【愛情】如地下情一樣嘅癮，係我對你嘅定義: 32. 香水
「冇女仔，我平時出街都會噴⋯」陸修然有啲無奈，咁樣都可以聯想到同女仔有關，佢真係佩服佢嘅聯想力，「只係見你嘅時候唔係番學就係喺屋企，我噴嚟做咩？」
「哦。」黎昕淇微微點頭，仔細一諗，佢同陸修然真係唔會單獨出街，所以又好正常，「呢隻味好香，好啱你。」
「多謝，第一次聽到你毫不吝嗇嘅讚賞。」陸修然聽到黎昕淇嘅讚賞就嘴角上揚，佢當然會照單全收
「唔洗⋯」黎昕淇有啲攰咁打咗個喊露，「搞到我都想買多支香水⋯」
「你平時番工噴香水㗎咩？」陸修然下意識一樣一秒皺起眉頭望向黎昕淇，語氣帶住少許嘅嫌棄又道：「番炸雞店噴咩香水？」
「唔係呀⋯」黎昕淇搖搖頭，對陸修然嘅態度有啲愕然，下一秒即刻收起愕然嘅表情，輕皺起眉頭反問：「我又冇話我係番工噴。」
「我只係順口問下。」陸修然推門口等黎昕淇先入去，果然就算再攰，黎昕淇嘅小辣椒脾氣都喺度
「哦。」黎昕淇行喺前面，直到彎腰去到搭𨋢大堂先轉身望陸修然一眼
「你又嬲。」陸修然探頭望黎昕淇，佢對黎昕淇嘅脾氣都已經習以為常
「冇，只係攰⋯」黎昕淇搖搖頭，喺𨋢門打開嘅時候都拖住腳步入去
陸修然習慣性咁企喺一邊靠住扶手同牆，黎昕淇企喺陸修然隔離微微耷低頭，微側住嘅頭啱啱好可以靠喺陸修然嘅膊頭上
𨋢內嘅四面都係鏡，陸修然望住對面嘅鏡嘅反射，望住鏡中嘅黎昕淇，陸修然嘅心底裏有種鬆一口氣嘅感覺
「你到啦。」喺𨋢差唔多到黎昕淇住嘅樓層嘅時候，陸修然將佢叫醒咗
「嗯⋯」黎昕淇企好，回一回神，喺𨋢門打開嘅時候回頭望咗陸修然一眼，「拜拜⋯」
「拜拜。」陸修然目送黎昕淇行出𨋢，由得𨋢門自己閂埋
黎昕淇番到屋企之後拖住步伐番房，拎起居家服就去廁所沖涼，除衫嘅時候聞到衫嘅一邊有一陣香水嘅香味
「陸修然嘅香水味⋯」黎昕淇將沾到香味嘅一邊放到自己嘅鼻尖前
從鏡中望住自己嘅行為，黎昕淇自己都有啲不明所以，佢若有所思咁望咗件衫一眼，然後放到一邊嘅污衣籃中，指尖喺自己嘅唇上輕輕掃過
⋯
「你做咩突然叫我出嚟陪你睇香水？」宋楚妍跟喺黎昕淇身後，隨手拎起一支香水嘅sample，「心情咁好想買香水？」
「想睇下啫，突然想買下。」黎昕淇冇講出佢想買香水嘅真正原因，「搵你呢啲有眼光嘅人陪我一齊睇下揀下嘛～」
「多謝你讚我喎～」宋楚妍笑道，「但你之前都好少噴香水，你想要咩味？」
「唔知呀，所以咪叫你幫下眼。」黎昕淇見到感興趣嘅香味嘅時候會用試紙聞一聞噴出嚟嘅味道
「你做咩突然扮靚嘅？啱啱又買咗唇膏，然後又拉我一齊買香水。」宋楚妍拎起一支糖果味嘅香水嘅試紙聞咗一下，甜到佢即刻將試紙放喺一邊嘅回收盒中，「有中意嘅人？」
「冇中意嘅人唔可以扮靚？法律規定？」黎昕淇擰轉頭對宋楚妍無奈咁笑道，「你冇拍拖都扮靚啦，仲話我⋯呢隻好唔好？」
黎昕淇將試紙放到鼻邊聞一聞之後將試紙遞到宋楚妍嘅鼻前，黎昕淇望住宋楚妍，佢察覺到啱啱宋楚妍咁問嘅時候，佢心入面莫名泛起一陣漣漪
「好聞係好聞，但感覺唔太襯你⋯」宋楚妍認真聞完之後搖頭，然後拎起另一支香水嘅試紙，「呢個？」
「呢個會唔會太濃⋯？」黎昕淇將試紙一放近已經皺起眉頭，「想買淡香啲嘅。」
「呢個？梨香，少少甜但又唔濃。」宋楚妍揀咗一隻味，將試紙遞比黎昕淇
「呢個幾好喎～」黎昕淇一聞到就中意呢隻甜而不膩嘅香味，「呢隻啦～」
「喂喂，你洗唔洗買定？」宋楚妍忽然間神神祕祕咁拉住黎昕淇望向身後一排嘅香水低聲問
「咩買定？」黎昕淇唔明白宋楚妍嘅意思，但見到宋楚妍嘅壞笑，佢已經估到唔係啲咩好事
「催情香水。」宋楚妍低聲道
「我買完噴比邊個聞⋯？」黎昕淇都冇佢咁好氣，喺心入面默默咁反咗個白眼，「噴比你聞⋯？」
「買定先，之後有男朋友再噴，又或者用嚟識男朋友？」宋楚妍笑道，然後又開玩笑道，「會長會長⋯！」
「救命呀⋯大家中意幻想唔緊要，但真係唔好幻想到我同會長度好唔好⋯！」黎昕淇知道宋楚妍講笑，不過佢都忍唔住投降，「大家嘅幻想力好豐富⋯」
最近喺朋友口中聽嚟聽去都係會長，十句有七句都離唔開佢同陸修然一樣，唔講以為佢同陸修然真係有啲咩秘密關係，雖然私下嚟講都係事實
黎昕淇想儘快結束呢個話題，只要眼望到催情香水就覺得唔自在，感覺臉頰都就嚟要變紅
「聽講催情香水都有效，類似勾起慾望、癮之類⋯」宋楚妍挽住黎昕淇嘅手臂低聲講道
「唔想知⋯」黎昕淇想直接封住耳仔唔聽落去
宋楚妍唔知佢同陸修然嘅關係唔緊要，但黎昕淇自己知先覺得更唔自在，佢同陸修然私下仲會成日見面
「慾望同癮⋯唔洗噴都已經可以有效果⋯」黎昕淇望住店員將香水放入靚靚嘅包裝袋嘅時候不禁喺心入面道，「佢真係毒品嚟⋯不過，可能對佢嚟講，我都係毒品⋯只係講得好聽叫解藥啫⋯」
黎昕淇同宋楚妍本來就冇約好一齊食晚飯，所以宋楚妍陪佢買完嘢就番屋企
經過屋企樓下嘅蛋糕店嘅時候，黎昕淇企喺櫥窗前望咗好一陣，然後拎起手機，打咗個電話比陸修然
「食唔食蛋糕？我想食。」黎昕淇喺對面電話接通嘅時候直表了當咁講道
「哦，咁你食咪買，打比我做咩？」電話裏頭傳嚟陸修然懶洋洋嘅聲音
「兩件有折，我食唔晒兩件。」黎昕淇未等陸修然回答，已經推門行入蛋糕店
呢間蛋糕店嘅蛋糕都係觀賞度好高嘅類型，好啱打卡；黎昕淇想食好耐，難得有折就一定要趁機會試下
「你食咩味？」黎昕淇望住店內更多嘅款式問陸修然
「你決定啦⋯」陸修然估到佢已經準備要買
黎昕淇雖然問佢想食咩味嘅蛋糕，但佢連蛋糕有咩味都唔知⋯
黎昕淇收咗線之後拎住一個蛋糕盒，入面啱啱好裝到兩件只有手掌咁大嘅蛋糕
IG Link: https://www.instagram.com/nd_cotttoncandy/?hl=zh-tw