【愛情】如地下情一樣嘅癮，係我對你嘅定義: 46. 意外

踏入學校門口之後，宋楚妍拉住黎昕淇行到小食部買早餐，黎昕淇企喺宋楚妍身旁陪佢

陸修然大步大步踏入小食部，離遠已經見到黎昕淇喺前方嘅佢不自覺加快腳步上前

「食呢個，你唔係中意食餐蛋？」黎昕淇指一指放喺面前嘅餐蛋治

陸修然行到黎昕淇嘅身後，回頭望一眼冇人嘅小食部之後，陸修然自然咁伸手扶咗黎昕淇嘅手腕一下

突如其來嘅觸碰，微弱嘅電流感沿住手腕而上，黎昕淇瞬間望向觸碰感嘅方向，發現陸修然嘅目光早就落喺佢身上





黎昕淇正想開口講啲咩嘅時候，陸修然朝宋楚妍瞄咗一眼示意，黎昕淇微微張開嘅口又默默咁合上

「你想比人發現係唔係？」黎昕淇瞪住陸修然，用眼神說話

「唔係。」陸修然小幅度咁搖頭

「會長早晨～」宋楚妍喺呢個時候咁啱擰轉頭，一見到陸修然即刻笑容滿面咁打招呼

「早晨。」陸修然微微點頭，嘴角上揚嘅弧度係配合番佢嘅形象所用嘅微笑





「你買完啦？」黎昕淇望住宋楚妍手上嘅兩份三文治明知故問道，「番上去未？」

「哦，好呀～」宋楚妍冇察覺到有異樣，爽快點頭就轉身行

黎昕淇跟喺宋楚妍身後，回頭朝陸修然望咗一眼，收回視線後追上宋楚妍行喺佢隔離

「一大清早嚇邊個⋯」黎昕淇喺心入面細聲道，左手輕輕捉住右手比陸修然輕碰過嘅手腕，「陣間比人見到咁曖昧點算⋯唔係，我地冇曖昧。」

最近成日都有奇怪嘅想法纏繞喺心頭，黎昕淇愈唔想比呢啲想法出現，佢就愈係會諗到





「都唔知道陸修然諗緊咩⋯」黎昕淇又不禁嘆氣，當然呢句說話佢冇講出口

明明成日都一齊，但係偏偏唔太了解佢嘅想法，黎昕淇覺得自己都摸唔清陸修然嘅想法

「唔理啦，佢點諗同我都冇咩關係。」黎昕淇將腦海中會令佢過份思考嘅疑問撥開，唔再花時間諗

⋯

「楚妍，你今日已經用咗成個小息嚟睇小說，你宜家又掛住睇手機，會唔會唔太好？」黎昕淇帶住少許嘅抱怨對睇緊手機嘅宋楚妍道，「你同我講下嘢得唔得？」

「你居然會叫我同你講下嘢？好少見你會主動要求呢樣嘢啵～」宋楚妍將手機放低喺餐枱上，食一啖飯之後笑道

「我最近好想搵人講嘢⋯」黎昕淇口係咁講，但佢知道佢想講嘅嘢係唔可以講出口嘅秘密，「講下你最近睇嗰本青梅竹馬小說嘅心得？」

黎昕淇嘅直覺覺得，宋楚妍一定會講到啲咩比佢聽令佢有啲啟發，不過都只係咁樣諗，佢都唔太肯定





「你幾時對呢本書有興趣㗎？」宋楚妍聽到係佢中意嘅話題，即刻就有興趣，腰都挺直咗，「不過，我真係有中段嘅讀後感～」

「請講。」黎昕淇點一點頭示意將接住落嚟嘅時間都交比宋楚妍

「曖昧其實就係一種慾望嘅表達，你想得到嗰樣嘢，但係你又怕真係會得到，唔甘心做朋友，但又唔敢喺埋一齊成為戀人。」宋楚妍正經又認真，聽起嚟好似係佢嘅親身經歷一樣，但其實只係小說內容

「點解你講到咁認真，聽起嚟好似你同一個人曖昧緊⋯」黎昕淇無奈咁笑一笑

「我覺得曖昧係好高難度嘅事嚟，你要保持親密同時保持距離，亦遠亦近，睇到我心都痕⋯！」宋楚妍嘅臉上都有一絲嘅緊張刺激情緒閃過，「不過，你應該唔明⋯你睇下你幾冷靜⋯」

「嗯⋯都係。」黎昕淇只係點頭附和，「呢種事太複雜，我唔識呢啲咁複雜嘅事。」

黎昕淇托住下巴，用叉捲起意粉放入口，一邊聽住宋楚妍分享佢嘅讀後感，雖然黎昕淇唔會睇呢類嘅書，不過聽下宋楚妍講嘢都好





「黎昕～你拍拖記得話我聽～」宋楚妍忽然道，「有好感都要同我講⋯！」

「有呢個人再算。」黎昕淇道，喺宋楚妍咁講嘅時候佢第一時間諗到嘅係陸修然，不過黎昕淇好快喺心入面就否定呢件事：「唔算曖昧，冇曖昧呢個狀況⋯」

兩人食完飯就番學校，行樓梯番到課室嗰層嘅時候，喺樓梯口已經可以見到幾個女仔企圍喺會室門口

直覺話比黎昕淇知，呢個情況應該係陸修然或者鍾安而喺門口

「估下係會長定副會長喺門口？」宋楚妍望住會室嘅方向低聲問黎昕淇

「應該係鍾安而，唔係會長啲迷妹。」黎昕淇成日喺會室，對成日嚟女同學都係有啲印象

「呢個受歡迎嘅程度，會長同副會長點識女朋友？女朋友一定呷醋⋯」宋楚妍嘆氣道，佢諗一諗都覺得太攰，「情敵好似有太多。」

黎昕淇笑而不語，同宋楚妍企喺走廊嘅一邊繼續觀察會室門口嘅狀況





一直都喺會室但唔知道外面情況嘅陸修然起身打算番課室拎嘢，一打開門係習以為常嘅微微點頭

「會長午安～」幾個女仔即刻打招呼，「請你食呀～朱古力。」

幾個女仔遞咗盒朱古力到陸修然面前，鍾安而見陸修然出咗嚟，即刻側一側身就入咗會室

「我陪你過去呀～」宋楚妍笑笑口提議，「你都要去會室啦係唔係呀？我知你要去～」

「你係想去睇企門口嘅係邊個⋯」黎昕淇唔洗太多嘅思考就睇穿宋楚妍嘅小心思

宋楚妍比黎昕淇睇穿咗，笑而不語拉住黎昕淇朝會室門口行去

「會長你唔食呀？」幾個女仔用失望嘅語氣問道，又將朱古力遞近啲





「你地啱啱請鍾安而食嘛。」陸修然臉上掛上禮貌嘅微笑，係準備拒絕嘅打算

「副會長話佢唔食朱古力⋯！」企喺最前嘅女仔講道，「會長你食啦～」

黎昕淇同宋楚妍行到會室門口，黎昕淇有啲意外企喺門口嘅人居然係會長陸修然而唔係副會長鍾安而

宋楚妍睇到佢想知道嘅答案，拍一拍黎昕淇嘅手示意就轉身番課室

「多謝，不過我唔食朱古力，你地留番嚟食啦。」陸修然婉拒道，不過佢講嘅都係事實，畢竟佢唔中意食又甜又膩嘅嘢食，朱古力係其中一樣

「唔好意思⋯」黎昕淇喺後面講咗一句，一行五人嘅女仔回頭望，然刻即刻分開咗兩邊企

「師姐～你食唔食朱古力呀？」其中一個女仔問黎昕淇

「唔洗啦多謝～」黎昕淇微笑拒絕道，「你地食啦～」

黎昕淇側身避開陸修然行入會室，陸修然即刻將黎昕淇叫住：「黎昕，你今日係唔係話有關於嚟緊活動嘅事想問？」

「吓⋯？」黎昕淇愣咗一下，佢記得佢今日冇問過陸修然任何嘢，但聽到陸修然認真嘅語氣，黎昕淇好似明白佢嘅意思，「哦⋯係呀，想問一問改動咗嗰度。」

「好呀。」陸修然見黎昕淇配合佢，面不改容咁點頭，然後對幾個女仔禮貌咁點一點頭，然後跟喺黎昕淇嘅身後行入會室

會室嘅門一閂埋，陸修然即刻鬆一口氣，黎昕淇頭也不回咁行到佢習慣坐嘅位置坐低




IG Link: https://www.instagram.com/nd_cotttoncandy/?hl=zh-tw