[GL] 重遇之後: 12—上

「凍唔凍？使唔使我借件褸比你？」
「嘻嘻，今次有著夠衫，夠晒暖。」
「OK，最緊要夠衫。」
「你好體貼，就算我無話凍，你都會主動問我夠唔夠暖。」
「梗係，我不嬲對friend都好好嘅~」
吃過晚飯後，我們到了維園散步，走到累了，便坐在面對模型船池的長椅稍作休息。我呆呆望著坐在池邊的一對情侶，女生滿足地看著男生送的玫瑰花束，男生也以充滿愛意的眼神看著女生。看著他們臉上那副幸福的表情，我心裡也開始感到些許羨慕。
「周街都係情侶，搞到我都好想有個膊頭比我挨下！」Tracy似是跟我有著同樣的想法，她轉過頭來問道：「我可唔可以借你個膊頭？」
語畢，她沒有等我回答，便把頭靠在我的肩膀上。我沒好氣地說：「你都已經枕咗落嚟，仲問嚟做乜？」
「嘻嘻，又係喎。」過了一會兒，她不經意地說：「你個頭好香。」
「係咪頭先食嘢啲油煙味？」我不解地問道。




「油煙味邊係香味！同我哋頭先又唔係食韓燒嗰啲點會有呢啲味！」她靠近我的耳朵，嗅了嗅散落在旁邊的頭髮，輕聲呢喃道：「…係洗頭水味，好香。」
「哦、哦……」
我不知該如何反應，只好默默坐著。Tracy再度把頭倚在我肩上，問道：「係啦，你有無試過同人一齊過個情人節？」
「……無呀。」
「真係？你咁靚，點會無人追呀。」
「我邊度靚…平時返工都係求其梳下個頭就出街，點會有人吼。」
「咁只係因為你做嘢太忙無時間打扮姐。你一啲都唔差喇~」
「不過而家都好難有對象，出嚟做嘢後都好難識到人。」
「公司無合眼緣嘅人？」
「我唔想公私都要同呢個鬼地方扯上關係…」




Tracy聽畢哈哈笑了出來，她又好奇問道：「咁以前讀書嗰陣呢？讀書嗰陣識人都易啲，應該會多啲機會啦啩。」
「讀書嗰陣都係同friend一齊多，我本身真係好少遇到呢啲嘢。你呢？」
「嗯？」
「有無試過同人過情人節？」這次換我問道。
「唔……中學嗰時有。」
「嗰時你哋係點過？做咗啲咩？」
「咁耐嘅事我都已經唔太記得。不過我記得都有嚟過呢度。」
「睇嚟維園真係情侶之間嘅回憶勝地。」
「回憶勝地又唔係只適用於情侶嘅，我今晚同你一齊都覺得好開心呀。」
她微微抬起頭，對我嫣然一笑。被她那雙在黑夜下閃爍的眼睛吸引，我有點心不在焉地問道：「同我？」




「嗯，你唔開心？」她調皮地問道。
「開心，不過呢個特別日子，朋友唔會比得上情人。」
「我覺得兩個人係咩關係並唔重要。」Tracy又把頭靠回我肩上，續道：「我覺得最重要嘅係，你想同咩人一齊過。就算對方只係朋友，但如果你係真心想同佢一齊渡過呢個特別日子，情人呢個名份係唔會比得上。」
我們彼此再沒有說話，她只是靜靜地倚著我，我則是靜靜地被她倚著。​​​​​​​