【愛情】如地下情一樣嘅癮，係我對你嘅定義: 115
「冇，我突然間問嚟做咩⋯」鍾安而將手上嘅書合埋放喺枱上，「邊個會特登問呢啲問題？」
「你唔擔心咩？佢地嗰級好似都唔少人講緊。」周晟祐道，「好快就會傳開晒～」
鍾安而沉默不語，大腦思考緊事情發生嘅可能性，但認真諗嘅話又覺得佢地嘅相處同平時冇咩大差別⋯
「唔會好奇怪咩？就算唔係親兄妹都好。」周晟祐輕皺起眉頭，但更多嘅係好奇，「一齊住嘅話就算係有啲咩都好，只要唔太明顯都唔會比人發現⋯」
周晟祐隨口講嘅一句，鍾安而頓時有啲警覺起嚟，仔細一諗又覺得好似真係有啲咩唔妥一樣
「再算⋯」鍾安而平靜道，「宜家都係大家講啫。」
「講講下就變真㗎啦呢啲嘢～」周晟祐道
鍾安而聽完又覺得唔自在，諗到陸修然同黎昕淇本來都只係大家茶餘飯後嘅話題，但結果佢兩個拍緊拖，一直瞞住大家地下情
萬一鍾樂時真係中意江清懿，咁佢呢個做哥哥嘅應該要點？爸爸同江阿姨會係咩態度咩反應？仔細咁樣諗嘅話都覺得有啲可怕
「有證據再講⋯」雖然口係咁講，但鍾安而嘅內心卻有明顯嘅不安感湧出嚟
另一邊廂
「晏晝想食咩？」宋楚妍坐起身問黎昕淇
「冇所謂啦⋯」黎昕淇隨口答咗句，佢嘅注意力都落喺手機上
「你最近成日都睇手機，你以前唔係咁㗎⋯」宋楚妍帶住抱怨嘅語氣道，探頭望一眼：「同邊個講嘢、睇緊咩呀？咦～原來係會長呀？幾時同會長咁熟？」
「識咗咁耐又喺學生會，好難唔熟。」黎昕淇笑住自然咁講道
「識咗好耐？你同會長以前唔係冇同過班咩？講到你同會長以前就識咁嘅～」宋楚妍未聽明白，以為黎昕淇講笑就順住落去附和佢
「嗯，係呀。」黎昕淇嘅心緊張到頂點，但都係以最平靜嘅表情反應回答
「吓？」宋楚妍望住黎昕淇認真嘅樣，一時反應唔嚟
「本來就係識咗好耐。」黎昕淇微微點頭，將事實直接講出嚟，「小學？小學之前？唔記得啦，總之就係識咗好耐啦。」
宋楚妍呆呆咁瞪大眼，什至懷疑緊黎昕淇係唔係同佢講緊笑，但望住黎昕淇認真嘅模樣，感覺又唔似係講緊大話⋯
「真係㗎？你之前冇提過嘅？」宋楚妍頓時覺得有啲委屈，咁重要嘅事都冇同佢提過
「提嚟冇意思呀，我地以前一直都係咁樣，冇同邊個提過呀。」黎昕淇望住宋楚妍一臉委屈，忽然有啲擔心下一個事實會唔會令佢更委屈更唔高興
「唔⋯」宋楚妍不悅咁嘟起嘴，「你都冇同我提過嘅⋯咁重要嘅事點可以唔同我講㗎⋯」
「講唔講都一樣呀，我又唔係真係咁想受人注目⋯」黎昕淇無奈道
「哼，宜家都夠受人注目啦，傳緋聞啦～」宋楚妍輕哼一聲
「嗯，由佢地講。」黎昕淇嘅笑容意味深長，「講唔講都一樣，又唔會對我同佢有影響。」
黎昕淇好少會諗佢同陸修然關係，因為以前一直都係保持距離嘅狀態，就算外面嘅人知道又好唔知道都好，對佢地之間嘅關係都冇咩關係，佢地向來都係各自過好自己嘅生活
拎起手機，見到其他喺學校已經公開嘅情侶喺IG光明正大咁放閃，有時會覺得羨慕，反而佢同陸修然揀咗小心咁保守秘密，不過人係反叛，有時都想偷偷地比人知道
「所以，一齊啦？」宋楚妍嘅雙眼中比好奇心填滿，但亦出於細心細細聲咁問：「偷偷地同我講呀～」
「唔⋯」黎昕淇欲言又止，最後微笑一笑：「你估下？」
「喂呀～」「你唔係中意呢啲刺激嘅猜題咩？」
宋楚妍急不及待想知道答案，但黎昕淇卻喺呢個時候先吊佢癮咩都唔講，居然仲要佢估
「去個廁所。」黎昕淇笑嘻嘻咁起身行離座位，行出課室朝廁所嘅方向行去
⋯
晏晝4點半，鍾安而番到屋企，一推開屋企門就見到著住居家服嘅江清懿喺房行出嚟，大概都係啱啱番嚟一陣
「細妹呢？」鍾安而朝廚房入面望，但冇見到鍾樂時
「喺房。」江清懿伸手指向走廊示意，然後一個轉身慵懶咁坐低喺梳化
「一齊番嚟？」鍾安面又問
「唔係呀，佢番到先，喺樓下先撞到。」江清懿拎住手機，眼都冇抬一下
鍾安而又唔覺江清懿有啲咩唔妥，佢睇起嚟同平時一模一樣，完全冇異樣，咁有「唔妥」嘅人，係⋯
「算啦，唔理啦⋯」鍾安而將皮鞋放喺鞋架上，然後行番房
喺經過鍾樂時嘅睡房前，鍾安而瞄咗緊閉嘅房門一眼
「以後，要好好照顧細妹呀⋯呢個任務交比安而你啦⋯」「知道⋯」
忽然喺腦海中閃出一句說話，有一個人喺拎住行李離開嘅時候蹲低握住佢嘅手同佢講，佢亦答應咗
鍾安而將書包放喺一邊，換番居家服後行到鍾樂時嘅房門前，猶疑半秒後提手輕敲喺門上
「叩叩—」「邊個？」
聽到回應嘅鍾安而推門入去，趴喺床上睇手機嘅鍾樂時坐起身，手仍然拎住手機，手機仍然播緊片
「做咩？」鍾樂時望住拉開書枱前嘅櫈坐低嘅鍾安而，「咁凝重嘅⋯？」
「關心下你。」鍾安而靠住櫈背，明明係同平時一樣自然嘅坐姿同語氣，但感覺卻比平時嚴肅
「吓？做咩要關心我？」鍾樂時不禁一笑問道
鍾安而向來都唔會同鍾樂時討論戀愛話題，兄妹之間討論呢啲話題嘅話，感覺好似有啲太奇怪？
IG Link: https://www.instagram.com/nd_cotttoncandy/?hl=zh-tw