鏡像密語: 第二十一章、那個忍心把你推開的我

（已經隔左一日啦⋯⋯）

（佢都係冇搵過我）

（咁你仲睇以前對話紀錄做咩？）

（我好懷念⋯⋯以前同佢日傾夜傾既日子）

（而唔知幾時我開始會猜度下佢既心思，估佢點解會成日send啲心心既emoji 比我，估佢點解會同我講晚安，點解成日對住我笑）





（因為我到依家都仲好記得某日我地係內閣玩個時我同佢貼得有幾近，當時我好似第一次知原來我個心臟可以跳得咁快⋯⋯）

（依家知左對方心意係鬆左口氣因為知自己唔係一廂情願，但同時意味住我唔可以再扮唔知自己其實係介入左人地段感情）

（我良心過意唔去⋯⋯）

叮———

「今日某位同事提起你，咁啱你今日放假⋯⋯佢話你好似女版既我」





（又會咁啱係我掛住你個陣你搵我既）

「係咩？咪繼續扮囉師兄⋯⋯」洛妍好努力擠出笑容咁覆message ，逗下自己同對方笑。

（知唔知咩叫「冬天飲雪水」，就係咁既感覺）

「個日煇爺問我有冇男朋友，我答佢話我冇，佢問我話咁你想等丫言等到幾時？我反應唔到，煇爺就係到笑我。」

「咁你想唔想有丫？」





（我點會唔⋯⋯）

「唔答你」

「點解？」

「我幫你揀左⋯⋯你返去佢身邊啦！」

（既然你一直都揀唔到⋯⋯咁今次我幫你做選擇啦）

（我唔願意要你背負住渣男呢個罪名，我都唔想你辜負你女朋友，佢跟左你5年啦，我既良心已經⋯⋯）

（趁我地未開始，趁我地未有咁深既感情基礎⋯⋯依家斬纜應該係最正確既決定）

（梁洛妍，正一矛盾究極體！）





（想人奔向你又推人走）

（人地話愛情係自私同時係偉大，今日我真係領悟到呢句說話既真諦）

（想你揀我係既私欲，但狠心推開你係真正既為你好）

（有時中意一個人，唔一定要擁有佢，可能睇住佢同另一半過得好好、過得幸福既話，對我黎講⋯⋯已經足夠）

洛妍望住左自己右手手腕，沉默片刻，諗起左唯楓隻手⋯⋯

（你唔可以選擇我，同樣我都唔可以選擇你。）

（我唔想再多一個女版唯楓⋯⋯）





（愛你，果然係孤單的心事）

「我想安安靜靜咁離場⋯⋯」

「點解？我都想回應你既心意」

「唔洗回應啦！我地已經令好多人都唔開心！我既出現已經令到太多人唔開心啦」

「咁我呢？」

「你信我，我知邊個選擇對你係最好，我做既野係為你好，你揀我既話你會後悔嫁！」

「點解會後悔？」

「我知你好缺安全感，我比唔到你嫁啦」





（你睇唯楓就知啦⋯⋯）

「但你女朋友可以！」

「加上我對你黎講只係一種新鮮感既存在⋯⋯」

「你真係咁覺得？」

「趁你未離開佢，你依家返去佢身邊仲黎得切！我貪心左兩個月，我要醒嫁啦，你都係，唔好咁任性啦⋯⋯」

「你覺得我同你一齊幸福啲定係同佢？」

「我唔知，我只係知咩係對你最好既選擇！」洛妍既電話屏幕上面多左幾滴水，每一滴都係帶有餘溫。直到洛妍雙眼同屏幕開始都模糊⋯⋯





（你唔係覺得自己好型好偉大丫嘛？）

（⋯⋯）

（有冇咁中意佢丫？）

（情與義，我揀左犧牲自己既快樂去換其他人既快樂）

（人地唔知你為左佢付出幾多，唔知你有幾傻）

（犧牲從來都唔係一個容易嘅課題）

（我知我開唔開心唔重要，佢同佢地開心就得）

（咁嘅犧牲先至有價值）

（連自己有冇幸福都可以唔理？）

（以前一直唔明白《比悲傷更悲傷的故事》有咩好喊，我今日明左）

（原來我曾經咁中意過一個人⋯⋯）

（你一心想為佢好而作出既決定未必結果係好，但你為左佢連自己開唔開心都可以拋卻不管，就呢份心意已經抵過一切唔好既結局。）

（咁樣你只係強行道德綁架佢要聽你枝笛嫁咋喎？）

（係嫁，但我既解釋係——愛情從來都唔係用公平、道德呢啲準則去衡量、計算、量化得到既野）

（綁架係咪愛？）

（推開係咪愛？）

（對我嚟講，為對方無條件付出犧牲就係愛）

（不過依家⋯⋯）

（神，祢可唔可以賜我勇氣，一係跑向佢，一係離開佢）


（續）