【愛情】如地下情一樣嘅癮，係我對你嘅定義: 66. 好奇
「你要唔要聽咗先⋯」黎昕淇將陸修然輕力推開，順便偷少許嘅空間回一回氣
陸修然嘅喉核上下一郁，轉身伸手拎起手機，另一隻手仍然抱住黎昕淇，望一眼來電顯示寫住「莫淮禮」三個大字
「喂？」陸修然將聲線壓低，聽起嚟心情唔太好
黎昕淇雙手攬住陸修然嘅頸，將額角靠喺佢嘅頸窩上蹭咗一下；陸修然聽緊莫淮禮講緊咩，準備要開口講啲咩嘅時候，黎昕淇忽然靈機一動，坐起身將陸修然朝自己拉，唔比陸修然開口答莫淮禮
「會長？講嘢呀喂⋯！」莫淮禮見陸修然冇答佢，懷疑陸修然完全冇認真聽佢講嘢
「嗯，聽日先算。」陸修然緩緩開口，「嗯，拜拜。」
陸修然將手機放低喺手邊，垂眸朝黎昕淇輕輕一笑：「我都話咗我唔怕比人知，呢招對我冇咩效。」
黎昕淇輕哼一聲，坐起身湊近輕吻一下：「佢個電話打得咁及時嘅？」
「我冇預佢會打嚟。」陸修然微微低頭，手拎起手機放到枱上，另一隻手將披喺黎昕淇背上嘅被拉開，「你要繼續定唔繼續？」
「點知道⋯」黎昕淇口係咁講，但人卻湊上去
佢點會咁輕易放棄佢嘅解藥？但同時又有種唔止係想要解藥咁簡單嘅感覺
「你用我嚟借力嘅話，我會向後跌⋯」陸修然喺稍作喘息嘅空間中低聲講道
「哦⋯」黎昕淇冇當係一回事，仍然靠住陸修然，「癮重要定你會跌重要？」
唔等陸修然回答，黎昕淇已經主動湊上前，喘息嘅時間已經結束，喺熾熱嘅吻中總係好似逐漸夾雜咗其他想法，舌尖同唇上嘅觸感更加令人難以抗拒⋯
「叩叩—」忽然之間傳嚟敲門聲，陸媽媽扭動門鎖開門，「你兩個—」
黎昕淇同陸修然望向門口，陸媽媽開咗一道門縫探頭入嚟：「閂晒燈仲睇電腦，對眼唔洗要啦？」
「開咗枱燈。」陸修然平靜道
「陣間睇壞眼⋯」陸媽媽輕皺起眉頭，「煲咗糖水，陣間出嚟食啦。」
「嗯，好。」「知道。」
陸媽媽得到回答之後就將房門閂上，然後行番出去餐枱前面坐低
「好彩分開得快⋯」黎昕淇鬆一口氣，臉上嘅紅霞仍然未散，喺微弱嘅燈光下可以見到佢嘅臉頰仍然有一抹淡紅
「好彩開定咗YouTube⋯」陸修然嘅心仍然因為媽媽突然開門而嚇到噗噗跳，伸手將影片㩒暫停，「行啦，食糖水。」
「嗯。」黎昕淇坐到床邊落地起身
陸修然拉一拉身上嘅衫，行到門前嘅時候擰轉頭望咗黎昕淇一眼，伸手將黎昕淇嘅下巴托起同時，黎昕淇同時伸手拉住陸修然喺衫袖，喺行出房門前又偷偷地輕吻一下
⋯
「叮噹叮噹～叮噹叮噹⋯」落堂嘅鐘聲響起，鍾安而同周晟祐喺小食部食嘢
「你有冇帶番份reading番嚟？」鍾安而問周晟祐，「陣間嗰堂對埋B part嘅答案。」
「有，前兩日擺咗喺櫃桶都冇拎番去。」周晟祐將空嘅膠袋打個結放喺枱上，拎起手邊嘅維他奶，「你冇帶咩？」
「唔係呀，我有帶。」鍾安而將膠袋中最後一件餃子放入口，然後將膠袋打個結
「仲以為你冇帶添。」周晟祐道，佢嘅目光落喺行緊去買嘢食嘅鄭洛苡身上，「你嘅隔離位喎～」
鍾安而擰轉頭，一望過去就見到鄭洛苡嘅身影，鄭洛苡見到兩人之後朝兩人揮揮手就直接行咗去買嘢飲
鄭洛苡買咗一盒蘋果汁，喺打算行去搵鍾安而同周晟祐嘅時候，黎昕淇迎面而嚟，兩人微微點一點頭
「咚⋯！」喺兩人擦身而過嘅瞬間，鄭洛苡聽到清脆嘅一聲，下意識擰轉頭望向地面，「黎昕⋯！」
鄭洛苡執起地上嘅鐵牌轉身叫住黎昕淇，手上拎住嘅係學生會嘅扣針
「唔該。」黎昕淇聽到之後轉身走向鄭洛苡，微微一笑，伸手接過扣針之後將鐵牌扣番好喺校呔上面
「你淨係飲盒蘋果汁夠啦？」周晟祐見鄭洛苡走向佢地便問咗一句，「坐唔坐？」
「唔該。」鄭洛苡帶住微笑坐低喺鍾安而隔離
「你同黎昕好熟㗎？」周晟祐好奇咁問道
「唔係呀，就係上次去踩roller先講過嘢，而且之前冇同過班。」鄭洛苡拆開飲管嘅包裝，將飲管一下戳穿盒面上嘅錫箔紙，「而且佢睇起嚟有啲cool，唔太敢同佢講嘢⋯」
「黎昕係睇起嚟cool啫。」周晟祐微微點頭，佢都同意黎昕淇呢個第一印象，「不過人都友善嘅。」
「副會長應該同黎昕熟啲？」鄭洛苡望向鍾安而道
鄭洛苡自然嘅一句令周晟祐露出意味深長嘅笑容望向鍾安而，佢同鍾安而隨即對上視線，鍾安而望住周晟祐嘅微笑無奈到移開視線
「一般，黎昕多數都係同⋯」鍾安而差啲將「同會長一齊」呢幾個字講咗出嚟，但幸好佢及時發現即刻剎掣，轉一轉句子內容：「安靜做嘢。」
「我都想同佢做朋友⋯」鄭洛苡扁起嘴低聲嘆一口氣
鄭洛苡對黎昕淇有啲感興趣，但無奈嘅係覺得黎昕淇有啲難接近，可能因為黎昕淇平時又唔太常笑，所以睇起嚟有股氣場存在
「佢中意飲朱古力奶㗎？」鄭洛苡望住黎昕淇手上拎住嘅一盒朱古力奶
鍾安而望住黎昕淇手上拎住嘅嘢飲，佢從來都冇見過黎昕淇會飲呢樣嘢，喺會室更加冇飲過，但講起會室嘅話，另一個成日喺會室嘅人似乎中意飲朱古力奶
「唔肯定⋯」鍾安而若有所思後搖搖頭
鍾安而知道呢個秘密唔可以講出嚟，既然當事人有意隱瞞，佢都冇多口嘅必要，有時望住兩人嘅互動會覺得好有趣
鍾安而嘅目光落喺鄭洛苡身上，右手拎住紙盒，左手扶住透明嘅飲管，睇起嚟唔係好可愛？
鄭洛苡一個回頭，視線隨即同鍾安而嘅撞上，佢望住鍾安而嘅同時，鍾安而都望住佢
「做咩⋯？」鄭洛苡有啲呆，睜大明亮嘅雙眼望住鍾安而問
「冇咩。」鍾安而只係輕輕一笑，然後將眼鏡除落嚟，從褲袋中拎咗眼鏡片抹一抹鏡片
IG Link: https://www.instagram.com/nd_cotttoncandy/?hl=zh-tw