[GL] 重遇之後: 09

Tracy：今日lunch食咩
我：今日食海南雞
Tracy：咁好餸？有無相睇
我拿起手機對準眼前餐點，拍了一張照片。點回照片檢查時，發現螢幕上方出現一隻握著筷子的手。我轉而把目光投向一臉吃得津津有味的Susan，不滿地說道：
「你隻偷雞賊，比返舊雞我。」語畢我從Susan的碟子夾回一塊雞。
「你望住部電話都夠飽啦~唔好嘥咗碟飯~」
「我無話我唔食。」
Susan仍然不滿地嘟嘴抱怨道：「Jane，你再係咁我真係唔理你㗎啦！」
「好喇，Sorry囉，覆埋呢句唔覆。」我把剛剛拍的照片發給Tracy，關掉手機屏幕專心吃飯。
「而家啲後生女都重色輕友，有仔萬事足……唉！真係世風日下！」




「又屈我拍拖…」
「你呃得到邊個！？淨係你最近個look都已經出賣咗你啦！」
「咩意思？」
「你把頭髮呀！」
「吓？我頭髮？咪同平時一樣…」我摸了摸自己的低馬尾，不解地問道。
「我唔係講今日，係講你最近總有啲日子無紮辮返工！」
「…轉下look都唔得？」
「Jane…你唔好以為可以逃得過我法眼！我觀察咗你一排，自從你個WhatsApp對象出現後，隔咗無幾耐你就開始轉look！」Susan以筷子尖端指著我，她瞇起眼睛，滿臉懷疑地直盯著我看。
「你諗太多…我只係嗰日要同friend出街先唔紮辮。」
「真係淨係咁？」




「仲可以有啲咩？我只係因為難得可以同friend食餐飯放鬆下，唔想成個頹樣咁企埋佢隔離姐，費事嚇親人。」我伸手撥開Susan指著我的筷子，以下巴指了指她的碟子問道：「你仲食唔食碟嘢？你唔食我幫你食埋佢㗎啦。」
「OKOK，你話係就係啦~之但係你長頭髮又幾好睇喎，同紮辮嗰時兩個feel！」
「有咩唔同呀？」
「嗯…多咗份仙氣？」
「再唔快啲食，陣間晏咗返公司啲嘢做唔切就真係升仙啦。」
「照咁睇你情人節實有著落啦？」Susan吃了幾口飯後又再好奇問道。
「邊有…你覺得我哋公司有比過私人時間我哋去找尋幸福咩？」
「……你啱。」
此時WhatsApp的訊息提示聲又再度響起。
Tracy：做乜有對神秘筷子




我：有人趁住我影相時偷雞
Tracy：哈哈
Tracy：係啦，上次同你講想試嗰間餐廳
Tracy：下個禮拜你得唔得？
Tracy：不過嗰日咁啱14號，你O唔OK？
我點開手機日曆，確認那天還未有加入任何行程。最近的工作也不算非常忙碌……應該可以吧。
我：14號？OK呀
……嗯？等等。
14號……？
「啊。」
我發了訊息後，才猛然想起14號是什麼日子。