(亂寫的) 短篇小故事: 短篇 86 《當狼愛上羊》

短篇 86 《當狼愛上羊》

題目：如題
字數：300字以上

////// 13 Jan 2026

我係一隻狼，住喺山上面嘅森林。

半年前，哥哥同爸媽嗌咗場大交，然後，哥哥就好耐都冇返過嚟狼群。我問爸媽，佢哋都好嬲咁，話當冇生過呢隻狼。





其實我諗嚟諗去，都唔明點解哥哥會一走了之，明明佢係咁鍾意呢個屋企，明明佢係咁照顧我哋，有咩食捉返嚟，都一定畀我哋食先。

所以我決定落山搵佢。

行咗兩日，沿途都冇咩動物可以食，淨係食咗啲兔仔、松鼠，用嚟攝牙罅。好肚餓呀⋯⋯有冇啲大隻啲嘅畀我食呀？

我拖住疲累嘅身軀，想行到去溪邊捉魚食。就喺呢個時候，我面前有一隻小綿羊出現咗！我擦擦眼睛，確定冇睇錯！

我靜雞雞咁行埋去，睇準時機撲上手，美味嘅晚餐就有著落喇！





我用輕盈嘅狼步，巧妙咁避開啲樹枝，去到小綿羊嘅身後。小綿羊身上有陣羊酥味，真係令我口水分泌激增！

但係聞聞吓唔對路，好似有啲血腥味，同埋，我聽到佢喺度⋯⋯喊？

我轉個角度，望真啲。佢跪咗喺地上面，表情好痛苦，屁股嗰度，有啲嘢出緊嚟。嗰陣血腥味混住羊酥味，直衝我嗅覺。我想衝過去，食咗佢哋！

佢突然抬頭見到我，但係佢一啲都唔驚，仲面露笑容：「係咪小爪叫你嚟㗎？」

我呆住咗，百思不得其解：「吓？小爪？」小爪係我哥哥嘅乳名，除咗屋企人可以咁叫佢之外，連佢啲兄弟都可以咁叫佢。





佢收起笑容，痛苦個表情又再現，口都震埋：「你⋯⋯唔好過嚟⋯⋯」

我行咗兩步，突然被一隻動物撞開咗：「呀！」我碌咗幾個圈先停喺度，抬頭一看，哥哥齜起狼牙對我，發出低沉嘅狼叫。

「哥⋯⋯」哥哥好似瘦咗好多，發生過咩事？

哥哥見到係我，慢慢放低警戒：「小齒⋯⋯」

我同哥哥狼眼對狼眼，我哋冇講咩。哥哥好似突然記起啲咩咁，即刻轉身去小綿羊嘅身邊，幫佢舔屁股傷口，好溫柔咁同佢講：「忍耐一陣，寶寶會冇事嘅。」

剎那間，我明白點解佢由嗰日開始，離開咗狼群。原來，佢要同小綿羊私奔。原本我真係好肚餓，好想食咗小綿羊，但係我知道佢係家人嚟，所以食佢嘅慾望瞬間消失。如我食佢嘅話，就好似食咗哥哥咁。

「哥⋯⋯」





「小齒，我想要多啲長草，你會唔會幫我？」哥哥望住我嘅眼神，我從未見過。佢喺小綿羊面前扮到好鎮定咁，其實我知道佢好彷徨。

我即刻走去頭先經過嘅矮木叢林，用最快嘅速度收集好多長草，飛奔返去哥哥度。如是者，走咗幾轉，啲草已經多到形成咗一個好舒服嘅軟墊。

小寶寶順利出世喇！我見到哥哥好開心咁，抱住小寶寶，同小綿羊kiss kiss，睇到我有啲眼冤，同時又睇到我好心酸。

我抱咗一陣小寶寶，好香嘅羊酥味，仲帶有啲狼味。佢細細粒，暖笠笠，眼睛仲未開，就已經發出細細嘅「咩咩」聲，好得意。

哥哥同小綿羊望住我，一模一樣嘅溫柔眼神：「多謝你，小齒。」

同小綿羊第一次見面，佢就叫我個乳名，真係聽到我打冷震。不過見到佢哋咁幸福，我都放心晒。

我將小寶寶交返畀哥哥：「唔怪得你咁瘦啦，呢邊咁少嘢食。」

「呢度咩都冇，咪幾好。」哥哥黯然咗一下：「唔想行近森林，費事畀人知我哋喺呢度。」





我輕輕一笑：「咁我得閒嚟探你啦，帶啲好嘢畀你食。」

「唔使喇，幫我睇住屋企就好。」

我同哥哥互相摩擦一下頭部，輕咬突出嘅嘴巴。

然後我就離開了。

臨上山前，我向住小溪嘅方向，細細聲長叫一聲：「嗷嗚——」

隔咗一陣，聽到哥哥嘅「嗷嗚——」回應。

我微笑。期待有一日，會聽到小寶寶嘅吼叫。





——