【愛情】如地下情一樣嘅癮，係我對你嘅定義: 84.

一直去到落堂之後嘅午飯時間，鍾安而起身朝周晟祐嘅位置望過去，見到周晟祐執緊嘢嘅佢先離開座位

「食完飯見啦副會長～」鄭洛苡喺鍾安而行到兩張枱中間嘅走廊時，以只有佢地聽到嘅聲量講咗一句

「嗯，陣間見。」鍾安而回頭望向鄭洛苡，鄭洛苡嘅臉上掛上一如既往嘅微笑

鄭洛苡朝朋友行去一齊行出課室，鍾安而行到周晟祐嘅座位，周晟祐啱啱好起身可以起行

鄭洛苡同另外幾個女仔行到餐廳，喺旁邊嘅位置坐低拎餐牌睇，坐喺鄭洛苡隔離嘅女仔忽然撞咗鄭洛苡嘅膊頭一下





「副會長個妹一直望你⋯」佢嘅膊頭靠住鄭洛苡，低頭望餐牌同時細聲講道

鄭洛苡抬頭望，同鍾樂時瞬間嘅對上視線，鍾樂時朝佢微微一笑就繼續同朋友傾計

「睇起嚟唔似唔小心⋯」鄭洛苡有啲疑惑，雖然鍾樂時喺對望後嘅反應好自然，但係有種故意望佢嘅意思

食完飯番到課室之際，鄭洛苡嘅IG有一個新嘅追蹤請求，係鍾樂時嘅追蹤請求

同一時間，鍾安而都收到鍾樂時嘅message，係IG追蹤請求嘅截圖，鍾安而無奈嘆氣





「真係阻止唔到佢嘅好奇心⋯」鍾安而喺心裏默默道

⋯

「聽日食番前兩日食嗰間米線好唔好？突然間想食米線。」江清懿抱住想食米線嘅心問道

「哦好呀。」宋楚妍微微點頭，佢嘅視線朝一旁嘅蘇序然望去，「你好靜呀蘇序然～」

蘇序然反咗個白眼，佢呢幾日都喉嚨痛到講唔到嘢，一開口把聲沙到好似播緊損壞咗嘅錄音帶一樣





「你睇咗醫生未？」宋楚妍問，蘇序然用力咳咗一聲覺得喉嚨都流緊血

蘇序然點頭，不過喉嚨仍然好痛，罕有咁可以見到佢一日唔出聲

「序然病咗好可憐⋯」江清懿帶住憐愛嘅眼神道，隨即比蘇序然毫不客氣咁打咗一下

企喺隔離嘅黎昕淇一直聽住佢地嘅對話，只係笑而不語，佢拎住手機等緊陸修然覆佢message

「黎昕又發呆～」宋楚妍側着頭朝黎昕淇笑一笑

「我有聽你地講嘢。」黎昕淇笑着搖搖頭

感覺到握喺手中嘅手機震動，黎昕淇立馬拎起手機睇，但唔係陸修然覆佢，只係一啲冇意義嘅郵件

就算知道對方就喺隔離嘅車廂，但絕對唔可以擰轉頭去望，要當自己咩都唔知，當冇任何事情發生緊





「唔知我今日溫默書溫唔溫得切，聽日第三堂默⋯」莫淮禮望住車窗外黑漆漆嘅隧道，只係隨便咁閒話家常

「死背都應該會入腦。」陸修然放好重心，喺列車行駛嘅時候連扶手都冇扶

兩人喺同一個站落車，依舊喺直到行到出口嘅門口先匯合，陸修然放慢腳步，黎昕淇加快腳步，又一次行喺對方身旁嘅位置

天氣轉涼，涼風迎面吹嚟，黎昕淇成個人都微微震咗一下，涼風好似穿透佢嘅身體一樣，手瞬間變冰

雙手前後微微擺動，兩人嘅手總係會輕碰到

可能因為行得太近，所以手背一直掂到，又或者因為黎昕淇嘅手太涼，所以顯得陸修然嘅手好暖

每一下輕微嘅擦過，都係一次試探，試探緊嘅係咩？期待緊嘅係咩？希望結果係咩？





忍唔住期待、忍唔住思考、忍唔住猜測，但同時又有一把聲音喺腦海中提醒自己唔好期待、唔好諗、唔好估

喺回神嘅瞬間，溫暖從手心傳嚟，抬起頭見到陸修然仍然平靜

「點解你著咗冷衫，但手都係咁凍？」陸修然語氣平淡咁問一句，但手卻緊緊將比佢纖細嘅手包裹喺手中

「吹到風。」黎昕淇嘅語氣平靜，本來放鬆嘅指尖慢慢曲起，回握陸修然嘅手

喺一分鐘後，兩人默契咁將手鬆開⋯

「咔—」黎昕淇企喺大門前用鎖匙開門，行入玄關嘅佢用手扶住門，回頭朝陸修然望一眼

陸修然同佢對上眼後邁步踏入玄關，將門閂上；兩人將功課放喺枱上，坐喺枱前安靜咁先將功課做好

陸修然靠喺櫈背上，拎起英文書喃喃自語，再重背一次默書內容，抬眼嘅時候，目光落喺黎昕淇身上





5點嘅時候，太陽準備落山，陸修然執好枱上嘅書同筆放番喺書包，行到梳化頹坐喺梳化上，合起眼仰起頭將頭靠喺櫈背上

「喵～」牛奶輕輕一躍跳到梳化上，坐喺陸修然旁邊，伸手拍一拍佢嘅手

「嗯？做咩呀？」陸修然睜開眼，低頭望住牛幻，然後將佢抱到自己腿上，「比我瞓一陣⋯」

陸修然仰起頭合起雙眼，牛奶捲縮起嚟乖乖瞓好，忽然感覺到隔離嘅位置往下一沉

「昕，比我恰一陣⋯」陸修然嘅聲線裏充滿疲倦，就算唔瞓一陣，佢都要合埋眼休息

黎昕淇沉默不語，安靜咁盯住陸修然嘅睡顏，腦海中諗起宋楚妍問佢嘅三連問

「我地本來喺基礎上，本來就同其他人唔一樣⋯」黎昕淇喺心裏嘆氣，望住陸修然，佢覺得就算係咩啲咩感覺都好，陸修然唔會開口講





黎昕淇伸手摸牛奶，牛奶發出低沉嘅呼嚕聲，伸長兩隻手伸懶腰；陸修然睜開眼，坐喺梳化上伸咗個懶腰，牛奶懶洋洋咁行開瞓喺一旁

「瞓醒？」黎昕淇望牛奶一眼然後開口問道，「陣間番去換衫，媽咪話佢地會喺餐廳等。」

「嗯⋯差啲唔記得咗⋯」陸修然提手放喺額頭上，「陣間叫醒我⋯」

⋯

兩人企喺𨋢嘅角落，黎昕淇嘅面前有將人群擋住嘅陸修然，視線範圍內除咗佢之外就冇其他人

陸修然擋住黎昕淇所在嘅角落，手放喺黎昕淇嘅後腰微微施壓，黎昕淇嘅手搭喺陸修然嘅腰間，將佢嘅衫輕捏住

「噴咗香水？」陸修然低頭喺黎昕淇嘅耳邊低聲問咗一句

「宜家先發現會唔會太遲？」黎昕淇有啲嫌棄，「出門口嘅時候都冇發現會唔會太離譜？」

「總好過走嘅時候先發現。」陸修然微笑道，低聲講咗句：「好啱你。」

「我知呀。」黎昕淇一臉高傲咁講，陸修然附和般點頭，「唔洗你講。」

𨋢喺餐廳所在嘅樓層停落嚟，陸修然拉住黎昕淇嘅手腕行出𨋢；兩人行入餐廳，跟喺帶位員嘅身後行到座位坐低

「媽咪佢地未到⋯」黎昕淇撅一撅嘴，行到裏面嘅位置坐低

陸修然拉開黎昕淇隔離嘅櫈，瞄一眼兩張櫈嘅距離後，喺坐低嘅同時將櫈拉近咗少少，黎昕淇瞄咗一眼就拎起餐牌




IG Link: https://www.instagram.com/nd_cotttoncandy/?hl=zh-tw