本來諗住對付班電話cold call, 點知攪到自己爭d無命: 35

係巴兩星同Celia同屋共住，朝夕相對。同佢都算啱傾，不過對佢始終無乜特別感覺，我其實重好掛住阿珍妹妹仔，甚至覺得佢根本未死，只不過去咗第二個空間姐。

尤其係呢排成日見到個好似佢樣嘅巴兩星人。我甚至試過扮問路引佢講嘢，點知把聲完全唔似，同埋佢明顯對我無印象。我諗我諗多咗，只不過人有相似。

阿榮都同我講過吓呢度d婚姻戀愛制度，佢話呢度無婚姻制度，大家合眼緣就一齊，性別不限，伴侶數目方面可以係一個或者多個添，但大前提係要搵番同樣圈子，例如你係要同性嘅，就只可以搵番同一個圈子。數目都係一樣，如果你係選擇超過一個伴侶嘅，就唔可以搵只接受單一伴侶嘅人做對象，簡單講係要搵番相同價值觀嘅，至於生育下一代方面，需要通過超級電腦考核，如果你性格上健康上有問題，對星球嘅貢獻值不足，係唔可以生仔嘅，以確保國民嘅質素，同埋下一代可以有正常優良嘅教育。呢度生仔真係要考牌㗎。

我諗起fb都有個生仔要考牌群組，但唔知點解無人真正推廣，講真好多人真係唔係咁啱做老豆老母㗎，個d爛玩，有不良嗜好，無錢，情緒有問題，生下一代盞累死佢哋。

我問係因為我突然有個諗法，想溝個個超似阿珍嘅巴兩星人，但未溝之前，緊係先要知道呢度遊戲規則先。Celia聽到我呢個諗法好似唔多開心，佢話我好似唔記得咗地球正係水深火熱咁，開始中計。





講真我對地球嘅嘢真係無之前咁上心，除咗兩老，但我諗佢哋係博愛重係安全嘅。

今日又撞到個個超似珍妹嘅巴兩星女仔，佢認得我重同我點頭。我即刻打蛇隨棍上啦。其實一路都係聽阿榮講嘢，但要深入瞭解巴兩星，點都要識番個地頭蟲啦。

佢知我係地球人，重話越來越多地球人移民過嚟。唔怪之得會有地球食物供應，同埋識講我哋d話啦，但佢哋又點嚟嘅呢？睇下有無機會認識番其他地球人先。

但有樣好巧合嘅，佢又係叫阿珍。我望住佢有d想喊，佢好好奇咁問我發生咗咩嘢事，個眼神好天真。

之後我哋坐低慢慢傾，佢講嘅嘢大致上同阿榮講嘅都一致，不過佢補充咗句：





「但你哋有d人太卑鄙啦，利用咗我哋做壞事害人，重將我哋講到係侵略者，攪到我哋同丁寅星不和。我哋就快會撤出地球，唔會再救你哋d人㗎喇。」

呢句話，真係成個大炸彈咁掟落嚟。

我嘅認知，係巴兩星人無聊得滯，係地球玩嘢，重同班電騙黨合謀，利用cold call或者欺詐電話將接聽者催眠，從而刮走晒佢哋d錢財。點知嚟到巴兩星，聽到係完全另外一個版本。

巴兩星阿珍再補充話好多地球移民係嚟自戰亂國家，或者一d有才能但係地球得唔到合理待遇嘅人，貧窮嘅又救咗唔少，另外有極少量係有異能嘅人，希望佢哋嚟做巴兩星戰士。

極少量有異能嘅人？咁我係咪屬於呢類呀？………