【愛情】如地下情一樣嘅癮，係我對你嘅定義: 69. 強調

黎昕淇嘅餘光留意住陸修然，陸修然專心致志又認真嘅模樣，確實會令人覺得可靠且值得信賴

黎昕淇偶爾會講一下佢嘅建議，張詩楠都有認真聽，佢覺得比起信自己，信更有經驗嘅師兄師姐會更好

鍾樂時一直喺隔離默默觀察，目光總係不自覺望向陸修然同黎昕淇

「但呢個同上面嗰個調會唔會好啲？」黎昕淇嘅手喺陸修然身前經過指住紙上嘅內容，「呢度，如果調咗嘅話⋯」

黎昕淇抬起頭同陸修然細聲咁講佢嘅想法，陸修然微微將腰彎低，聽黎昕淇講嘢





陸修然成個人自然咁傾向黎昕淇嗰邊，佢地嘅手臂幾乎都要貼住對方

陸修然伸手指住紙上嘅內容，微微彎腰同黎昕淇講咗兩句解釋；張詩楠同陸修然講嘢嘅時候，陸修然挺直腰背企好，認真聽佢講嘢

「唉～望住小情侶真係好開心，食狗糧都值得～」鍾樂時一直企喺不遠處留意住兩人，喺心裏暗暗歡喜偷笑起嚟，目光移到對面嘅鍾安而身上，「哥哥幾時搵番個中意嘅人比我開心下⋯」

鍾安而偶然抬起頭，直接望向鍾樂時，鍾樂時見哥哥望住佢，即刻企好然後豎起手指公比個like

「又睇到啲咩咁開心⋯」鍾安而喺心裏嘆氣，目光落喺旁邊嘅「小情侶」身上，「又食花生食得咁開心⋯」





黎昕淇同陸修然嘅視線偶然撞上，黎昕淇比然發現佢同佢地嘅會長好似離得有啲太近，不經意咁向左邊踏咗一小步

黎昕淇嘅腳踭踢到後面嘅紙箱一下，下意識縮咗一下；紙箱發出嘅「啪」一聲令所有人都將注意力集中喺黎昕淇身上

「小心後面。」陸修然望過去同時將手提起扶住黎昕淇嘅手踭，自然咁提醒咗一句

「呢個紙箱唔係上星期已經喺度？」黎昕淇擰轉頭又望一眼身後嘅紙箱

「陣間走嗰陣拎落去掉埋。」陸修然望向紙箱道，然後又望咗黎昕淇一眼





「好。」黎昕淇微微點頭

企喺張詩楠隔離嘅鍾樂時挑起眉，兩人嘅互動太自然，自然到如果唔觀察細節真係唔會發現

「好彩我之前聽到～」鍾樂時嘅內心驕傲咁笑道，對於發現咗一個天大嘅秘密覺得好自豪

「唔該會長～」張詩楠講道，然後以輕快嘅步伐行到佢自己嘅座位坐低

陸修然番去坐低，黎昕淇從佢身後經過坐喺佢嘅右邊、喺鍾安而嘅左邊

時間去到5點半，大家都執嘢準備走，陸修然孭起書包，行到張詩楠同鍾樂時嘅身後拎起放喺地上嘅紙箱

鍾安而起身行執幫陸修然拎一部分，佢地離開會室之後一齊行去學校後門嘅停車場將紙箱掉晒

「行得～」跟喺後面嘅鍾樂時小跑到鍾安而身旁





鍾安而行出學校門口之後將手機拎出嚟望咗一眼，見到有新message嘅佢下意識就解鎖去回覆

「邊個嚟？女仔？」鍾樂時咁啱見到，佢即刻問鍾安而，想探頭偷望一眼，但鍾安而即刻將手機鎖番放入褲袋，「你做咩即刻收起手機？」

「冇邊個，你睇自己嘅手機啦。」鍾安而都唔知要點樣答鍾樂時，佢都知鍾樂時一見到一定問長問短，日日問，月月問

行喺前面嘅黎昕淇回頭望咗一眼，聽到鍾樂時問係咪女仔嘅時候，隨即聯想到一個人

「係邊個啫？你係唔係偷偷地拍拖唔同我講？」鍾樂時見鍾安而唔答佢，即刻不滿起嚟問道，「你唔可以咁㗎鍾安而⋯！」

「冇拍拖。」鍾安而平靜回答

「你快啲話我聽先啦！我見到係女仔！」鍾樂時扁起嘴講道，「你唔同我講嘅話我番去問江清懿！」





「問。」鍾安而唔知道點解鍾樂時會覺得佢問江清懿會得到答案，不過佢又冇阻止佢嘅打算

「你唔好咁好奇想知得唔得？」張詩楠笑道

「唔得～太危險啦！」鍾樂時頓時瞪大眼望向張詩楠，然後一下子轉頭望向鍾安而，「鍾安而你識女朋友嘅話記得要比我過目下先。」

「原因。」鍾安而冇第一時間叫拒絕

「唔⋯」鍾樂時又唔太講得出

之前早會召集嘅時候聽到其他人講「唔係會長嘅話，副會長都唔錯」之類，鍾樂時就有啲擔心鍾安而會唔會比人當做後備

「總之要啦。」鍾樂時以肯定嘅語氣講道，聽起嚟係已發生嘅事一樣

「如果係另一個哥哥要識女朋友，你都會要佢帶比你過目？」張詩楠望住鍾樂時好奇問道





「佢識女朋友同我有咩關係？」鍾樂時卻輕哼一聲，唔在乎咁講道，但餘光望到喺前面嘅陸修然同黎昕淇後，佢又補一句：「不過都會喺適當時阻止佢。」

「偏心都偏得太明顯⋯」張詩楠喺心裏無奈道，「同對副會長完全係兩個態度⋯」

「你到時唔好聽晒女朋友話。」鍾樂時不滿咁對鍾安而抱怨

「冇女朋友。」鍾安而有啲無奈，佢唔明鍾樂時做咩咁擔心又咁好奇仲要咁堅持，不過為咗避免太多麻煩就隨佢嘅意就好

鍾樂時拉住張詩楠行去前面，行到陸修然隔離，帶住私心問一句：「會長呢？」

「我？」陸修然有啲意外鍾樂時會將好奇心拉到佢身上

「嗯！會長有女朋友嘅話，會唔會聽晒女朋友話？」鍾樂時好奇咁問，餘光留意住黎昕淇嘅反應





「睇下咩事上，不過應該都會？」陸修然以半肯定嘅語氣回答

「會長你咁完美得唔得㗎⋯！」張詩楠擺出小迷妹狀態嘅羨慕表情

「又喺度呃小妹妹⋯」行喺陸修然另一邊嘅黎昕淇喺心入面反咗個白眼

喺鍾樂時拉住張詩楠行番去鍾安而隔離之後，黎昕淇抬望咗陸修然一眼，陸修然望向黎昕淇嘅時候微微側一側頭

黎昕淇只係小幅度咁搖頭示意冇咩特別，陸修然將視線收回，同黎昕淇默默咁保持住一個拳頭嘅距離

張詩楠住喺學校附近，鍾安而同鍾樂時先落車，車廂裏剩低陸修然同黎昕淇兩個人

黎昕淇攬住孭喺前面嘅書包行到空位坐低，陸修然坐低喺黎昕淇隔離，將書包放喺大髀上面




IG Link: https://www.instagram.com/nd_cotttoncandy/?hl=zh-tw