【愛情】如地下情一樣嘅癮，係我對你嘅定義: 89.
「我地番工唔會講呢啲，講都係講兩句，唔會咁深入去探討。」江清懿搖搖頭，「連宋楚妍都唔知，我點會知？」
「江清懿，佢係唔係嚟搵你？」宋楚妍忽然指向走廊
江清懿沿住宋楚妍指嘅方向望，見到鍾樂時企喺課室門口探頭望入嚟，同江清懿對上視線之後攝手攝腳咁行入嚟
「江清懿，我想拎屋企鎖匙，今日唔記得帶。」鍾樂時行到江清懿嘅座位，「你同哥哥一齊番去啦。」
「你唔去問鍾安而拎？」江清懿有啲嫌棄，但都係將屋企鎖匙從褲袋拎出嚟遞比鍾樂時
「我拎咗哥哥嘅鎖匙，佢點番屋企？」鍾樂時理直氣壯咁問
「咁你拎咗我嘅鎖匙，我點番屋企？」江清懿理直氣壯咁反問
「你同哥哥一齊番去呀～」鍾樂時露出天真嘅笑容，但江清懿唔會比佢呢個笑容打動到，「我要補課！你地一個瞓覺一個戴耳機，邊個開門比我？」
「拎啦拎啦⋯唔好整唔見。」江清懿懶得同佢爭拗，隨意打發道
「唔該晒～」鍾樂時嘅目的達到，心滿意足咁拎住鎖匙離開課室
「你同鍾安而嘅重要性高下立見。」蘇序然揶揄道
「我慣㗎啦。」江清懿搖搖頭，「佢成日都係咁。」
「聽講喺中意嘅人面前會表現得活潑可愛啲。」宋楚妍忽然拋出一句令大家都安靜咗嘅說話
「你又睇小說睇上腦係唔係？」江清懿用望怪人嘅眼神望住宋楚妍
「真係會㗎！」宋楚妍反駁道，「你地都唔係親兄妹～會都唔緊要啦係唔係？」
「又啱喎⋯宋楚妍嘅講法冇咩大問題。」蘇序然喺呢個時候附和宋楚妍
「完全唔啱囉！」江清懿苦惱咁托額，「如果真係嘅話，佢唔會比人鬧呀，但我會呢！」
「宜家嘅社會係戀愛自由㗎嘛～」蘇序然伸手搭住江清懿嘅膊頭
「戀愛自由係建基於啱嘅價值觀同道德觀。」江清懿撥開蘇序然嘅手，「雖然唔係親生啫，但係成件事好奇怪，會搞到我好似變態，我唔想無家可歸。」
「如果真嘅話，比副會長知會點？」宋楚妍露出好奇嘅表情
「我會死，鍾安而會係第一個打我，第二個打我嘅係佢老豆⋯呀，我媽都會打我⋯」江清懿無奈搖頭，唔需要發生都可以預想到自己嘅下場會變成點，「你地唔明白鍾樂時係幾受寵⋯」
江清懿好清楚自己同鍾樂時嘅關係，佢絕對唔會有任何非分之想，除咗係佢嘅道德觀念上唔容許外，更加係因為佢唔想成為一個無家可歸嘅人，又或者影響到其他人
⋯
「我今日完全冇聽到佢講咩，靈魂出竅咗半堂。」宋楚妍拎住匙羹，食一啖冰涼嘅刨冰
「你日日都冇聽，日日都靈魂出竅。」黎昕淇嘅視線落喺手機，望住新彈出嚟嘅message
陸修然：「哦哦，刨冰好食啦」
黎昕淇抿一下唇，總覺得陸修然有啲小情緒，抱怨緊佢放學揀咗同宋楚妍去食嘢
宋楚妍一直講，黎昕淇一直聽，手一直打緊字；陸修然灘喺床上，望住天花板發呆直到黎昕淇有回覆
「食完咪番嚟」「你可以唔番嚟」
「敢發我脾氣，你大件事」「你陣間番嚟就真係大件事」
「會長你好小氣」「我已經好大方」
「同你啲小粉絲解釋下你嘅緋聞比較好」「解釋咗都冇人信，嘥心機」
黎昕淇無奈嘆氣，事實的確同陸修然講嘅一樣，大家想聽嘅唔係佢地嘅否認，但有太多原因令佢冇辦法承認
「陣間陪我去買髮圈，我用緊嗰啲都鬆晒啦⋯」宋楚妍伸手摸一摸自己頭上嘅髮圈，「用到超鬆，要綁好多個圈⋯」
「好呀，我都要買新啦，用下用下又唔見啲。」黎昕淇道
兩人食完刨冰就去咗附近嘅商場買髮圈，一套五條，可以用好耐
「我買番黑色啦～」黎昕淇拎起黑色嘅髮圈，「你買咩色？見你用開深藍色。」
「買番深藍啦，用慣呢隻色⋯」宋楚妍從架上拎咗深藍色嘅髮圈，「我好似一直都係用呢隻色。」
「之前初中嗰陣，你都係用緊呢隻色唔係咩？」黎昕淇回想啱啱識宋楚妍嘅時候
「係呀～」宋楚妍笑一笑，又行前幾步睇下其他髮圈
宋楚妍要拎起其他髮圈嘅時候，感覺到手機震咗一震，拎出嚟就見到蘇序然嘅錄音message
宋楚妍將手機放到耳邊：「宋楚妍你做咗文言未？」
「哼哼～」宋楚妍估到蘇序然嘅意圖，帶住玩味嘅笑容㩒住錄音：「吓～你要呀？咁簡單，自己做啦～」
「蘇序然呀？」聽到宋楚妍嘅語氣，黎昕淇已經估到9成，「佢又問你借功課？」
「係呀⋯」宋楚妍直接反咗個白眼，「咁簡單嘅功課都懶得做。」
「你地感情咁好呀？」黎昕淇望住宋楚妍嫌棄嘅眼神笑道
「你唔好諗太多，朋友，就真係朋友。」宋楚妍睇穿黎昕淇嘅想法，「唔係個個都可以傳緋聞傳到好似你同會長咁㗎～」
「做咩突然又提起佢⋯？」黎昕淇拎起掛喺勾上嘅大腸髮圈
宋楚妍一直偷偷觀察住黎昕淇嘅反應，心情有啲矛盾，想搵到少許破綻證明緋聞嘅真實性：「你覺得會長點呀？」
「冇點呀，幾好呀。」黎昕淇將嘴角微微撐起，平靜咁點點頭，「好完美嘅一個人。」
黎昕淇講完之後都忍唔住喺心入面反自己一個白眼：「真係唔太想講佢係一個好完美嘅人⋯」
「你讚嘅嘢同其他人有咩唔同？仲以為會有啲唔同啲嘅嘢聽下。」宋楚妍略有點失望
「你想聽啲咩？」黎昕淇拎起一個黑色一個深藍色嘅大腸髮圈
「你唔會對我講大話㗎可？」宋楚妍遲疑地開口，望向黎昕淇嘅雙眸中係期望同信任
黎昕淇抿一下唇，微微一笑：「唔會。」
「我真係唔可以講⋯」黎昕淇嘅內心感到抱歉，因為心虛而一直將手中嘅髮圈捏嚟捏去，「抱歉抱歉⋯」
IG Link: https://www.instagram.com/nd_cotttoncandy/?hl=zh-tw