【愛情】如地下情一樣嘅癮，係我對你嘅定義: 63. 懷疑
「洗唔洗抹嘴？」黎昕淇輕抿一下唇，抬起頭細聲咁問陸修然
「唔洗住。」陸修然抿一下唇
夜晚灘喺床要瞓覺嘅時候，陸修然一個轉身揚起被蓋好，即刻聞到身上屬於黎昕淇嘅殘餘氣味
見面嘅時候聞到佢身上嘅味道會覺得好安心，但當見唔到佢卻聞到佢身上嘅味道嘅時候卻會心煩意亂，合埋眼嘅時候味道會變得更加濃烈，更加會有想見到本人嘅感覺⋯
⋯
翌日晏晝，黎昕淇拎住一疊趁喺晏晝出去食飯買嘅A4紙行到會室門口
喺黎昕淇準備要伸手開門嘅時候，有人朝佢叫咗一聲：「師姐！」
黎昕淇要扭門柄嘅手懸喺半空，轉頭望向聲音來源，係琴晚睇戲見到嘅兩個女仔
「嗨，有咩事？」黎昕淇雙手攬住A4紙面向佢地
「師姐，你琴晚係唔係都有去睇戲？」其中一個女仔問道，黎昕淇嘅心臟一縮
佢地係學生會嘅支緩組人員，所以同學生會嘅成員關係都唔錯，偶爾見到學生會成員都會打招呼；黎昕淇覺得佢地係特登嚟問呢件事，即刻變得小心翼翼
「琴晚？」黎昕淇嘅大腦快速咁轉動起嚟
「嗯！我地琴晚去咗睇戲，見到一個同你好似嘅女仔，隔離有個戴cap帽嘅男仔！」另一個女仔嘅描述好準確，黎昕淇調整呼吸，冷靜應對
「我諗你地認錯人？」黎昕淇側着頭微微一笑，「我唔太中意睇戲。」
「係咩⋯？」兩個女仔面面相覷，有啲困惑但又冇辦法肯定嗰日見到嘅人係黎昕淇
黎昕淇保持鎮定嘅微笑，陸修然喺課室行出嚟，見到黎昕淇同兩個女仔一齊，於是行到會室嘅門前
「買咗啦？A4紙。」陸修然嘅手搭喺門柄上面準備要開門入去
「係呀。」黎昕淇轉身望向陸修然，陸修然出現嘅一刻佢覺得自己救星到
黎昕淇喺行入會室前對兩個女仔微微點頭，然後將會室嘅門閂埋；門一閂，黎昕淇將A4紙放到枱上嘅同時鬆一口氣
「好彩你及時到。」黎昕淇望向陸修然，語氣中夾雜住近乎罕有嘅感激，望一眼門口之後細聲道：「佢地問我琴晚係唔係去咗睇戲，但好似冇認到你⋯早知我都戴cap帽啦⋯！」
「你否認咗？」陸修然靠坐喺枱邊問道
「梗係啦。」黎昕淇理所當然咁回答，「好彩佢地冇懷疑太多⋯」
行緊去前梯嘅兩個女仔半信半疑咁四目交投，行喺左邊嘅女仔唔係信晒黎昕淇嘅解釋
「但我真係覺得嗰個人係文書嚟⋯！」企喺左邊、梳起髮髻嘅女仔拉住佢嘅朋友道，「最衰個男仔戴咗cap帽，睇唔到樣⋯」
比佢拉住、梳住高馬尾嘅女仔稍作思考，佢個心都十五十六，信啲唔信啲咁樣
「你做咩唔出聲？」梳住髮髻嘅女仔疑惑咁望住另一個女仔
「我喺度回想緊⋯啱啱會長行過嚟嘅時候我望咗一眼，覺得佢地嘅身高差同琴日我地見到嘅人好似⋯都係差唔多呢個高度⋯」梳住高馬尾嘅女仔認真咁講，「如果琴日我地見到嘅人真係師姐，咁佢隔離戴咗cap帽嘅男仔會唔會係會長？」
兩人停喺原地，一番推論之後再諗下就覺得好炸裂，兩個人同步咁用手掩住不禁張開嘅口
「你咁樣講，好似⋯又有啲，似。」梳住髮髻嘅女仔覺得資訊量忽然間好大，大腦都有啲轉唔切，「估啫估啫！未必嘅⋯！我地都冇睇到個女仔嘅正面，睇到背面啫，人有相似嘛⋯！」
「但如果真係嘅話，咁咪即係，佢地私下拍緊拖⋯？」梳馬尾嘅女仔自己推論完之後將自己都嚇呆咗，「地、地下情⋯？」
兩人半信半疑又難以置信咁瞪大眼，疑幻似真嘅猜測令兩人嘅大腦一時間都運轉唔嚟
喺會室嘅陸修然同黎昕淇仍然喺原位，黎昕淇翹埋雙手微微側住頭，陸修然嘅雙手自然咁垂放喺大髀上
「比佢地發現咗嘅話都唔知點算⋯」黎昕淇輕嘆一口氣之後喺陸修然身邊靠喺枱邊坐
「冇呀，點解釋都一樣，單獨睇戲仲要斷正。」陸修然聳肩道
「不過睇起嚟佢地都睇唔清楚，只係估。」黎昕淇鬆一口氣，啱啱喺門口嘅時候，個心都緊張到要跳出嚟一樣
今日身上冇香水味，身上傳嚟嘅都係本來嘅氣味，原本嘅味道似乎更加令人覺得踏實
「只要佢地唔講出口，都唔怕會有咩傳出嚟。」陸修然雙手撐住喺枱上，仰起頭平靜講道
「應該都okay⋯？最多都係破壞你形象。」黎昕淇嘅手臂貼住陸修然嘅手臂，解鎖手機嘅同時輕嘆一口氣
「我嘅形象？我冇所謂呀，佢地要傳就由得佢地傳。」陸修然唔在乎咁聳肩
「咁我嘅形象都唔洗要啦？你啲小粉絲、小迷妹都唔知會唔會追我嚟鬧。」黎昕淇瞇起眼睛，下一秒又忍唔住嘆氣
「如果係嘅話，我會企你嗰邊。」陸修然企起身挺直腰，拉一拉白裇衫同長褲，「應該都會堅定咁維護下你。」
黎昕淇嘅嘴微微張開，陸修然嘅後半句令黎昕淇頓時欲言又止，好似一滴水滴喺平靜嘅湖面上一樣，泛起陣陣嘅漣漪
黎昕淇眨一眨眼，一時之間連可以望去邊度都唔知，輕輕抿一下唇
「邊個要你維護⋯」黎昕淇微微撅一撅嘴低聲道
⋯
飯後嘅堂好容易會飯氣攻心，特別係孖堂，什至係悶嘅堂，所以宋楚妍望住黑板嘅雙眼已經準備要合埋
喺宋楚妍嘅雙眼準備要完全合埋嘅時候，老師喺呢個時候話放一個短break
「呀⋯我差啲要瞓著啦！」宋楚妍擰轉身望向黎昕淇
「我都⋯覺得差唔多啦。」黎昕淇將筆放低喺枱面，拎起水樽飲啖水
「去唔去廁所？唔去嘅話陪我去。」宋楚妍企起身伸咗個懶腰
黎昕淇跟住宋楚妍起身行出課室，當係散下步伸展一下；經過D班嘅課室嘅時候，黎昕淇朝陸修然嘅座位望咗一眼
陸修然靠住櫈背坐，望一望黑板前嘅螢幕又低頭望一眼書，拎起筆喺書上寫低重點又抬起頭
黎昕淇收回視線，喺心裏露出一個淡淡嘅笑容；宋楚妍推開門行入廁所，黎昕淇企喺洗手盆前等宋楚妍出嚟
IG Link: https://www.instagram.com/nd_cotttoncandy/?hl=zh-tw