【愛情】如地下情一樣嘅癮，係我對你嘅定義: 80. 慌張
鄭洛苡喺台下真係有專心聽鍾安而嘅宣傳，本來佢仲有啲眼瞓，不過今朝講咗會聽佢嘅宣傳，再眼瞓都要精神
「你嘅副會長又上台做宣傳啦～」企喺鄭洛苡身後嘅女仔細聲講道
「噓，唔係我㗎。」鄭洛苡靠後細聲否認，「諗多咗。」
「遲早係你嘅？」「嗰陣再算。」
雖然否認咗，不過聽到嘅時候，嘴角卻唔爭氣咁微微上揚勾起，意識到自己偷笑嘅鄭洛苡頓時乾咳一聲收起笑容
喺宣傳結束嘅時候，鍾安而嘅視線落喺鄭洛苡身上一秒，啱啱宣傳嘅時候佢就有意無意咁尋找
鄭洛苡似乎都發現到，微微側頭嘅下一秒鍾安而同鍾樂時轉身往台下行，鄭洛苡又回復同平時一樣嘅狀態同心情
「忽然間有啲想食椒鹽豬扒。」鍾樂時行到落台後忽然講咗一句
「叫阿姨煮比你食。」鍾安而冇認真聽佢講咩，腦海中都係諗緊同鄭洛苡有關嘅事，對鍾樂時隨口就答咗一句
「有冇專心聽我講嘢㗎⋯」鍾樂時望住有啲放空嘅鍾安而，不滿咁將嘴帶住不悅微微嘟起，「鍾安而！」
「係？」鍾安而立馬回神，冇事發生一樣問鍾樂時
「你有冇聽到我講嘢？」鍾樂時帶住懷疑嘅目光問道
「有呀，椒鹽豬扒嘛。」鍾安而聽到關鍵字，當自己有聽清楚鍾樂時講咩、可以蒙混過關就算，「我番去班隊先啦。」
鍾樂時都未嚟得切開口，鍾安而已經一支箭咁兜去班嘅隊尾，從後行番去佢嘅學號所在位置
鄭洛苡聽到隔離嘅女仔竊竊私語，餘光見到佢地一直擰轉頭偷望，佢知道大概係鍾安而番嚟
鍾安而經過嘅時候，隔離班嘅女仔目不轉睛咁望住鍾安而，完全唔覺得會令人尷尬；同佢地對到眼嘅時候，鍾安而露出禮貌嘅微笑
同鄭洛苡對上視線嘅時候，鍾安而挑起眉一下，笑容都同對其他人嘅唔一樣，表面就算睇唔起，但心卻可以直接感受到
「哦～」鄭洛苡身後嘅女仔喺鍾安而經過鄭洛苡嘅身邊嘅時候自然咁起哄咗一下
「咩呀？」鄭洛苡無奈咁轉身對佢笑問道，對方捉一下鄭洛苡嘅手，鄭洛苡輕拍咗佢嘅手一下，「噓⋯」
鍾安而聽到兩人嘅對話，表面上維持本來嘅平靜卻喺心裏一笑，佢同鄭洛苡之間嘅氛圍好似已經係一段時間前嘅事
前一段日子只要兩人一有交集，一定有人起哄，可能係讀書時代先會有嘅事，不過喺班上都唔算係啲咩新鮮事，宜家嘅起哄程度自然冇咁高，偶然講一兩句都係有嘅
⋯
陸修然、黎昕淇喺去會室嘅路上見到面，行落樓梯嘅時候黎昕淇同江清懿迎面見到
「嗨。」江清懿自然就提手打招呼
「嗨。」黎昕淇回應一句，江清懿加快腳步行上幾級到離黎昕淇更近嘅位置，「啪！」
江清懿順手同黎昕淇擊掌，黎昕淇一臉困惑，隨即無奈反咗個白眼：「無聊。」
「你去會室呀？」江清懿喺經過後停低喺梯級上順口問咗一句
「係呀。」黎昕淇停低朝江清懿嘅方向轉身望去
陸修然冇停低等黎昕淇，反而一級一級向下層行，黎昕淇回頭望咗佢一眼，心入面有少少慌亂
「你本堂課我想借嚟望一眼，我拎㗎啦。」江清懿同黎昕淇講清楚佢嘅目的
「哦好呀，你拎啦，我放咗喺櫃桶。」黎昕淇點點頭，然後即刻轉身追上陸修然
落到下面一層嘅時候，黎昕淇探頭望一眼喺佢隔離嘅陸修然，望到佢面無表情忽然有啲心虛
陸修然行喺前面推門入會室，一推開會室嘅門就見到鍾安而坐喺最近門口嘅位置，黎昕淇默默跟喺陸修然嘅身後
「你地咁晏先落嚟？」鍾安而望一眼時間後自然問咗句，「平時你地都好早。」
「我食飯遲咗番嚟。」陸修然拉開櫈坐低喺佢平日坐嘅位置
鍾安而微微點頭，餘光可以望到陸修然坐喺一向嘅主席位，但身卻側向黎昕淇，黎昕淇側身背向住鍾安而，不過佢唔想咁明顯望過去
陸修然一直耷低頭睇手機，但餘光留意緊黎昕淇；黎昕淇不經意咁擰轉頭望咗鍾安而一眼，收回視線後悄然伸手戳咗陸修然嘅手一下
陸修然望佢一眼，心入面覺得意外，有外人嘅情況下佢居然會同佢有肢體接觸，不過陸修然仍然一臉平靜
「你嬲呀？」黎昕淇嘅眼底有一層薄薄嘅笑意，不過佢壓抑住用口型問陸修然
「再講。」陸修然神色冷淡，微微側一側頭避開黎昕淇朝鍾安而嘅方向望咗一眼
鍾安而忽然起身，往門口望咗一眼後起身行出會室，兩人望住佢行出會室、會室嘅門自動閂埋
「做咩突然出咗去⋯？」黎昕淇望係掩上嘅門喺心入面打咗個問號
陸修然從後伸手將黎昕淇一手抱到離自己更近嘅位置，另一隻手將佢嘅櫈一同拉到自己面前
「陣間副會長番嚟見到！」側住身靠住陸修然嘅黎昕淇一下子企起身，不安咁輕皺起眉頭，「你真係唔怕死⋯！」
「唉⋯我一早都話咗唔怕比人知，係得你怕。」陸修然輕嘆氣同時企起身，整理一下自己嘅裇衫，一步一步向黎昕淇逼近
黎昕淇貼到喺牆前，佢嘅直覺覺得陸修然係唔高興，之前已經因為同一件事嬲過兩次，不過宜家嘅陸修然面無表情，佢都只係估
「就算宜家鍾安而行入嚟，我都唔怕。」陸修然抬起下巴，毫不畏懼嘅表情加上理直氣壯嘅語氣更令黎昕淇不安
正因為知道陸修然真係唔怕，黎昕淇先會覺得不安
「你快啲番去坐低。」黎昕淇努力保持冷靜，伸手搣咗陸修然嘅手臂一下
陸修然捉住黎昕淇嘅手腕將佢嘅手移開，佢痛，佢可以忍，但總唔可以一直痛落去
「你撩交嗌係唔係？」黎昕淇翹埋雙手，狠狠瞪咗陸修然一眼，態度明顯放喺佢面前，「睇下情況得唔得，又嬲！」
「我啱啱喺樓梯咩都冇做又咩都冇講，我直行又唔啱？邊個撩交嗌？」陸修然嘅不悅都開始由心底滲出嚟，眼神同語氣都明顯冷淡咗好多，向後坐低喺櫈上嘅時候將櫈拉後咗一截，「保持距離。」
「我唔係呢個意思⋯！」「咁你係咩意思？」
IG Link: https://www.instagram.com/nd_cotttoncandy/?hl=zh-tw