【愛情】如地下情一樣嘅癮，係我對你嘅定義: 117

「原來都係一個想打探消息嘅小朋友。」陸修然睇穿莫淮禮嘅想法，嘴角微微上揚露出淡淡嘅笑容

「冇～」莫淮禮見自己嘅意圖被財穿，即刻若無其事咁笑住搖頭，「我點敢呢～雖然你講嘅話我又唔介意～」

「唔話你知。」陸修然笑一笑後道

「哎⋯」本來成個人都坐前咗嘅莫淮禮頓時一臉失望咁坐番後

陸修然忽然轉頭望向外面，黎昕淇嘅身影直接吸引到陸修然嘅目光停留，佢收得太好，以至於冇人發現





喺莫淮禮同陸修然望同一方向嘅時候，陸修然已經收回視線，好似冇見到任何人、冇情緒一樣

「你最近嘅story成日都po嘢嘅？」莫淮禮望一眼後冇多諗啲咩，順口就轉移話題

「無聊搵嘢po下啫。」陸修然提起雙手伸個懶腰，有邊個知道其實佢story嘅內容根本唔係佢po出嚟

「你po嘅嘢咁似嗰啲要解密嘅圖嘅？」莫淮禮開玩笑道

「你中意嘅都可以試下解下密睇下搵到咩⋯」陸修然拎起手機，佢都唔知琴晚黎昕淇po咗啲咩出去





一㩒開story就見到佢po嘅畫面有50%係白色，有50%係深綠色底黃色花紋，一睇就知係佢地嘅校呔

「你呢個係影緊啲咩⋯？」莫淮禮㩒開陸修然嘅story，困惑咁望住意義不明嘅圖

「我都唔知。」陸修然笑一笑，後半句喺心入面道：「又唔係我影嘅⋯」

陸修然拎住手機又仔細咁望咗一陣，睇起嚟有意思但又平平無奇嘅相，連扣喺校呔上面嘅金屬牌都冇影到，好難判斷意思

「唔知？唔係你自己影㗎咩，唔通係人地影嘅？」莫淮禮微微上揚嘅嘴角





陸修然直接無視佢嘅提問，當冇聽到一樣直接伏低喺枱上合埋眼，畢竟都係啲只要你留意下就會發現嘅嘢

「你估下。」隔咗好一陣，陸修然先再緩緩開口回答

放學嘅時候陸修然同莫淮禮一齊走，今日冇會要開，可以早啲番屋企喺某程度上嚟講都係好事

本來心情都冇特別好嘅佢都係想快啲番屋企，企喺車廂內嘅佢一直留意手機有冇新message

但望咗又望、等完又等，始終冇收到黎昕淇嘅message，唔係宜家，係今日都冇

陸修然左望右望，但似乎黎昕淇唔係同佢搭同一班車，於是又send一個message過去比黎昕淇：「到邊？」

黎昕淇一直冇睇佢嘅message，又惹陸修然不滿，莫淮禮感覺到一股突如其來嘅冷空氣喺佢身旁盤旋

莫淮禮嘅目光小心翼翼咁落到陸修然嘅臉上，總覺得佢好似黑緊面，比平時更加嚴肅⋯





陸修然落車嘅時候又一次拎起手機，螢幕自動亮起嘅時候，鎖屏上空空如也，咩訊息都冇

啱啱到地鐵站出口嘅黎昕淇拎起手機，見到陸修然嘅message，拎起手機就想回覆一句「啱啱到」

字打到一半就比人從後喺腰間捏咗一下，黎昕淇嚇一大跳同時即刻縮咗一下往旁邊閃開兩步

「你嚇邊個啦！」黎昕淇皺起眉頭，帶住不悅又似撒嬌嘅聲線提手喺陸修然嘅手臂上打咗一下

「做咩咁驚？做咗咩虧心事？」陸修然輕笑一下又收起笑容

「正常都會比突然出現嘅人嚇親啦⋯！」黎昕淇輕聲咋舌

陸修然只係笑笑，然後就冇再講嘢，邁步嘅時候黎昕淇慣性咁提手等陸修然拖佢，但今日陸修然嘅手一直垂低，完全冇拖佢嘅打算一樣





黎昕淇不禁一愣，手都懸喺半空，用困惑嘅眼神望住陸修然，但陸修然冇望佢，明明平時只要黎昕淇有少少動靜，陸修然都會即刻發現，今日佢冇⋯

「喂喂。」黎昕淇探頭望陸修然

「嗯。」陸修然卻好似平時一樣望向佢，微微點頭，見黎昕淇冇再講落去就收回視線

「做咩呀～」黎昕淇帶住少許笑容柔聲問道，試圖氹一氹佢嘅會長，雖然佢連佢嘅會長因咩事而唔高興都未知

「咩做咩？」陸修然扮冇聽明反問黎昕淇

「你做咩。」黎昕淇道

「冇做咩。」陸修然若無其事咁搖頭，其實只係好少事，只係呢件事卡喺佢心頭影響到佢嘅情緒

陸修然伸手㩒𨋢，𨋢啱啱好到達開門，陸修然直接邁步行入𨋢，完全冇等黎昕淇嘅想法





等𨋢門閂埋之後，黎昕淇雙手抱住陸修然嘅腰，陸修然察覺到夾雜喺當中討好嘅意思

黎昕淇拉住陸修然嘅衫袖稍微踮起腳尖，喺佢喺嘴角輕吻一下，明亮嘅雙眼定睛望住陸修然等待佢嘅反應

「你冇咩表示⋯？」黎昕淇見眼前嘅人只係默默望住佢，頓時覺得唔高興

唔高興咗兩秒又諗，今日佢先係要氹人嗰一方，以前陸修然唔洗佢氹，氹人嘅向來係陸修然，雖然中間一定會冷戰好幾日

「你比啲反應呀⋯」黎昕淇攬住佢嘅腰，頭靠喺佢嘅膊頭上蹭咗兩下

黎昕淇微微抬起頭，陸修然一臉平靜，喉核卻上下一動

「原來都唔係真係咁冷靜～」黎昕淇嘅嘴角微微上揚





黎昕淇再一次踮起腳尖，喺喉核上曖昧咁輕咬一下，只係好輕好輕嘅力度，會感受到牙齒嘅觸碰同時唔會有痛感

「你⋯！」陸修然想往後避開，結果頭「呯」一聲撞上後面嘅鏡，「呀嘶⋯」




IG Link: https://www.instagram.com/nd_cotttoncandy/?hl=zh-tw