[GL] 重遇之後: 26

「Tracy，我……」
回過頭去，想著該怎樣回答挽留我的女生時，Sam首先開口道：「我去前面等早餐，企呢邊驚聽唔到入面嗌。」
他說完走到店門旁邊，剩下我跟Tracy留在原地。
「你趕唔趕住返工？」放開我的衣袖，旁邊女生有點遲疑地問道。
「……唔趕。」
她點了點頭，露出一個靦腆的微笑，隨即又皺起眉頭，稍稍靠近我的臉，神情疑惑地問：「你黑眼圈好深，最近唔夠瞓？」
突然拉近的距離使內心怦然一跳，「嗯。呢、呢排瞓得唔係咁好。」
「點解？好多OT？」
「 唔係。」
「咁係因為壓力？定係又有嘢煩？」




「……因為你囉。仲好意思問。」我撇嘴抱怨道，剛才還在關心我的女生似是猜到話中之意，難為情地移開眼神，以指尖搔了搔臉頰。我微微彎起嘴角觀察她這副失了方寸的模樣，仔細一看，塗上淡妝的臉也帶著一絲倦容。
「你面色都唔係咁好喎。」
「因為我同你一樣，最近都瞓唔著。一闔埋眼，就諗起野餐嗰日發生嘅嘢……」她垂下頭，羞澀地說道。「Jane，我真係好開心，你無拒絕我嘅感情，我哋仍然可以企喺對方隔離。」
「嗯、嗯……」感到兩頰燙得厲害，我連忙別過頭望向四周，等待早餐的Sam正低頭滑著手機。突然想起Susan曾經說過，在某天遇見Tracy跟一個男生一起買早餐。我不經意地問道：「你哋成日都嚟呢間嘢買早餐㗎？」
「唔係呀，只係咁啱今日想食呢間。」
「你平時……都會約埋嗰個男仔一齊買嘅？」
「我哋無約埋呀，只係咁啱喺附近撞到，又食埋同一間先會一齊買。」
「哦……不過我睇你哋好似都幾熟咁，你又話同啲同事唔係咁close嘅。」
「嘻嘻，你呷醋？」
「我先無呷醋，你諗太多。」避開窺探這邊表情的眼神，我故作平靜地說道。




「佢係呢排入職嘅新人嚟，我負責教佢嘢，所以先多咗交流。呢個位近巴士站同地鐵站，大家平時又係差唔多時間到呢頭，我哋真係咁啱撞到先會一齊買嘢食。其實都只係試過幾次，你唔鍾意嘅話，我以後唔同佢一齊。」
「佢係你同事，又唔係我同事，你同咩人一齊係你自由。況且我都無話過唔鍾意，只係好奇問下。」
「嘻嘻，你好可愛。」
「吓！？你邊個位得出我『可愛』呢個結論！？」我不滿地回嘴道。
明明這邊是在發怒，旁邊女生卻在看到我的反應後，嘴角更是向上揚，一副在忍笑的樣子。「好啦，你唔使擔心，我個心淨係得你一個㗎咋。一係咁，我哋由聽日開始約埋一齊買早餐，咁我又可以日日見到你，你又唔使有不必要嘅擔心！」
「咁咪姐係要我特登早起身？唔制喎。」
她笑了笑，然後又說：「Jane，等你忙完，我哋再約出嚟吖。成個禮拜無見……我好掛住你。」
對方突如其來拋來一句，我在內心慌了起來，吞吞吐吐地問：「嗯、嗯……你、你想去邊？」
「可以食飯、行街、睇戲……做咩都得。或者再去野餐都好呀，延續上次幸福嘅回憶。同你一齊嘅話，去邊都咁開心。」Tracy露出兩個酒窩，笑得甜膩。
「OK，咁再約。」我故意裝作聽不見最後那句，淡淡回道。現在的我……還未適應對方那些直白的情話。




「好啦，前輩，甜蜜嘅時間結束啦！」這時，提著塑膠袋的Sam往這邊走來，對著Tracy說道：「係咪叉足電，有返晒精神啦？咁今日就要好好努力，唔好再犯埋啲無謂小錯啦！」
「你身為後輩竟然夠膽教訓前輩，信唔信我今日比多啲嘢你做，得你無得放工吖嗱？」
「我咁識做幫你製造獨處機會，你咁報答我呢個可愛嘅後輩？」
聽到他的話，我頓時於內心浮現問號。我怎麼覺得……他好像知道什麼似的？
就在我疑惑之時，Tracy朝我說道：「Jane，咁我晏啲再搵你。」
「好，比心機返工。」
她笑了笑，對我揮手作別。臨走前，她似是想起什麼似的，一隻手搭在我的肩上，緩緩把臉哄過來，在耳邊細語道：
「我好期待，我哋第一個約會。」
語畢，她往前走了幾步，然後又回過頭來，彎起眼睛，對我嫣然一笑。