【愛情】如地下情一樣嘅癮，係我對你嘅定義: 103

就算鍾樂時唔講，鍾安而都係察覺到鍾樂時收起嘅小情緒，可能真係兄妹間獨有嘅心靈感應

「唔好諗太多冇結果嘅事。」鍾安而道，佢呢句說話喺冒出嘅瞬間佢就講咗出口

「呀？我冇啦⋯本來就唔會有咩結果⋯」鍾樂時苦笑道，拎住手機嘅雙手垂低放喺大髀上，「本來都知道冇咩結果可言⋯鍾安而呀鍾安而，你嘅妹妹我好傷心⋯」

「既然都知冇結果，仲一直原地兜圈等？」鍾安而默默嘆氣，視線一直停留喺手機嘅螢幕上

「嘻⋯唔等下嘅話冇死心嘅勇氣⋯」鍾樂時嘅苦笑更明顯，苦澀嘅感覺強烈到從雙眼滲出





一日未到零機會就一日都唔會放棄，鍾樂時都覺得自己好有毅力，明明都唔會有咩好結果

「唉⋯」諗到呢度，鍾樂時又忍唔住嘆氣

⋯

「Miss Chung幾點上嚟？」張詩楠望向會室嘅門口，「佢有冇講？」

「4點半前。」陸修然望一眼手錶顯示嘅時間，「不過都要等Miss Chung處理完佢嘅班務先得。」





「聽講Miss Chung嗰班最陣有啲麻煩嘢，搞到Miss Chung好忙。」鍾樂時抬頭對張詩楠低聲道，「不過佢約得我地開會匯報，佢唔會甩我地底嘅～」

「咔—」

推開會室嘅門行入嚟嘅係Miss Chung，跟係身後嘅係黎昕淇

Miss Chung行到枱盡頭嘅主席位坐低，陸修然同鍾安而坐喺佢嘅一左一右，黎昕淇拉開陸修然隔離嘅櫈坐低，將手提電腦拎到面前準備記錄會議

「我最近有啲忙，所以大家快手啲開始啦。」Miss Chung拎起投影機嘅遙控，等待大家嘅匯報





喺黎昕淇開緊匯報嘅內容同時，陸修然已經大概咁講解緊早前內閣成員提議咗嘅活動內容

Miss Chung望住投影出嚟嘅內容，黎昕淇專心咁聽住陸修然匯報嘅進度，拎住滑鼠嘅手按進度將頁面往下拉

「大家有冇其他嘢補充？」陸修然望向其他人，示意佢要講嘅內容已經結束，「副會長有冇嘢要補充？」

「冇。」鍾安而緩緩搖頭

「好，唔錯呀，要大改嘅嘢都冇咩㗎啦⋯」Miss Chung邊思考邊微微點頭，「啲活動可以諗詳細內容㗎啦，之後再交比我啦。」

大家紛紛點頭，Miss Chung將目光放喺陸修然同鍾安而身上

「睇下會長同副會長有冇其他嘢安排啦，冇就散會啦。」Miss Chung起身朝會室嘅門口行，隨意咁講咗句就打開門行出去

「副會長有冇嘢要講？」陸修然望向鍾安而問道





「冇，會長你有冇？」鍾安而執走枱上嘅物品

「冇啦，大家散會啦。」陸修然提手望一望手錶嘅時間

陸修然講完，下意識朝黎昕淇望一眼，黎昕淇輕抿唇一下後移開視線，喺移開視線後微微點一下頭

其他人執好嘢就走，黎昕淇望一望陸修然，然後孭起書包行喺鍾樂時同張詩楠身後

「得你一個走嘅～」鍾樂時回頭見到獨自一人嘅黎昕淇，停落嚟等埋佢

「係呀。」黎昕淇聽得明佢話裏嘅意思而一臉無奈，心入面有啲怕鍾樂時會亂講嘢

黎昕淇回頭望一眼，見到陸修然喺轉角位行出嚟後先略帶點安心咁收回視線





佢嘅一舉一動都比鍾樂時睇喺眼中，張詩楠順住佢望嘅方向望去，只係見到鍾安而同陸修然一齊行出嚟

唔知內情嘅張詩楠有啲不解咁望住鍾樂時同黎昕淇，黎昕淇只係笑而不語，嘴角微微上揚露出淡淡嘅笑容

黎昕淇喺行緊去地鐵站嘅路上見到有message通知，但望一望左邊又望一望右邊，鍾樂時同張詩楠一左一右將佢夾喺中間

「咁樣點睇message⋯？」黎昕淇喺心入面無奈嘆氣

到月台嘅時候列車剛好駛入月台，車門打開，黎昕淇直行到門對面冇座位嘅空位，靠住後面嘅扶手企

「聽日有默書，番去再溫熟啲先～」張詩楠道

「你唔好再漏成句啦～陣間又唔合格呀～」鍾樂時揶揄道

「我先唔會呀！我今次一定滿分，上次係失手，失手呀！」張詩楠翹埋雙手，低聲哼一聲





「請勿靠近車門—」黎昕淇望向發出提示聲嘅車門，目光一直停留

陸修然同鍾安而聽到車門閂上嘅嘟嘟聲，完全唔著急咁喺車門前嘅黃線後停低，望住列車駛離月台

兩人企喺月台前冇太多嘅交流亦冇太多嘅尷尬；陸修然拎起手機，對於一直都冇收到回覆覺得有啲唔高興

喺陸修然搭車番到去，行出地鐵站口，喺行番屋企嘅路上見到黎昕淇企喺一間鋪頭嘅前面

陸修然放輕腳步行到黎昕淇嘅身旁，細聲咁問一句：「睇緊咩呀？」

「冇呀，隨便睇下。」黎昕淇冇比佢嚇親，餘光早就留意到走向佢嘅陸修然，「番去啦。」

黎昕淇轉身就行，陸修然跟上佢嘅步伐行喺佢身旁嘅位置，習慣性咁喺兩人之間留有空間





陸修然悄然望向黎昕淇，黎昕淇若無其事向前行，陸修然嘅內心有啲在意呢樣細微嘅事

黎昕淇行入𨋢伸手㩒咗兩個樓層，陸修然微微一愣，望向黎昕淇：「你今日番去？」

「唔⋯轉頭過嚟。」黎昕淇猶疑一下後回答

兩人嘅沉默顯得𨋢內嘅壓迫感變得明顯，黎昕淇仰起頭合起雙眼，冇察覺到陸修然嘅視線落喺佢身上

陸修然垂低嘅手偷偷去勾隔離嘅人嘅指尖，黎昕淇下意識縮咗一下，睜開眼之後有啲尷尬咁對望咗一眼

「叮—」𨋢啱啱好到黎昕淇屋企嘅樓層，黎昕淇行到𨋢門前，𨋢門打開後頭也不回咁行出去

𨋢門重重咁閂埋之後陸修然不禁嘆氣，總覺得有啲隱隱約約嘅情緒積聚起嚟

過咗一陣就聽到門鐘響起，陸修然起身行到門前開門，黎昕淇企喺門前望住靠住門企嘅陸修然

「你做晒啦？功課。」黎昕淇經過陸修然嘅身旁行入玄關

「過兩日先交，唔急住。」陸修然閂上門，擰轉身嘅時候已經見到黎昕淇行到枱前

黎昕淇拉開櫈坐低，陸修然默默拉開佢隔離嘅櫈坐低；黎昕淇望一望佢，冇覺得有咩異樣，拎起筆做功課




IG Link: https://www.instagram.com/nd_cotttoncandy/?hl=zh-tw