鏡像密語: 第三十一章、多疑症

洛妍第二日返工既時候係茶水間撞到煇爺，煇爺同個個都好熟，因為佢係呢到係比較健談，洛妍返工頭一個星期都係得煇爺主動撩佢傾計，之後先識到亦言。

「喂小朋友，早晨」

「？」洛妍黑人問號，下意識笑左一下。

「冇丫，叫下你姐，唔中意我咁叫你？」

「唔係丫，我幾中意丫，因為我會覺得我好似仲好有童真咁，雖然我真係細過你好多咁，所以你叫又幾合理，哈哈」





「喂但你呢排肥左喎⋯⋯」

「嗚嗚⋯⋯我依家咪減囉！」
（梗係啦，投餵係有代價嫁）

（再加上之前因為某啲人而唔開心，想用酒精麻醉下自己，個時既我唔係晚晚醉就係隔日醉）

（但我同自己講左要戒酒）

（因為我醉到講左啲唔應該講既野、醉到比人抽水）





（我個晚知唔應該再飲落去）

（同埋⋯⋯酒精好肥）

（煇爺之前提過話亦言中意瘦妹喎⋯⋯）

（咁⋯⋯咪咁囉）

（減肥至上！）





「喂，夠唔夠膽⋯⋯同叔叔去掃街」

「唔好大我，洛妍唔輸得」

「你咁講我放心晒！收工去食小丸子」

「你請係咪？」

「一定啦呢啲，知你愁緊錢⋯⋯叔叔怕你食唔飽」

「多謝煇爺⋯⋯」

其實早前洛妍同煇爺傾過下最近心煩既事（係除左徐亦言既）





「洛妍你做咩最近又OT返，你個樣好攰，你已經返兩份工啦喎⋯⋯」

「唉⋯⋯我都唔想嫁⋯⋯我愁緊錢」

「話比叔叔知發生咩事」

「係咁既，我最近身邊啲同學仔個個都好愁錢，有個自己冇時間返工但倒貼錢去book場比我地學會跳舞，有個為錢走去做酒吧PR，有個屋企有事學費都差啲交唔到，我又幫唔到佢地啲咩，我又唔係有十幾廿萬，我屋企人仲等緊我交家用，仲要我依家讀跳舞既錢都係由自己供緊，都未計我遲啲學會要貼錢搞表演，一個表演原來要比十幾萬，包括要租一個大會堂、背景佈景費、音效野、宣傳單張、請老師黎教舞排舞，樣樣都係錢⋯⋯」

「明白⋯⋯」

「最慘係我地之前搞既活動冇咩人參加，變相賺唔到錢，咪要我地倒貼囉⋯⋯我係叫有穩定收入既人啦，但佢地唔係⋯⋯佢地只係學生」

「好善良喎你都⋯⋯」

「有咩用？都係無能為力⋯⋯」





「但都冇辦法嫁喎」

「所以幫唔到佢地既我咪唯有請下佢地食嘢咁囉，都係細錢姐，上次去玩都係我比大數既」

「其實叔叔我擔心你都唔夠錢洗喎」

「冇事既，所以我每日都返工囉，幾攰都返，放工去跳舞跳到周身骨痛都捱住痛堅持第二朝返工⋯⋯老實講我體力每日都透支緊」

「嘩，你比自己休息下啦」

「你知我唔中意放假⋯⋯」

「唔中意同有需要，兩樣野黎」





「⋯⋯」

「叔叔請你食飯啦⋯⋯」

洛妍感動到眼濕濕但循例都講左句唔好意思既，但煇爺堅持⋯⋯

「多謝煇爺」

「客咩氣⋯⋯你真係覺得唔好意思就當我係多謝你陪我一齊食嘢。」

（人間有愛係咪咁解⋯⋯）

（識到你地呢班同事，係洛妍既福氣、福份）

（我知你知我愁錢所以先會成日借啲意叫我陪你食野，實質係想請我食，為左減輕我既壓力⋯⋯）





（事關我係煇爺面前試過好多次行過見到想食既野但望左好耐都唔買）

（佢問起點解，我先開口話覺得太貴，自己唔捨得，雖然一開始會用減肥做藉口⋯⋯）

（但佢都會話：叔叔有錢，嗱我買左先，但我一定食唔晒既藉口而買⋯⋯）

（啲野食拎到我面前⋯⋯仲減咩肥丫大佬）

（笑死）

（我諗係得你先會知我過得苦⋯⋯）

⋯⋯⋯⋯⋯

「喂，有單野我都心煩緊⋯⋯」

「咩事丫煇爺？」

「我⋯⋯有個好好好好耐冇見既舊同事舊朋友返黎香港，約埋成班人去partyroom，但我好淆，唔敢自己去⋯⋯」

「有咩好淆？」

「我唔知你有冇曾經試過，去見一個好耐冇見既朋友，個種心情好緊張⋯⋯」

「啊⋯⋯我試過！我明」

「夠唔夠膽⋯⋯陪叔叔去？」

「哦⋯⋯你想我陪你，咁佢就算應酬其他人，你都冇咁尷尬？」

「冇錯！」

「我明丫！但我都唔識佢哋，佢哋會唔會覺得好奇怪？」

「下，冇野嫁，因為全場我都係只係識得一個人，所以更加淆！」

「下？咁你又去既？識得一個，我以為你全班都識！」

「唔係，佢好多年前去咗外國住，已經好多年冇再聯絡，今次佢一返嚟，其實就係一次過約晒以前啲同事同中學同學，所以有兩邊人都係唔識對方⋯⋯」

「哦⋯⋯原來係咁」

「不過佢都歡迎我帶個同事去一齊玩」

「咁⋯⋯」

「你放心啦，全部黎既都係大姐姐！」

「現在你成日都請我食嘢嘅份上我就陪你啦！不過我唔識得佢哋，所以可能我一去到都只會坐喺度食食食⋯⋯」

「冇問題啦！」

「仲好啦！我好耐冇BBQ啦，又慳一餐！好野！」

「哈哈哈！洛妍你好搞笑，係咪有得食都會約到你？」

「有人請就應該係，哈哈哈！」

⋯⋯⋯⋯⋯⋯
如是者，煇爺都成日請洛妍食野，時不時會話洛妍好搞笑好得意。

「你真係好得意喎洛妍⋯⋯」

「係咩？雖然我唔get你地話得意位係邊⋯⋯」

「我終於明白點解丫言對你咁死唔斷氣！」

「下？哈哈哈！」
（斷左啦，人地咪揀左囉）

「好彩丫叔幾廿歲⋯⋯」

「定力夠丫嘛！知你想講咩啦我！」

「其實⋯⋯如果佢個時冇復合咪幾好囉⋯⋯咪冇事囉」

（試下唔好再提？）

（我每次一諗到呢到我都好崩潰）

（怨佢咁揀好定係怨自己太遲識佢好）

（我成日跟你出嚟食食食，都係為左想逃避現實、逃避問題⋯⋯）

（同埋我想逃離有佢既世界⋯⋯）

（點解？）

（逃離到咩？）

係洛妍失神之際，煇爺就拎個電話出黎影底洛妍啲表情、為食樣⋯⋯

「你咪繼續影影影、錄錄錄囉」

「你唔係話唔知自己打耳位係邊咩？」

「係丫⋯⋯」

「唔影唔錄你點睇得返自己打耳位係邊？」

「有道理喎！」

「嗱呢張！係咪打耳？」

「又係喎⋯⋯」
（笑到好似松鼠狗狗咁，腰果眼、包包面，個鼻都好打耳，整體好似有啲人話會比101分⋯⋯）

「喂，唔好睇相先啦，食左先啦，個雪糕溶啦」

「係係係！」

⋯⋯⋯⋯

翌日，亦言放假所以洛妍同丫迪、煇爺佢地一齊食飯，等緊放飯之際，煇爺主動提起：「喂小朋友，琴日好多人ig問我關於你啲野？問你係邊個」

「？佢地識我既？」

「冇丫佢地睇到我story」

「下？你post左我？」

「係丫」

「下！你唔問下我先既？」
（仆街，咁徐亦言咪又會⋯⋯）

（又呷硬啦⋯⋯）

（今翅仆街了！）

「下？點解呢？條片我嫁嘛⋯⋯」

「又係喎⋯⋯」
（好似真係有啲道理⋯⋯）

（但我點解覺得怪怪地既）

（我一時之間都唔知點反駁你）

（唯有⋯⋯）

「咁萬一你放左我樣衰既片同相點算」

「我cut左唔樣衰個part啦（幫你）」

「⋯⋯」

「咁一係我del返啦」

「有咩用？人地都睇到晒啦⋯⋯」
（有咩用？佢都睇到晒啦⋯⋯）

「⋯⋯」

「下次唔好啦⋯⋯」
（唔怪得之徐亦言唔show我呢咁多日）

（好唔好晏啲打比佢解釋下？）

（但佢唔係你男朋友喎，你咁做其實都冇做錯野，做咩要驚佢嬲？）

（我唔知丫）

（你知既⋯⋯）

（問下佢有冇嬲先啦都係）

如是者，小鏡收左工之後懷住戰戰兢兢既心打電話比鏡鏡

「喂？你⋯⋯你冇野丫嘛？」

「冇野丫⋯⋯做咩？」

「冇丫我覺得你好似有啲出奇？」
（出奇地安靜）

電話另一端傳黎鍵盤聲⋯⋯

「我冇野丫⋯⋯」

「咁我可能諗多左啦⋯⋯唔阻你打機啦⋯⋯」

「嗯⋯⋯」

（真係冇野？）

（我知真係冇野！）

（點解？）

（因為之前佢試過坦白同我講有唔開心）

（咁佢今次應該都係坦白對我既⋯⋯）

（我多疑了嗎？）

（又話男人好簡單，有野就話有野，冇野就話冇野既）

（女人先會有野話冇野嫁嘛⋯⋯）

（多疑症候群，點拆？）

（唯有誠實方為良藥）