(亂寫的) 短篇小故事: 短篇 83 《即棄筷子》

短篇 83 《即棄筷子》

////// 9 Jan 2026

「我哋係一對㗎！點解啲人要夾硬分開我哋？」右邊喊住同左邊講：「我哋做錯咗啲咩？」

「唔怕㗎，一陣就冇事。」左邊緊緊貼住右邊，竹身微微發熱，默默咁安慰住佢。

「我唔制呀⋯⋯我哋同一日出廠，同一日嚟到呢個屋企⋯⋯點解要分開我哋？」右邊已經喊到泣不成聲：「啲人最後都只係會掉走我哋！不如而家就掉走我哋啦！」





「我哋會喺同一個膠袋入面，一齊去垃圾桶、一齊去堆填區。」左邊都知道呢個殘酷嘅事實，但係佢都好堅定咁含淚話：「無論係點，我哋都會喺埋一齊！」

「左左，我唔捨得你⋯⋯」

「右右，我都係⋯⋯」

「啪」一聲，佢哋分開咗。斷口嗰度，細碎嘅竹纖維微微散開，就似佢哋眼淚一樣，喺空中漂浮，然後消失。

最後，佢哋都喺膠袋入面，拼命咁痴返埋一齊，帶住傷痕累累，一齊去到神秘嘅國度。





完。

——