人生如夢 — 奇夢/奇事分享: 奇事分享《二》

大家好，我叫阿力。

上回提及到我外婆幫我拎返本筆記一事，其實都算係小事一樁。嗰陣我地一家都當自己係比「鬼遮眼」。 呢件事之後， 有唔同大大小小嘅怪事發生，仲差啲搞到我冇咗條命。俗語話：「小病是福。」我本身自己都係成日病嘅人，喺舊屋八年間睇醫生多過我食飯（因為我唔鍾意食飯哈哈！）初頭我以為文憑試嘅壓力搞到身體愈黎愈差。 由最初食完海鮮會成身出紅疹，到最後食啲乜野都敏感出疹，每晚都痕到訓唔到。睇好多次醫生，但無論係中醫定西醫，都冇一個幫到我。個陣我自己嘅情緒都好崩潰，每一日都對住屋企神枱啲佛像求佢哋保佑我快啲好返。

直到有一日， 我趁小息期間喺班房食咗份碎蛋三文治，食完大概15分鐘，我行返去自己位嗰陣覺得抖唔到氣，然後突然之間「呯」一聲暈低咗，完全冇曬意識。同學之後同返我講，佢地叫極我、拍極我都冇反應。 有一個識急救嘅同學即刻叫其他人報警，然後佢幫我急救。 嗰陣大家都好驚因為唔知發生咩事， 同學話返我知當時我呼吸好急，佢知道我有食物敏感，所以估我應該係食物敏感搞到氣管腫脹抖唔到氣唔夠血上個腦到暈咗。

喺我昏迷不醒嘅時候，我夢到自己身處喺一間全白色嘅房，房中間有張長櫈， 我外婆坐咗喺個到，揮手叫我坐喺佢隔離。當時我知道外婆已經走咗幾年，所以估到我現實中應該喺係一個彌留狀態。 喺佢隔離所有野都好平靜，彷彿時間停止轉動。老實講我都幾享受同佢一齊喺呢間房入面嘅時光，因為佢離開個日我考緊試送唔到佢，見唔到佢最後一面。呢件事一直擺咗喺我心入面難以放下。

我哋喺長櫈講咗好多野，係到講屋企人啲近況。唔知講咗幾耐，外婆冇啦啦企起身，語重心長講：「夠鐘啦阿力！ 你喺時候要走啦。」





我答： 「我都未同你傾夠，咁快就要走？」

外婆就話：「我不嬲都覺得咁多粒孫你係最醒嗰一個，你冇理由唔知呢到唔屬於你。」

我：「我知，但我好辛苦啊，每晚都痕到訓唔到。 如果要我繼續咁樣落去，我同你一齊做鬼仲好啦。」

外婆：「唉！有啲野我唔可以同你講，亦都解釋唔到比你聽，但你唔屬於呢到嫁。 人生有好多野你都避免唔到，我亦都幫唔到你幾多次。 乖啦，快啲返去啦，你爸媽好擔心你啊。」

到我有意識嘅時候原來已經係醫院訓咗一日。一出院返屋企，我媽叫我跨過火盆先好入屋，仲要用碌柚葉沖幾日涼。 聽返我屋企人講，我昏迷個陣佢地搵高人問我個魂魄去咗邊到，嗰高人同我媽講，我有祖先睇住冇走到，如無意外應該過到呢關。但係高人好凝重咁同我屋企人講舊屋嗰到有幾個惡靈想拎走我條命，依家有祖先幫手頂住但頂唔到幾耐，建議我地盡快搬屋，因為來者不善，請唔到佢地走。當然搬屋唔係你話搬到就搬到啦，呢件事完咗之後，我屋企人都馬上開始物色其他地方搬，舊屋啲惡靈知道我地籌備緊搬屋後，開始變本加厲。間屋啲電器逐一逐一咁壞，屋企人又開始行衰運，頭頭踫著黑。雖然我醒返出咗院，但我嘅身體好似唔識好返咁，成日都發燒、頭暈又出疹，有時連學都返唔到。事隔一個月後都未搵到樓搬，但個段時間啲惡靈開始現身，佢哋仲同我講野。到底啲惡靈係邊個同埋點解想整死我？





由於太長，想知事件後續，請留意下回分解～