閒。







我同娟姐分享左我嘅遊戲視角，即係由龍王俾龍打到一仆一碌，之後再趴喺泥地，娟姐全部都睇到。我諗娟姐都估唔到，佢有生之年竟然可以睇到佢個仔俾一條龍打到仆街，如果遊戲唔係出左事，我估佢會笑到標眼水。



「屌，好柒，算啦，大家而家咁熟，以後叫我朗仔啦。」龍王尷尬一笑，想同我地拉近關係。







「估唔到你竟然放低咁有型既大名唔用，真係可惜。」我都估唔到，烏鴉呢個時刻都選擇守護呢個MK名，精神可嘉。



呢個𡃁仔自來熟起嚟唔止厚面皮，幾乎係唔要面，朗仔放鬆返啲之後已經開心拎我哋啲乾糧嚟食。

我地決定喺森林稍作休息，同時向其他玩家收吓風。







因為玩家們就嚟俾紅玉龍逼到結界邊，好多人都選擇逃去旺炎之森各處。雖然咁樣有機會令全部人俾紅玉龍逐一擊破，但起碼唔會團滅先。



另外，冇參加到紅玉龍祭嘅玩家而家仲可以喺主城自由活動，佢地話發現唔到有咩重大變動，不過遊戲NPC多咗野講，同埋會四圍走。好在，我喺設計尼斯湖NPC既時候有詳細咁寫佢地嘅角色設定同性格，佢地俾我設計成唔會攻擊人類嘅獸人，照計唔會出咩差池。