［搞笑］［打機］收錢幫人戒除網癮，幫到困咗喺遊戲世界: 三十、白痴

蛇仔明憑空變咗把大鐮刀出嚟，我俾佢拋窒咗，但又覺得Angel會阻止佢鳩衝，其實都唔太擔心。

正當我咁諗嗰陣，Angel非但冇阻止佢，仲要向佢點點頭，幫佢把鐮刀附魔，令攻擊帶有水屬性傷害。之後，Angel仲要同佢講加油，就好似一個望住個仔上戰場嘅老母咁樣。

以呢兩條友嘅戰力，我冇諗過佢哋會諗個咁嘅屎橋出嚟 ，我諗住叫烏鴉準備赴起身，過去支援。

佢只係叫我睇定啲先，唔好咁快諗住出手。

蛇仔明真係拎起把鐮刀就衝上去同近戰巫女打，佢著緊嘅裝甲同平時冇咩大分別，睇落完全唔似可以防到啲咩傷害。





佢嘅身法、佢嘅速度同佢嘅攻擊全部極之低質，十足一個初次上戰場嘅新兵。Snake嘅人以為自己大佬傷心過度，將自己嘅戰鬥風格通通拋諸腦後，點都要同對手背水一戰，用對手嘅武器嚟打到對手心服口服。

點止背水一戰，佢直頭係自殺式襲擊。先唔講佢打到成舊飯咁，淨係睇佢嗰把武器已經同對手冇得比。

複製武器魔法聽落好似好型咁，但其實就只係一個中等魔法，佢複製出嚟嘅武器，堅固程度只會係被複製武器嘅三成，而且並唔會有被複製武器嘅特殊效果。

平時佢得一個情況會用呢個魔法，就係佢想幫自己公會領地加啲裝飾品嗰陣，佢會嚟尼斯湖複製一堆我收藏嘅武器。

佢拎住呢件破銅爛鐵，再加上佢嘅劣質近戰打法，我覺得佢似係冇得救，因為佢避巫女嘅攻擊已經相當吃力，有好幾下佢差啲俾巫女斬到，好在有Angel幫佢防住。