本來諗住對付班電話cold call, 點知攪到自己爭d無命: 28

第一日係番元朗，五隻機械戰士係空中掟疫苗彈，d彈爆開之後，見到好多本來拿住電話唔放嘅人，開始cut線，臉色開始回復紅潤，表情無咁生硬，動作都開始靈活番。為咗加強功效，前前後後掟咗三次。我同Celia係旁邊監察，直到完成都無任何敵人動靜。

跟住落埋天水圍，都係好順利。之後再落洪水橋，藍地，到咗屯門市區，最初係富泰，兆康都好順利，但一去建生，d藥力好似唔多掂咁，吸完d人都無乜反應。Celia同霍醫生講番個情況，佢叫我哋返番博愛先。

我哋拿拿淋飛番去，但係藍地上空，見到前面密麻麻，好似成堆飛蟻咁係前面擋路，我哋飛高d, 佢哋跟住飛高d, 之後數量重越嚟越多，成幅黑牆係正前面。

機械戰士舉槍掃射，但射完之後好快d飛蟻合番埋，前無去路後有追兵，後面又有一排，前後夾攻越迫越埋。

Celia已經驚到震，蟻多褸死象，佢哋夾埋嚟個陣，我都唔知點應付。幾個機械戰士身先士卒，圍住保護我哋兩個，不斷咁開火，但打極都有。我諗咁樣好快無子彈，到時實俾班昆蟲溶晒。





我呢刻先覺得自己死蠢，點解頭先唔衝落地下呢？唔飛天可以盾地㗎嘛，可惜諗個時已經太遲，保護我哋班機械戰士終於無彈藥，轉頭被班飛蟻吞滅晒。睇怕好快到我哋。

好快眼前已經漆黑一片，聽到個d咬啃鐵甲嘅聲音，好令人心寒好刺耳。呢刻先諗起妹妹仔d毛，睇怕又要攞出嚟用啦。

仆街啦，唔見咗嘅。我摷極都摷唔到，諗極都諗唔到放咗邊樹。我騰晒雞，無咗護身符，今次神仙都難救啦！

但突然間眼前火光熊熊，個兩塊飛蟻牆著晒火，轉頭變晒灰燼，見番晒出面環境，原來救兵及時趕到，增援機械戰士用火攻，燒死晒班飛蟻。我諗唔到用火呢樣嘢，如果唔係唔駛攪成咁。

我哋返番博愛，霍醫生話個d催眠藥轉咗成份，我哋d疫苗攪唔掂。重話要研究新疫苗，無可能一日半日攪掂。同埋佢話吸咗疫苗個d人，如果再接電話就會再被催眠打回原形。





我諗不如將頭先好番個批人，的咗嚟醫院先，但霍醫生話擺唔到咁多人，同埋巴兩星人一定會阻止我哋。

大家神色都好凝重，巴兩星人好似好多板斧，但我奇怪點解巴兩星人咁快轉到催眠藥呢？由元朗散藥散到屯門都係幾個鐘時間啫，佢哋d科技真係咁厲害？

唔通呢度有二五仔或女？……..