【愛情】如地下情一樣嘅癮，係我對你嘅定義: 59. 求救

晏晝食飯時間

喺餐廳門口等位嘅時候，黎昕淇企喺江清懿同宋楚妍中間，咁啱陸修然同莫淮禮佢地又係同佢地食同一間餐廳

「佢都係食呢間⋯」黎昕淇嘅餘光留意到陸修然，自然咁望咗一眼

黎昕淇伸手挽住宋楚妍嘅手臂，雙腳下意識就朝宋楚妍行咗一步、貼住宋楚妍企，同江清懿拉開咗一段短嘅距離

陸修然垂眸，目光落喺黎昕淇同江清懿嘅皮鞋之間嘅距離，陸修然冇望向黎昕淇，只係默默咁撇開臉唔望過去





兩個要面子嘅人嘈交嘅下場就係無止境嘅冷戰，邊個都唔願意低頭道歉

冷戰嘅下場，會唔會係絕交？呢件事太可怕，冇人敢去諗最終會變成點樣，但同時又唔願意低頭道歉

食完飯番到學校之後，黎昕淇坐喺自己嘅座位，最近幾日佢都冇去會室，食完飯多數都係留喺課室同宋楚妍一齊

「唉。」黎昕淇突然深呼吸嘆一口氣，同佢對住坐嘅宋楚妍抬頭望佢

「做咩嘆氣？」宋楚妍關心咁問道





「冇。」黎昕淇喺嘆完氣先發現自己嘆氣，於是搖搖頭

黎昕淇望住宋楚妍，佢有啲想同宋楚妍講，搵個人吐下苦水，但又唔想比宋楚妍知道佢同陸修然嘅事

「楚妍呀⋯」黎昕淇伏喺枱上，苦惱咁叫住宋楚妍

「咩呀⋯？」宋楚妍一臉困惑，佢知道黎昕淇有心事，不過黎昕淇唔想講嘅話，宋楚妍從來都唔會追問，「黎昕你有咩心事，其實真係可以同我講，你唔洗收喺心。」

「最近，同個⋯朋友鬧咗交⋯」黎昕淇小心翼翼咁講道，努力咁避開一啲同陸修然有關嘅字眼，「冷戰咗一個星期都冇講過嘢⋯」





「嘩⋯你地咁忍得嘅？一個星期唔講嘢⋯」宋楚妍對於佢地嘅毅力感到佩服，好難想像同朋友冷戰到一個星期唔講嘢，「我地學校㗎？」

「呃，唔係，校外㗎⋯」黎昕淇選擇咗隱瞞

「但你地做咩鬧交？」宋楚妍問道

「就係因為一啲好無謂⋯又唔係真係好無謂嘅事，就係佢⋯覺得我偏心另一個朋友多啲⋯」黎昕淇好努力咁避重就輕，用佢可以講到嘅字詞去形容，「但我同佢係識咗好耐嗰種朋友，佢覺得⋯我對另一個朋友好啲，但明明我都冇⋯！」

「你同佢解釋呀～佢覺得你同佢識得耐啲，你應該重視佢多啲，咁你同佢解釋清楚呀～」宋楚妍作為旁觀者，而且仲係一個成日聽八卦嘅人，佢好快就聽出當中嘅意思

「我解釋咗啦！係佢特登對我冷言冷語，仲比說話我聽⋯！」黎昕淇一諗到呢度就愈諗愈嬲，陸修然故意嘅冰冷言詞又喺黎昕淇嘅腦海中浮現，「我唔想做先低頭嗰個，我都冇錯⋯」

「但佢講得出你偏心，咁應該係你做咗啲好明顯嘅嘢令佢咁諗？」宋楚妍單憑猜測道，「佢應該係最重視你，所以先會介意啫～咁你覺得邊個朋友重要啲？」

「嗯⋯」黎昕淇嘅心一直緊張咁噗噗跳，宋楚妍果然係聽慣八卦嘅人，一聽就估中咗八成





「你自己諗好再決定要唔要低頭道歉啦～」宋楚妍微笑道，伸手摸一摸黎昕淇嘅頭安慰佢

早喺宋楚妍問出邊個重要啲嘅問題嘅時候，黎昕淇嘅內心已經有答案⋯

放學之後，黎昕淇孭住書包番屋企，一打開門就有芝麻同牛奶嚟迎接佢，黎昕淇連書包都冇除，直接就蹲低摸貓

最近同陸修然嘅陷入冷戰令佢覺得好疲倦，每一日番學都可以見到面，但係兩人就好似成為咗真正嘅陌生人一樣，變成咗呢個保持一段距離嘅關係之後，黎昕淇冇覺得特別開心同鬆一口氣，反而覺得更加疲倦

「牛奶呀⋯點算呀？佢仲嬲緊⋯」黎昕淇摸住牛奶嘅下巴苦惱咁問道，不過牛奶淨係顧住搲痕都冇心思去理黎昕淇嘅煩惱，「但我都冇錯⋯」

黎昕淇換完衫行出客廳，坐低喺梳化上嘅時候發現自己忽然間唔太習慣呢種安靜，呢種突然嘅改變令黎昕淇覺得有啲局促同唔自在

「喵～」牛奶好似察覺到黎昕淇嘅鬱悶一樣，同芝麻一齊跳上梳化





芝麻坐喺黎昕淇隔離貼住佢嘅大髀，牛奶直接坐低喺黎昕淇嘅大髀上面，毛茸茸嘅手搭喺黎昕淇嘅手背上面

「咁你覺得邊個朋友重要啲？」

黎昕淇諗起宋楚妍喺晏晝嘅時候問佢嘅問題，呢個問題嘅答案由上次黎昕淇喺踏出陸修然嘅屋企門口前嘅一句「既然你覺得你同佢係一樣嘅話」已經好明顯

黎昕淇同江清懿係朋友，同陸修然都係朋友，不過喺心中始終一定會有分別

「唉⋯都要破紀錄啦⋯」黎昕淇無奈咁嘆氣，一個星期冇講過嘢已經破咗上次三、四日唔講嘢嘅記錄

唔習慣嘅人其實唔止黎昕淇一個，陸修然都唔習慣，平時慣咗放學之後會同黎昕淇一齊，但最近每一日都唔會一齊做功課、亦唔去會室、什至冇send message，好似又番到去學生會競選前嘅日子一樣

以前覺得咁樣嘅日子冇咩特別，仍然係偶然受媽媽嘅吩咐去拎嘢或者屋企一齊食飯嘅時候先會見面，但宜家只係平靜一個星期已經唔習慣

如果一直冇人做先低頭嗰個，關係就會一直僵持落去⋯





⋯

翌日朝早番學嘅時候，黎昕淇同陸修然一前一後咁行，江清懿見到黎昕淇嘅時候同平時一樣追上去

黎昕淇忽然輕輕皺一下眉頭，明明有一段距離，但係卻聞到一陣好熟悉嘅氣味

「唔⋯」黎昕淇用餘光留意陸修然嘅位置，佢地之間嘅距離其實唔太近，大概有四、五個人嘅距離

「喂！」江清懿行到黎昕淇隔離嘅位置，「早晨呀黎昕。」

「早晨⋯」黎昕淇抬起頭望住江清懿，繼續向前行嘅同時自動向右邊行咗兩小步，佢同江清懿之間嘅位置即刻有一個拳頭嘅空位

陸修然一直行喺後面，黎昕淇嘅舉動佢有留意到，表面睇起嚟毫無波瀾嘅佢，內心不禁暗喜，佢就係唔中意黎昕淇同江清懿咁熟，而且江清懿成日好順手就搭住黎昕淇嘅膊頭令陸修然更加不滿





但啱啱黎昕淇嘅舉動就好似話比喺佢身後嘅陸修然知道佢嘅答案一樣

小息嘅時候，黎昕淇攬住朝早收番嚟嘅功課簿行出課室，打算經後梯到教員室交簿，黎昕淇落到一樓，踩到一樓嘅平地嘅時候，綁住功課簿嘅橡筋「㗳」一聲斷開，黎昕淇垂直攬喺懷中嘅功課簿向下跌散落喺地上

「唉，又係咁⋯」黎昕淇無奈咁嘆氣之後蹲低喺地上將簿一本一本疊番好

陸修然喺轉角位行出嚟，見到蹲喺樓梯前執嘢嘅黎昕淇，心裏不禁一笑：「又斷橡筋⋯」

陸修然行過執蹲低，伸手幫手執起散落嘅功課簿；黎昕淇見到有一雙手幫佢一齊執緊功課簿




IG Link: https://www.instagram.com/nd_cotttoncandy/?hl=zh-tw