【愛情】如地下情一樣嘅癮，係我對你嘅定義: 51. 討論

「自己一個人打機好悶⋯」黎昕淇將手掣插番落遊戲機嘅主機上，然後閂咗床尾嘅電視

黎昕淇拎起手機百無聊賴咁睇相簿嘅相，見到買兩隻兔仔吊飾嗰日屬於兩人嘅合照，忽然覺得好啱做手機嘅wallpaper

「其實真係好好睇，好啱做wallpaper，但會比人睇到⋯」黎昕淇望住相輕聲嘆氣，「如果唔係咁神秘嘅關係，係唔係就冇咩所謂⋯？」

黎昕淇仰起頭，坐喺安靜嘅睡房、陸修然喺佢嘅視線範圍內、屬於陸修然嘅味道撲鼻而嚟，黎昕淇感覺到自己嘅思緒更混亂

「唔⋯」陸修然瞓醒，睜開眼緩緩坐起身，黎昕淇嘅大腦瞬間空白，手㩒咗鎖屏，「幾點⋯」





「5點3。」黎昕淇望一眼放喺枱上嘅鐘

「嗯⋯」陸修然迷迷糊糊咁點頭，偶然望到黎昕淇嘅手機螢幕，「睇緊咩⋯？」

「冇⋯唔⋯睇緊相簿⋯」黎昕淇本來想否認，點知一耷低頭見到自己嘅手機螢幕仍然開住，仍然停留喺同一張相

「哦⋯」陸修然微微點頭，掀開被就落地

「你要去邊？」黎昕淇坐起，視線跟住陸修然嘅行動軌跡移動到房門前





「去廁所⋯唔係仲可以去邊⋯？」陸修然無奈咁拉開房門行出去

「哦⋯」黎昕淇點一點頭

忽然間黎昕淇從櫈落地爬上床，跪喺床上將窗簾撥開少少，喺呢一層望出去望到嘅都係其他高樓最頂嘅三分之一

天空有一抹橙色，屬於黃昏時間嘅專屬浪漫，黎昕淇若有所思咁望住天空，連房門被推開都冇察覺到

陸修然輕手輕腳將房門閂上，坐喺書枱前等緊黎昕淇發現佢嘅存在





陸修然拎起手機，將相機模式轉為錄影，對住黎昕淇嘅背影開始錄影

「黎昕淇⋯」陸修然細聲咁叫咗佢一聲，黎昕淇完全冇反應，雖然笑咗一下，不過手仍然好穩定咁拎住手機，「黎昕淇。」

陸修然叫第二次嘅時候，黎昕淇終於聽到，跪坐喺床上嘅佢仍然望住窗外：「嗯。」

「你睇緊啲咩？」陸修然一手拎住手機，一手托住下巴，語氣中夾雜住慵懶感問道

「外面。」黎昕淇嘅回答簡單直接

「你做咩唔望過嚟？」陸修然問道

「唔要，直覺叫我唔好望過嚟。」黎昕淇望住外面搖搖頭，不過佢最後都係默默擰轉頭，見到陸修然嘅手機對住佢

黎昕淇一臉無奈，陸修然收起手機到黎昕淇嘅身旁坐低，撥開窗簾望向外面睇下有咩吸引到黎昕淇





「外面有咩特別⋯」陸修然伸手放喺黎昕淇嘅下巴，輕輕捏住佢嘅臉頰，望向平平無奇嘅外面，「令你睇得咁入神？」

「日落啦。」黎昕淇嘅指尖貼住玻璃，擰轉頭望向陸修然，微微嘟起嘅嘴令陸修然有種衝動

陸修然冇刻意壓抑佢嘅衝動，湊近黎昕淇喺佢嘅唇上輕吻一下，黎昕淇冇迴避，乖乖坐喺原地由得陸修然湊近，配上黃昏橙黃色嘅天空，睇起嚟好似浪漫嘅偶像劇情節一樣

陸修然鬆開手，黎昕淇嘅目光仍然停留，心中嘅漣漪為佢而起，黎昕淇撇開臉隱藏自己眼底嘅情緒

「星期六要番工⋯」黎昕淇有啲九唔搭八咁講，睇起嚟只係為咗隨便搵個話題

「幾好，有人陪你番唔係咩？」陸修然聽到之後即刻起身坐番去書枱前面，睇起嚟對呢個話題唔太感興趣，「有朋友同你一齊番幾好呀。」

黎昕淇望住忽然間有啲鬧情緒嘅陸修然，覺得有啲莫名其妙但嘴角唔爭氣咁上揚起嚟，佢將坐嘅位置移動到更近書枱嘅位置，側着頭望住陸修然，但陸修然望都唔望佢，戴住耳機翹埋雙手睇電腦





「陸修然，你做咩唔理我？」黎昕淇將陸修然右邊嘅耳機拉咗出嚟，不解問道

「我宜家唔係同你講緊嘢？」陸修然嘅反應有啲冷淡，明眼人都睇得出陸修然係唔高興

「不過同江清懿一齊番工真係冇咁悶，佢有時講嘢好好笑。」黎昕淇嘅手搭喺陸修然嘅手臂上道，「番工冇咁悶。」

「嗯。」陸修然聽住黎昕淇講嘅嘢，完全冇認真睇YouTube

「江清懿睇起嚟就係嗰種花心男，但嗰日同佢一齊番早食早餐嘅時候佢話大家誤會咗佢，不過我覺得同佢熟咗之後就會發現佢同想像中有出入。」黎昕淇一直提起江清懿同時偷偷觀察陸修然嘅反應

「嗯，幾好呀。」陸修然嘅反應更冷淡，好似除呢啲敷衍嘅答覆外冇其他答案可以回答

「你有冇聽我講嘢？」黎昕淇側住頭望住陸修然，「你唔中意佢咩？」

「冇中意亦冇唔中意。」陸修然諗都冇諗就回答





「咁你覺得副會長點呀？」黎昕淇換另一個主角問

「我唔係你嘅好閨密，你搵番你嘅好朋友討論。」陸修然沉着氣回答

「咁你係我邊個？」黎昕淇故意追問道

「熟嘅朋友掛。」陸修然亦故意用倔強嘅語氣回答上次令黎昕淇嬲咗幾日嘅四個字

「哦，好呀，我番去啦。」黎昕淇聽到之後果然唔高興，起身行到門前開門

「咔—」陸修然聽到閂門嘅聲音之後，本來板起嚟嘅臉有一絲緩和同無奈

陸修然唔係特登想黎昕淇嬲，不過有啲情緒唔係佢可以控制，但係黎昕淇同佢一齊嘅時候一直提住其他人，陸修然又忍唔住覺得唔高興





「都唔知今次阿昕要嬲幾耐⋯」陸修然一諗到呢個問題就覺得自己啱啱唔應該咁講

陸修然心煩意亂咁將左邊嘅耳機都拉咗落嚟，深呼吸一口之後回頭望向房門口，陸修然成個人一愣嚇咗一下

「你唔係番去咩？」陸修然見到黎昕淇企喺佢嘅房門口，手仍然搭喺門柄上面，佢收起佢啱啱嘅反省心冷淡咁問

「嗯。」黎昕淇微微點頭，然後拎出小辣椒嘅氣勢問：「你好想我快啲走？」

佢扮自己要走，閂門之後一直企喺呢個位置等陸修然擰轉身發現自己

「冇。」陸修然連人帶櫈轉過去，「啱啱係你自己話走。」

佢地嘅關係，永遠都好似差一步一樣，所以先會矛盾至極、心煩意亂⋯

黎昕淇面對陸修然嘅冷淡，佢都可以感覺到自己嘅火由肚升上頭頂，佢直接開門行出去，拎起書包就走




IG Link: https://www.instagram.com/nd_cotttoncandy/?hl=zh-tw