本來諗住對付班電話cold call, 點知攪到自己爭d無命: 7

我哋坐咗係成日拍嘢個塊大草地，初頭以為佢哋係d無所事事嘅廢青，點知佢哋自我介紹時話從事緊一項秘密任務，正對付緊個班操控推銷同詐騙電話既龐大集團。

雙方正係虛擬世界打緊仗！

吓！我第一時間真係聽到眼都突埋！我重懷疑佢哋係未打得機多思覺失調，會講埋d咁既嘢，定係推銷虛擬貨幣新花招？靚仔，啱啱先有間爆咗煲喎。

之後個綠毛仔隊部電話來，叫我掃個QR code。我猶豫咗一陣
，佢話呢個係俾你進入個虛擬世界嘅！我滿腦疑問，問點解咁多人唔搵要搵我，佢就解釋我係少數無被催眠保持清醒嘅香港人。

之後另一個染到一半白一半紅色頭髮嘅肥仔主動同我講，係現實世界好難對付到班友，佢哋借助咗虛擬世界力量，做到一d實體人做唔到嘅事情，例如隔空催眠，個d電話一打嚟，其實已經有催眠藥走入你耳朵，之後滲入埋大腦細胞，摧毀晒個人意志同反抗能力，咁就攪到個個乖乖課金。





我其實真係聽到一舊雲，你問我Debit, Credit就識姐，呢d咁荒誕嘢真係完全理解唔到。

佢哋又叫我掃code. 話進入咗虛擬世界就會清楚好多，但我真係有d驚，驚唔知會睇到d乜。不過佢哋好好禮貌，見到我個呆樣都無催我。之後重話可以諗諗，話晒依家唔係打機，係真正打仗。

不過佢哋又嚇我，話之前我又搵東張又搵警察，班集團已經知道咗，
叫我要小心人身安全咁話。我真係成個人震晒，佢哋話班騙子知道咗我之前d舉動，但同時間呢班靚仔又知道嘅？呢班係人定係鬼呀？

「呢個就係虛擬世界嘅力量啦，我諗你以為我哋係網上起你底，但係你尋晚食唐記鳳爪排骨飯，中午你食麥記安格斯漢堡餐，飲士多啤梨奶昔係唔係？斷估上網刮唔到呢d料啦！」條女咁樣講。





我都無嘢好講啦，原來呢個世界已經無晒私隱。

睇嚟，我都要走入呢個虛擬世界探索下……….