【愛情】如地下情一樣嘅癮，係我對你嘅定義: 36. 震驚
「咩大新聞？」鍾安而一頭霧水咁望住鍾樂時，放喺門柄上嘅手緩緩垂低
「過嚟過嚟！」鍾樂時即刻拉住鍾安而行到去會室斜對面嘅空課室，鍾樂時仍然未從啱啱嘅震驚走出嚟，「我真係發現咗個大新聞，個腦好似爆炸一樣震驚⋯！不過我同你講咋，你唔好講出去⋯」
「嗯，所以係咩大新聞令你咁震驚？」鍾安而微微點頭追問道
「啱啱我諗住行後梯落番課室拎嘢，但我行到後梯嘅時候聽到有人喺樓梯講嘢，我就八卦企喺度偷聽⋯」鍾樂時將聲線降低，細細聲咁同鍾安而講，「我八卦咁偷望咗上層一眼，見到會長同黎昕喺上六樓嗰條樓梯度⋯」
「佢兩個都出咗去嘛。」鍾安而冇特別大反應
「重點唔係呢個⋯！」鍾樂時急到直跺腳，拉住鍾安而低聲道：「嗰日江清懿咪喺屋企打電話比黎昕，問黎昕番工嘅嘢嘛！原來嗰陣會長就喺黎昕隔離！」
「佢兩個一齊？然後呢？」鍾樂時嘅震驚感傳咗比鍾安而，鍾安而有啲明白鍾樂時點解咁驚訝，但佢冇諗過接住落嚟嘅內容先係真正嘅震撼彈
「會長喺黎昕同江清懿講緊電話嘅時候錫佢，嗰日我仲話江清懿係唔係比黎昕cut線，原來唔係cut線，係強制靜音⋯！」鍾樂時激動咁捉住鍾安而嘅手臂道，「原來佢兩個已經一齊咗⋯！你話係咪大新聞？」
「咁大新聞？」鍾安而嘅大腦都比鍾樂時講嘅嘢稍微炸咗一下，諗緊係真實嘅可能有幾大，但係鍾樂時親耳聽到嘅對話，而且嗰日江清懿講電話嘅時候佢都喺屋企，「但睇起嚟又唔似⋯」
「因為佢地平時睇起嚟超唔熟⋯！」鍾樂時回頭望一眼窗外，睇下有冇人經過，「佢地好少會講嘢，所以我啱啱聽到嘅時候超震驚！難怪其他人點講佢地，佢地都冇咩反應啦！」
「可能因為佢地都喺學生會，而且唔想比人講。」鍾安而好快就估到可能嘅原因
「會長啱啱好似氹緊黎昕，而且好似仲有其他原因令黎昕嬲。」鍾樂時因為淨係聽咗一半就番轉頭，「不過後面我冇再聽，淨係前面嗰段都夠我震驚一個月⋯！」
鍾安而一時之間都唔知可以講咩嚟表達佢嘅感想，對於突如其來嘅震撼彈，鍾安而都愣咗一下
「不過我諗都正常嘅，咁多人仰慕會長，黎昕唔想比人知都好正常～」鍾樂時輕嘆一口氣，「佢地真係掩得超實⋯！鍾安而你會唔會都偷偷地拍拖唔同我講㗎！？」
「會呀，同你講咪即係同晒所有人講⋯你太熱情，怕咗你。」鍾安而諗都冇諗就答
「我同咗你講㗎咋，你唔好講出去呀！我地兄妹之間嘅秘密嚟！」鍾樂時再三提醒鍾安而，「佢地好明顯唔想比人知。」
「得啦。」鍾安而雖然震驚，不過既然當事人掩得咁埋，咁佢更加要口密，「番去啦，差唔多夠鐘。」
「差唔多要番去開會啦。」陸修然轉身向下行，行到轉角嘅平地嘅時候回頭望向黎昕淇，對黎昕淇輕輕一笑，「行啦。」
黎昕淇一步一步行落樓梯，跟喺陸修然嘅身後番到會室，佢地兩人之間嘅小矛盾，暫時喺呢度告一段落
⋯
喺放學之後，兩人一如既往咁直到番到屋企樓下大堂先匯合
兩人一齊行入𨋢，黎昕淇伸手㩒𨋢，但淨係㩒咗自己嘅層數，陸修然望咗一眼之後伸手㩒自己嘅樓層
兩人一直都冇講嘢，𨋢內好安靜；喺𨋢到達黎昕淇要出去嘅樓層時，黎昕淇喺𨋢門打開之際伸手捉住陸修然嘅手腕，將佢都拉咗出𨋢
黎昕淇只係伸手捉住陸修然嘅校呔，陸修然已經主動彎低腰，唇碰喺黎昕淇嘅唇上
只係短短幾日，感覺好似已經大半個月冇食到解藥一樣口乾舌燥、喉嚨乾涸，輕輕嘅一吻令呼出嚟嘅空氣變得熾熱無比
喺冇解藥嘅日子裏面，只要冇觸碰到就唔會癮起，但一旦喺壓抑過後輕輕一碰，癮就會好似儲存咗大量能量嘅易燃物一樣，喺化學作用之下一秒爆破，無法壓抑
一旦呼吸交纏，就會變得難以分拆，壓抑幾日嘅癮喺得到解藥嘅一刻，根本唔會願意放手比解藥流走，身癢比唔上心癢令人難受
心臟嘅跳動變得強而有力，黎昕淇先鬆開手，但鬆手之後係帶住委屈感撅起嘴，陸修然微喘着氣，努力咁調整緊自己嘅呼吸
陸修然將手托喺黎昕淇嘅下巴，將佢嘅臉頰輕輕捏住；陸修然向上提起手，將黎昕淇嘅下巴抬起，黎昕淇望住陸修然嘅雙眼，低聲咁輕哼一聲
「哈⋯」陸修然輕呼一口氣之後鬆開手，同時垂低頭，臉頰貼喺黎昕淇嘅額邊
黎昕淇嘅拉住陸修然嘅衫角，臉頰泛紅，由得陸修然靠住佢，耳邊傳嚟呼吸聲
「感覺好奇怪⋯有咩人會係呢種關係，但係又稱唔上心動⋯？」黎昕淇捏住陸修然嘅衫角，就算隔住衫都可以感覺到體溫嘅變化
「我已經忍咗幾日⋯」陸修然低聲喺黎昕淇嘅耳邊講咗句，同平時強硬嘅態度唔一樣，呢句說話好柔和，「好彩你嬲完⋯」
「你中意嘅，搵其他熟嘅朋友都可以做解藥。」黎昕淇故意調侃道
「哦。」陸修然帶住得意洋洋嘅淺笑緩緩抬起頭，「熟嘅，朋友⋯」
「嗯！」黎昕淇理直氣壯咁昂首道
「你咪我最熟嘅朋友。」陸修然嘅語氣平淡，只係陳述一個不能否認嘅事實，黎昕淇無言以對，「解藥通常只有一個配方，你話係唔係？」
「點知道⋯」黎昕淇明白陸修然嘅意思，亦知道答案，但佢偏偏唔想點一下頭
黎昕淇耷低頭，聞到陸修然身上嘅味道，心跳嘅節奏忽然有啲混亂；黎昕淇抬起頭，喺鼻尖前飄過嘅味道唔係柔順劑嘅香味
今日感覺解藥嘅效用有啲慢，喉嚨仍然好乾涸，就算吞口水都冇辦法解渴一樣嘅感覺，只係短短幾日，癮嘅程度一再勾起已經變得咁強烈，聞到對方嘅氣味都會勾起癮，癮真係可怕⋯
黎昕淇捏住陸修然嘅衫袖輕拉咗一下，陸修然同一雙明亮且帶住少許委屈感嘅雙眸對上視線，粉嫩嘅唇微微張開，胸口嘅起伏都好似訴說緊心中嘅慾望一樣
喺黎昕淇眨眼嘅同時，陸修然嘅喉核上下滾動咗一下，心癢嘅唔止黎昕淇一個⋯
「咔咔—」忽然傳嚟扭動門鎖嘅聲音，兩人默契咁即時分開
黎昕淇轉身行咗幾步到屋企門前，喺轉動鎖匙推開屋企門嘅時候回頭望向陸修然，陸修然自覺咁跟上黎昕淇嘅步伐
屋企嘅大木門閂上，書包隨便咁放喺鞋櫃前面，黎昕淇拉一下陸修然嘅校呔，餘光可以見到夾喺呔尾寫住「Students' Union」嘅金屬牌
陸修然自覺咁彎低腰，黎昕淇微微踮起腳尖，已經好似肌肉記憶一樣嘅行為⋯
IG Link: https://www.instagram.com/nd_cotttoncandy/?hl=zh-tw