【愛情】如地下情一樣嘅癮，係我對你嘅定義: 22. 壞人

「你報唔報名？」黎昕淇跟喺陸修然身後行入𨋢，手上拎住一包新鮮出爐嘅雞蛋仔，「班際籃球。」

「你又唔係同我一班。」陸修然靠住牆企，同黎昕淇係L字型咁企，「我報唔報同你好似冇咩大關係。」

「我就係隨口問下你嘛。」黎昕淇摵咗一粒雞蛋仔放入口，蛋香濃郁加上新鮮出爐更加好食

「贏咗除咗有張獎狀可以貼喺課室之外都冇用大作用。」陸修然挑剔咗一句，都唔記得咗自己就係當初話跟番以前用獎狀就可以嘅人，「所以，我報嚟做咩？贏咗又冇好處。」

「玩下嘛。」黎昕淇摵咗一粒雞蛋仔放到陸修然嘅嘴前，眼見陸修然冇食，黎昕淇收手，將雞蛋仔擺入自己嘅口中，「唔食就算，但你真係唔去呀？」





陸修然捉起黎昕淇嘅手，將快要掂到黎昕淇嘅唇邊嘅雞蛋仔放到自己口中，黎昕淇撅起嘴又摵一粒比自己食

陸修然將黎昕淇拉到自己面前，口中雞蛋仔嘅香味喺一瞬間變得更加濃烈，明明只係好普通咁喺嘴角輕吻一下

「你做咩係咁問我報唔報？陣間我嗰班對你嗰班點算？」陸修然側着頭有啲好奇咁問

「冇點算⋯」黎昕淇忽然覺得喉嚨有啲乾涸嘅感覺，吞口水都冇辦法滋潤一樣嘅感覺

陸修然覺得黎昕淇嘅反差好可愛，只要錫咗佢，佢就會由本來嘅小辣椒變成小貓一樣乖巧





「支持邊個好？」陸修然嘅餘光瞄到樓層已經到咗黎昕淇屋企所在嘅樓層，「不過，我都係唔會報，你到啦。」

𨋢門緩緩打開，喺沉默半秒之後拉住陸修然行咗出𨋢，捉住陸修然嘅呔，用咗好少嘅力就將陸修然向下拉向自己

「你太奸茅⋯」黎昕淇嘅語氣略帶點不滿咁抱怨道

「我？」陸修然嘅微笑帶住一絲玩味，但嘴角上揚嘅弧度喺下一秒收細，「但，如果係其他人，唔好咁輕易比佢錫到，壞人有太多⋯」

「你咪嗰個壞人⋯」黎昕淇輕哼一聲，將臉稍微撇開，似乎又逐步咁變番小辣椒





「咁你又咁輕易比我錫到你？」陸修然覺得好笑，不慌不忙咁反問黎昕淇，畢竟佢嘅腦袋轉得快

黎昕淇抬眼望住佢一臉囂張得逞嘅笑容，忽然間無言以對，好似答咩都唔太啱，即刻有種比陸修然套路嘅感覺

「要企喺門口幾耐？你唔番去？」陸修然朝黎昕淇嘅屋企門口抬一抬下巴，「陣間比人見到。」

「一梯四戶，隔離屋都番晒工，比邊個見到？有鬼？」黎昕淇反問陸修然，然後轉身行去開門，手仍然捉住陸修然嘅校呔，明明陸修然已經跟住佢行

黎昕淇一打開屋企嘅啡黑色大木門，已經有兩隻毛茸茸嘅物體喺門口嘅鞋櫃面上面坐，陸修然經過嘅時候，佢地即刻好奇咁湊上前聞一聞

「沙～咚、咚—」黎昕淇拎住一盒貓糧行到貓飯碗前倒咗一大羹，兩隻貓聽到動靜即刻從鞋櫃面跳落嚟跑到飯碗前

黎昕淇捉住陸修然嚟陪佢做功課，兩人坐喺餐枱前，貓坐喺牆上面嘅木板跳架上好似監督一樣望住

「牛奶你擋住我啦。」黎昕淇將行到佢面前踩住佢份功課嘅黑色抱開





牛奶比人抱開咗之後冇固執咁留喺同一個位，而係踩住高傲嘅貓步行到陸修然隔離坐低

陸修然冇受影響，拎住筆繼續做功課，黎昕淇坐喺對面安靜咁望住陸修然，稍微將佢打量一下

黎昕淇悄然伸手摸陸修然嘅頭，本來專心致志嘅陸修然一頓，緩緩抬起頭，伸手捉住黎昕淇嘅手腕將佢嘅手從自己嘅頭頂移開

牛奶忽然起身，匍匐前進爬近陸修然，用頭蹭一下佢嘅臉頰，然後又蹭一下佢嘅下巴，陸修然彎低腰將下巴靠喺牛奶嘅頭頂

「好可愛～」黎昕淇第一時間拎手機影咗張相

牛奶忽然一頓，然後一個側頭，用臉頰蹭陸修然嘅臉頰，黎昕淇心入面又羨慕又妒忌，因為牛奶從來唔會咁樣嗲佢

「你唔怕比人睇到？」陸修然見黎昕淇喺度睇相，佢都唔知黎昕淇影咗幾多張，但應該兩種狀況都有影低





「手機有密碼，唔會有人拎到我手機開到嚟睇啦。」黎昕淇目不轉睛咁睇相，比原況相可愛到笑出嚟，「我drop番比你呀。」

陸修然將自己嘅手機直接放到黎昕淇面前，黎昕淇冇顧忌太多，直接拎起陸修然嘅手機入密碼，打開手機嘅藍芽，將相drop到陸修然嘅手機，親手㩒咗接收，確定陸修然係收到，一番操作行雲流水

「Okay啦。」黎昕淇嘅將手機放番喺陸修然嘅筆袋上面

「你點解會知我密碼？」陸修然坐好起嚟，本來匍匐着嘅牛奶起身，輕輕一躍跳到地面

「之前睇到，加上有一次你嫌麻煩唔肯起身睇手機message，叫我幫你開手機睇，你講咗比我聽。」黎昕淇側着頭，回想一下當中嘅原因

「突然覺得私隱度好低。」陸修然托住下巴，有少少苦惱咁拎起手機

「你都知我手機密碼，我都未話私隱度低⋯」黎昕淇無奈咁反咗個白眼

黎昕淇自己都諗唔明，佢同陸修然點解會知道對方嘅手機密碼，手機係最多個人私隱嘅地方，拎住對方嘅密碼代表可以將對方嘅私隱一覽無遺





互相知道對方嘅手機密碼，唔係應該係一件好親密嘅事⋯？將自己嘅秘密都比對方知道，到底係好事定唔好事？

「點解會存在咁奇怪嘅關係⋯？」黎昕淇定睛凝視住陸修然，不禁喺心入面問自己，「好奇怪⋯人地問起嘅話連要點樣形容都唔知道⋯」

黎昕淇垂眸，指尖因為混亂嘅思緒而一直輕扣住，佢諗唔通亦諗唔明，其他人問嘅話佢要點樣答？

稱唔上討厭但亦唔係中意，唔算係好熟但又唔係陌生人，講係癮但好似又唔係真係100%係

「佢平時係抱住咩心態錫我⋯點解會咁難諗，我同佢明明曾經都係0到100咁簡單嘅問題，但點解今日會咁奇怪⋯？」黎昕淇嘅腦海中浮現一個新問題，但呢個問題只係令佢嘅煩惱倍增，一開口就係抱怨：「好煩呀！」

「咩好煩？」陸修然比佢突然嘅嗌嚇咗一跳，本來已經瞓著咗嘅牛奶同芝麻都即刻醒咗

「你呀陸修然！」黎昕淇不悅咁對陸修然道





「我咩都冇講⋯」陸修然面對莫名其妙嘅抱怨感到無奈同時都有啲習慣

黎昕淇起身行到梳化坐低，陸修然默默咁坐喺佢隔離，本來頹廢咁頹住櫈背坐嘅黎昕淇喺陸修然坐低之後又坐番好




IG Link: https://www.instagram.com/nd_cotttoncandy/?hl=zh-tw