返去兩年前就真係會有用咩？: 第二章-回到過去？

我突然之間醒咗，印象中自己好似俾閃電劈中咗，之後嘅嘢就唔係好記得。「you’re on the phone with your girlfriend,she’s upset…」突然之間聽到呢首歌我就知道係時候起身。我望一望部手機，仆街咁細部嘅，屌呀iPhone8！我二年前一早轉左11啦喎！我開一開個日曆嚟睇，屌呀2021年2月23日。唔係掛我穿越咗返去兩年前？呢啲咁嘅劇情唔係電影先會發生嘅咩？咪住2021年2月，咁咪即係我同阿穎開始frd嗰陣。我望一望個時間7:58分，咦咪即係準備上網課！「good morning students 」一個學校app嘅message彈咗出嚟，果然如此我真係返咗嚟。
我再打開WhatsApp 望到一個我好耐冇見過嘅名「阿穎」有一個message「你醒咗未啊？」我唔小心流咗幾滴眼淚。之後即刻覆佢「啱啱醒」之後佢就send「你記得聽日打波㗎呵？」打波？有咁嘅事咩？咪住，係喎約咗佢去我會所打乒乓波。我記得嗰次係佢話佢識打乒乓波，之後我約佢話切磋吓所以就去我度打，不過原來佢連波都唔識開，而嗰陣嘅我太過on9笑得過火左，令佢之後都唔想同我打，亦都搞到我之後冇再試過成功單獨約到佢出嚟，不過嗰次作為第一次同佢單獨出去玩都真係幾深刻。我記返起之後即刻覆佢話「記得呀記得呀！3:00xx等啦，我再接你去我嗰度」之後佢就覆我「ok」
傾完之後，啱啱好上網課，其實都冇乜邊個真係會認真聽書，始終冇老師睇住大部份人都係打下機傾吓電話就算，當然我都唔例外，我一直同阿穎message，令我諗返起唔少兩年前嘅嘢。嗰陣我成日唔小心激嬲咗佢之後又唔係好識氹佢，搞到成日令佢唔開心。我成日都喺度諗，如果我當初冇成日激嬲佢會唔會就已經一齊咗呢？「上完堂打機好唔好？」傾傾下我問佢，之後佢話「好」不過其實我問嚟都廢，嗰陣根本就日日都會同佢玩。
好快就上完堂，之後我就同佢玩一隻食雞生存遊戲，玩完之後又傾咗四五個鐘電話。傾到八點嘅時候佢要食飯，所以就cut咗線。之後我突然之間醒起嗰陣嘅我仲未識得彈琴，錄首自彈自唱俾佢嚇下佢都好。之後我就打開部琴錄咗一首陳奕迅嘅「綿綿」然後就send咗俾佢，至於點解係陳奕迅嘅呢首歌就係因為我同佢都好鍾意陳奕迅，而呢一首歌係我呢兩年練最多嘅歌，因為每次唱嘅時候就好似諗返起佢咁。果然佢聽到之後係咁send 「omg」然後仲話「你幾時識彈琴㗎？仲要係自彈自唱，點解之前都唔知嘅？同埋點解你唱歌突然好咗咁多㗎」睇到佢咁講我都不自覺咁留咗眼淚，因為證明咗呢兩年我嘅努力冇白費到。佢係一個有學唱歌嘅人，嗰陣好鍾意聽佢唱歌，但我就淨係識得玩第二種樂器，之後想幫佢伴奏所以好想學鋼琴，但係我屋企人要我考咗舊嘅樂器八級先，但係當我可以學鋼琴嘅時候我已經冇同阿穎再傾偈，就算我學識咗伴奏彈琴，甚至係自彈自唱都已經冇用，但係都算係幫我搵咗一個我好沉迷嘅興趣，唔係佢嘅話我都唔會變返咁鍾意音樂，仲要識到而家嘅朋友同埋係咁練唱歌。之後臨瞓之前我同佢再傾多次電話傾到兩三點，我都有喺佢面前再自彈自唱過。