【愛情】如地下情一樣嘅癮，係我對你嘅定義: 105

夜晚食飯前

江清懿同鍾安而企喺餐枱前飲湯，江阿姨捧住鍾樂時嘅碗小心翼翼咁喺廚房行出嚟，江清懿將碗中最後一滴湯都飲埋後將碗拎到廚房

「你飲完啦？咁啱啦，順便拎碗湯比細妹。」江阿姨回頭望向廚房，對喺廚房行出嚟嘅江清懿道

「你唔叫鍾安而⋯？」江清懿朝鍾安而望一眼，語氣中夾雜住少許婉拒嘅意思

「安而都未飲完湯⋯反正你都係番房，順便拎埋去啦！」江阿姨皺起眉頭，指一指枱上嘅湯，「快啲拎去，湯要趁熱飲！」





江清懿唔想爭拗落去，默默拎去碗湯朝鍾樂時嘅睡房行去

「叩叩—」江清懿禮貌咁敲門，等咗兩秒先扭動門鎖將門推開

房間內漆黑一片，唔洗諗都知鍾樂時瞓緊晏覺；江清懿行到書枱前，伸手摸到枱燈嘅開關，睡房頓時有一片光亮

「唔⋯」鍾樂時迷迷糊糊咁皺起眉頭，緩緩睜開眼

「飲湯。」江清懿將碗放到書枱上，視線只停留喺就快滿嘅碗上





「嗯⋯」鍾樂時坐起身，掀開被起身行到書枱前捧起碗

江清懿見佢起身，知道自己嘅任務完成，即刻急不及待轉身想行出去，喺佢轉身之際感覺到自己嘅手腕比人拉住

江清懿回頭望向鍾樂時，見佢只係默默咁飲湯，但手卻一直捉住佢唔放

「嗯。」鍾樂時嘅口中含住一大啖湯，拎住碗嘅手遞向江清懿

江清懿伸手接過碗，視線自然落喺鍾樂時身上，不經意同佢對上眼





「唔該⋯」鍾樂時感覺到尷尬嘅氛圍慢慢滲出嚟，頓時鬆手同時低聲咁講咗一句

「嗯。」江清懿拎住碗行出睡房，順手將房門閂上

喺門閂上後，鍾樂時直接癱坐喺床邊，最近一直都係維持喺呢種狀態，只要同江清懿講句嘢都覺得全身嘅力氣同勇氣都直接耗盡⋯

再坐咗一陣之後，鍾樂時行出廳坐喺梳化最靠邊嘅位置，同江清懿之間隔咗一個座位

鍾樂時啱啱坐低，江清懿就企咗起身，鍾樂時嘅第一反應係有啲難過咁抬頭望向佢

江清懿感覺到落喺佢身上嘅視線，大概係誤會佢係故意嘅視線，於是有啲手足無措咁回頭望一眼自己啱啱坐嘅位置

欲言又止，但最後都係冇解釋就行離梳化嘅位置，鍾樂時只可以喺心裏表達自己嘅唔高興

江清懿行入廚房睇下今晚食咩，睇完正打算轉身行出去嘅時候，感覺到有人企咗喺佢身後、離佢好近嘅位置





「阿姨～你今晚煮咩好嘢比我地食呀？」鍾樂時從江清懿身後探頭，手悄悄拉住江清懿嘅衫角唔比佢行開

「煮咗你中意食嘅蛋餅呀～」江阿姨笑道

鍾樂時嘅臉頰悄悄地輕貼喺江清懿嘅手臂上，完全唔怕江阿姨會發現一樣將距離主動拉近

「學生會好忙呀？最近你都咁攰要瞓晏覺嘅？」江阿姨關心道

「冇呀～番學好攰，番到嚟一灘就想瞓咋嘛～」鍾樂時嘅笑容毫無破綻，將心入面真正嘅情緒收到深處

「你喺出面等食啦，未有咁快食得。」江阿姨又繼續忙忙碌碌咁處理食材

「好呀。」鍾樂時乖巧點頭，鬆開拉住江清懿嘅手轉身行出去





江清懿擰轉頭望咗一眼，然後先轉身行出廚房，道算只係要行出去都唔想同步轉身，步伐都唔願意一致，感覺會好⋯唔自然⋯

每一步都好似要諗點樣避免同步一樣，就算食飯坐喺隔離都會覺得唔自在，但表面睇起嚟要同平時一樣平靜

食完飯後江清懿企喺廚房洗碗，今日係到佢洗碗嘅日子，其實只係平平無奇嘅洗碗時間，但江清懿總係覺得有啲壓力

「你出去食⋯」江清懿放低手上啱啱沖完水嘅碟喺一旁同時朝靠住喺雪櫃門嘅鍾樂時道

「我唔要！」鍾樂時拎住雪糕咬住匙羹拒絕道，「我中意企喺呢度食～」

「我洗緊碗，你企喺度食咩雪糕啫⋯」江清懿輕皺起眉頭，開始有啲唔耐煩，「出去食！」

「我唔要！」鍾樂時理直氣壯咁搖頭，微微側着頭、嘴角帶住一絲得意洋洋嘅笑意，「你好怕我喺度咩？」

「隨你啦。」江清懿連掙拗都唔想爭個輸贏，直接投降由得鍾樂時





鍾樂時卻笑唔出，扁起嘴緩緩抬眼，楚楚可憐咁凝視住江清懿

江清懿嘅餘光先一步留意到鍾樂時嘅眼神，無奈咁輕嘆一口氣望向佢：「唉⋯鍾小姐你放過我好唔好⋯？」

「唔好，我唔係啲會半途而廢嘅人嚟。」鍾樂時抬起頭，佢嘅倔強令江清懿更無奈

江清懿微微張開口，吸一口氣後又默默嘆氣，欲言又止嘅時候顯得更加尷尬；鍾樂時一臉得意嘅表情轉身，只係一個轉身，背對住江清懿嘅瞬間，本來因為得意洋洋而上揚嘅嘴角頓時塌下

有一個瞬間，鍾樂時覺得自己好卑微⋯

「冇可能嘅事，放棄咪可以！」

講出嚟太容易，但係要真係做到⋯又好似⋯唔係真係咁容易⋯





想下定決放棄，令自己都輕鬆啲，但係喺要下定決心嘅一刻，鍾樂時又唔捨得就咁放棄⋯

行到廚房門口嘅鍾樂時裝作自然咁擰轉頭又望咗一眼，心中嘅想法由眼神代替說出，默默收回視線行出去

⋯

行到地鐵站月台，黎昕淇同陸修然自動自覺咁分開行到唔同嘅卡車門前

黎昕淇朝陸修然嘅方向望去，回想起每一日同樣嘅做法，不禁輕嘆一口氣

「咁樣繼續唔公開，係唔係真係一件好事⋯？」




IG Link: https://www.instagram.com/nd_cotttoncandy/?hl=zh-tw