［搞笑］［打機］收錢幫人戒除網癮，幫到困咗喺遊戲世界: 十八、共享筆記

喺分享共享筆記嗰陣，可以睇到自己所在區域有幾多人，已經死左嘅玩家唔會被計算在內。另外，我可以選擇分享筆記俾邊個睇，例如設立等級限制又或者鎖密碼，再進階啲嘅可以只俾自己公會嘅人睇。

喺呢個生死關頭，我決定要公開俾全部人睇。

玩家列表顯示旺炎之森仲有586位倖存者，以呢啲突發情況黎講，算係一個唔錯嘅數字。

㩒完發送之後，我叫朗仔確認多一次收唔收到，因為呢度得佢一個未加我好友，我想確保其他未加我好友嘅人都會收到。

共享筆記：一





時間緊急，如果你都係對遊戲設定瞭如指掌嘅玩家，可以無視呢篇筆記，但如果你唔熟悉，又冇咩方向嘅話，請你認真睇吓呢篇筆記。

第一、大家而家喺格爾帝國國境內嘅旺炎之森，旺炎之李外圍已經俾巫女用結界包圍住，唔好再做無謂嘗試去搵出口。

第二、有三種元素會令紅玉龍力量大增，分別係「光」、「火」同「熱」，換而言之，佢嘅力量喺夜晚會有一定程度下降。

第三、如果你身上有任何屠龍得黎既飾品，馬上掉左佢，因為龍對同類嘅氣息極度敏銳。

第四、如果不幸同龍近身接觸過，又有幸逃脫嘅話，一定一定要碌入泥漿，可以有效清走你身上嘅氣味。





第五、希望大家緊記遊戲入面有飢餓度設定，如果你長時間唔食野飲水嘅話，會影響你嘅生命值同各方面嘅數值，旺炎之森算係有比較多漿果同水源，大家可以留意一吓，但要注意唔好中毒。

第六、我地而家積極考慮緊要集體合作反攻紅玉龍，有興趣又有一定實力嘅人可以加我好友，大家一齊傾吓。



「得喇，收到喇。」朗仔反一反我白眼，之後加返我做好友，佢同我哋講，自已打機已嚟加過嘅朋友得三個，叫我哋好好珍惜。朗仔，多謝你嘅心意，你放心，我出返去之後應該會刪你呢個死𡃁仔嘅好友，廢事阻住你好友列表嘅空間。


佢講自己朋友人數嗰一瞬間，我睇到佢眼底係閃過幾分落幕，其實有邊個想自己一個打機咁孤獨，可能佢只係搵唔到好多夾嘅戰友。「我有個朋友都喺度，希望可以有命同佢一齊返出去。」朗仔有個朋友今日都有入嚟參加紅玉圍獵，聽講佢係補師嚟，個名仲要叫Angel。





聽完佢咁講，我即刻想像到龍王喺前面戰鬥，後面有個可愛女仔幫佢補血嘅畫面。

「你就好啦，有個小天使幫你補血，我都想要個小天使幫我補血～唉喲～」烏鴉同我諗法一樣，仲毫不留情咁開始恥笑笑朗仔，點知朗仔竟然冇嬲。

「當然好啦，Angel係我嘅最佳拍檔。」朗仔睇落好自豪嘅樣令我有少少後悔救咗佢，因為佢竟然敢喺我哋幾個單身寡佬面前炫耀自己有個可愛靚女補師拍檔。

我哋陣容其實都已經幾全面，蛇仔明係遠攻法師，我負責喺前排坦住，烏鴉同朗仔負責近距離攻擊。

唯獨欠一個全職補血嘅補師，蛇仔明再勁都冇可能一心二用，邊攻擊邊補血。

我哋三個都覺得將Angel加入隊伍會係一個好好嘅選擇，亦可以大大提高我哋嘅存活率，不過都要睇吓Angel而家有冇同人一隊。

朗仔見我哋咁樣，主動同Angel聯絡，問佢想唔想加入我哋嘅隊伍，好在佢就喺附近搵緊嘢食，仲要冇同人組隊。





「噢shit，咁就唔好要未來弟婦捱餓喇，我仲有好多乾糧可以分俾佢。」烏鴉聽到有可愛靚女喺附近，即刻熱情邀請佢快啲過嚟。

「我屌你個木嘴，啱啱叫你分一塊俾我食你都唔肯！」蛇仔明又開始同烏鴉嗌交，睇嚟我都係休息唔到。