【愛情】如地下情一樣嘅癮，係我對你嘅定義: 92.
「我上次已經好好咁測試過，絕對唔係會長嗰派，唔會當你係後備！」鍾樂時舉手踴躍發言
「你見過啦？鍾樂時你果然係鍾安而嘅愛情第一把關者！」「梗係啦！我絕對唔容許其他人當我哥係後備或者不懷好意！」
鍾安而比兩人左右夾攻，左耳右耳都一直接收佢地嘅好意，但佢仲抹緊碟，只可以默默忍受
「我Follow咗佢IG！」鍾樂時捉住鍾安而嘅手臂道，眼睛瞄到放喺一邊嘅手機螢幕一亮，「係咪佢搵你呀？」
「咩進展呀？」江清懿捉住鍾安而認真咁問道，「你咁內斂嘅話追唔到人！」
「你地做咩仲急過我⋯？」鍾安而將抹布沖一沖水，擰乾後掛喺一旁嘅掛勾上
「陣間比人追走咗就唔好啦⋯」鍾樂時道，「你唔係等人地開口呀嘛⋯」
「唔係，不過睇定啲先啦。」鍾安而平靜道，佢只係覺得宜家未到時候，但眼前嘅兩個人仲緊張過佢，「急又唔一定好，宜家又唔係趕時間。」
不過鍾安而都估到佢地嘅急係急在咩：急在想食花生
鍾安而拎起手機行出廚房，番到自己房先睇message，佢覺得同鄭洛苡宜家呢個關係都冇咩唔好
廚房內剩低鍾樂時同江清懿兩人對望，氣氛一冷卻落嚟，鍾樂時頓時想逃離，佢今日晏晝算係知道江清懿嘅想法
「做咩呀？你又中意邊個呀？」江清懿見鍾樂時一直望住佢就順口問一句
「你理得我？」鍾樂時輕哼一聲反駁，一開始呢個話題，鍾樂時就覺得自己心跳加速，「反正唔係中意你咪得！」
鍾樂時講完就即刻行出廚房，江清懿對於鍾樂時嘅反應只有無奈，鍾樂時嘅脾氣真係一時一樣⋯
⋯
翌日朝早
𨋢門打開，黎昕淇行出𨋢，陸修然企喺𨋢外嘅落地玻璃前等佢
「咁早呀？」「咁慢呀？」
兩人一大清早就互不相讓，黎昕淇一拳打喺陸修然嘅手臂上，陸修然伸手到衫袖入面摸一摸被打嘅位置，指尖感覺到凹凹凸凸嘅觸感
陸修然將衫袖往下拉，擋住喺手臂上明顯嘅牙印，幸好咬痕近膊頭嘅位置，可以用衫袖遮住
「頭兩堂係PE堂？」陸修然望到黎昕淇攬住嘅紙袋，入面放咗運動衫同鞋
「嗯，人都未醒就要跑跑跳跳⋯」黎昕淇未上堂已經覺得攰
番到學校等埋宋楚妍番到就一齊去更衣室換衫，兩人企喺獨立更衣室外面快速咁換衫
黎昕淇將裇衫同校呔除落嚟，迅速咁將運動衫套到身上，怕慢一秒著跑話就會比宋楚妍見到佢膊頭上嘅牙印
「你著得咁快嘅？」宋楚妍瞪大眼望住已經換好衫嘅黎昕淇
「同平時差唔多啫⋯」黎昕淇露出尷尬而不失禮貌嘅微笑，下意識伸手摸一摸自己嘅膊頭
黎昕淇坐喺旁邊等埋宋楚妍，佢有啲想搵個機會同宋楚妍講清楚，但每次講到嘴邊嘅時候又講唔出口
「梳埋個頭就得啦～」宋楚妍咬住髮圈，雙手將馬尾梳番好
「哦好呀⋯」黎昕淇微微點頭，挺直腰背後望宋楚妍一眼，「楚妍會唔會講大話？」
「對你？定你嘅話我一定唔會講大話啦～」宋楚妍笑道，從佢嘅眼神同笑容睇得出佢唔似會講大話呃黎昕淇，「你都唔會對我講大話㗎可？」
「唔會⋯」黎昕淇微微一笑搖搖頭
「我就知你唔會呃我啦～」宋楚妍雙手捧住黎昕淇嘅臉頰
有種隱隱約約嘅不安感喺黎昕淇嘅內心滲出嚟，總覺得事情好快就會變成佢唔想變成嘅模樣⋯
雖然講咗唔會對宋楚妍講大話，但係關於佢同陸修然之間嘅事，佢唔知道要點樣突然開口同宋楚妍坦白
「唔通突然話「我想同你講清楚，我同陸修然嘅關係。」咁樣？」
「突然間點講得出我同陸修然嘅關係其實比想像中複雜⋯？」
「點講出口啫⋯」
「楚妍，其實—」「你地換完啦？咁快手嘅？」
正當黎昕淇想講啲咩暗示比宋楚妍知嘅時候，班上嘅其他女仔行入嚟打斷咗兩人嘅對話
「你地咁慢㗎～」宋楚妍笑道，然後望向黎昕淇，「你啱啱想講啲咩？」
「冇⋯」黎昕淇默默搖頭，「冇咩⋯」
中午放飯嘅時候，黎昕淇離遠見到陸修然同莫淮禮往餐廳行緊過嚟，佢連忙將視線移開，當自己冇見到陸修然一樣望向江清懿，意識到望嘅方向唔啱後立即望向另一邊嘅宋楚妍
江清懿擰轉頭望咗一眼，見到陸修然行緊過嚟，佢望黎昕淇一眼，隨即諗起鍾安而同鍾樂時嘅爆料，伸手就搭喺黎昕淇嘅膊頭上
「諗好食咩未呀？」江清懿同平日一樣問黎昕淇
「照舊。」黎昕淇默默咁郁咗一下，令佢嘅手搭唔到喺佢嘅膊頭上，「我唔係扶手，你隻手好重。」
「哦～」江清懿露出明白一切嘅笑容點頭，佢呢個微笑令黎昕淇覺得莫名其妙嘅同時感到不安
黎昕淇直接用望怪人嘅眼神打量江清懿，江清懿卻帶住笑容，佢宜家終於知道之前鍾樂時做咩一直叫佢離黎昕淇遠啲
食完飯番到學校，黎昕淇同江清懿咁啱都去小食部買嘢飲，買完嘢飲經後梯番課室嘅時候，江清懿特登回頭睇下係唔係得番佢同黎昕淇兩人
「喂，黎昕！」江清懿追上前同時壓低聲線叫咗黎昕淇一聲
「咩呀？」黎昕淇回頭望佢一眼後就繼續向上行
「你收得咁埋呀～」江清懿帶住笑容神神祕祕咁問，黎昕淇困惑咁望向佢，「仲以為你真係對會長冇興趣添～原來係地下情～」
聽到最後三個字嘅時候，黎昕淇收起咗困惑，一絲慌張喺佢嘅眼中快速閃過，心跳一瞬間加快，佢默默吞口水想令自己冷靜落嚟
「多得細妹衰多口，佢地兩兄妹琴晚咩都講晒啦～」江清懿得意洋洋，「你好快啲從實招來啦！」
「咩呀？唔知你講咩。」黎昕淇回復平靜，無辜咁搖搖頭
IG Link: https://www.instagram.com/nd_cotttoncandy/?hl=zh-tw