［搞笑］［打機］收錢幫人戒除網癮，幫到困咗喺遊戲世界: 二十、曼陀羅

「你啱啱咪話搵緊嘢食嘅…我呢度有多…嘶…」蛇仔明本身講緊自己啲乾糧唔夠食，轉個頭已經同Angel分享緊。佢隨身孭住嗰個布袋本身一大半都係乾糧，拎完出嚟俾Angel之後，入面得返幾條。

「你俾晒佢咁滯，一陣你食咩？」烏鴉知道蛇仔明易肚餓，完全諗唔明佢點解要分咁多出去。

「我執吓漿果食咪得囉！我蜥蜴嚟㗎嘛！」蛇仔明一面不屑，屌返烏鴉轉頭。

「咁你記住記住唔好同我乞討，戇鳩仔。」烏鴉又反一反白眼。


「我點好意思要你咁多，啱啱天龍俾咗我㗎喇，你食啦。」Angel面上掛住佢嘅招牌笑容，呢吓婉拒反而令佢睇落更明事理，顯得喺隔離望住唔出聲嘅我哋好冷漠。





可能係我個人天生多疑敏感，就算朗仔同佢好熟，佢又救過蛇仔明，我都冇辦法百分百相信呢個突然彈出嚟嘅好好先生，不過，因為佢嘅治療魔法確係好高水平，我始終冇辦法反對佢加入我哋隊伍。

烏鴉同我諗法大致相同，佢私下問咗我三個問題，確認咗我不安感嘅來源。

「蛇仔明咁蠢咁冇腦就話諗唔到啫，咁撚高質嘅補師，紅玉圍獵點會冇人邀請佢一齊行？」

「如果有嘅話，遊戲異變之後，佢一個咁資深嘅全職補師明知自己好難一個人生存到，會咁笨柒自己離隊？」

「佢啱啱仲要話自己冇組緊隊咁口響，一定係講大話，問題係，咁佢本身啲隊友而家去咗邊？」





自從發現佢嘅白玫瑰唔係女人，烏鴉上咗腦嘅精蟲落返晒嚟，個腦好靈活咁運轉。

而家暫時冇事發生，為咗唔好破壞隊伍嘅和諧氣氛，我哋都只係敢默默觀察，以免打草驚蛇。

我希望係我哋以小人之心度君子之腹，如果唔係嘅話，我哋邀請佢入隊等同捉蟲入屎忽。

不過，電競隊時期嘅我都唔係一個好隊友，應該話連一個好人都唔算。